Maluluy-on Gyod ang Atong Hataas nga Saserdote—si Jesus

1-2. (a) Nganong gipadala ni Jehova ang iyang Anak dinhi sa yuta? (b) Unsay atong hisgotan niini nga artikulo? (Hebreohanon 5:​7-9)

MGA 2,000 ka tuig kanhi, gipadala ni Jehova nga Diyos ang iyang pinalanggang Anak dinhi sa yuta. Ngano? Aron mapahigawas ang katawhan gikan sa sala ug kamatayon ug aron wagtangon ang mga problema nga gipahinabo ni Satanas. (Juan 3:16; 1 Juan 3:8) Dugang pa, nahibalo si Jehova nga ang kinabuhi ni Jesus dinhi sa yuta makatabang niya nga mahimong mas maluluy-on ug mas masinabtanon nga Hataas nga Saserdote. Si Jesus nahimong Hataas nga Saserdote human sa iyang bawtismo niadtong 29 C.E.a

² Niini nga artikulo, atong hisgotan kon sa unsang paagi ang kinabuhi ni Jesus dinhi sa yuta nakatabang niya nga mas maandam sa pag-alagad ingong atong maluluy-on nga Hataas nga Saserdote. Kon mas masabtan nato kon sa unsang paagi “nahingpit” o nahimong kuwalipikado pag-ayo si Jesus ingong atong Hataas nga Saserdote, mas mahimong sayon para nato ang pagduol kang Jehova bisan dihang maguol ta tungod sa atong mga sala o kahuyangan.—Basaha ang Hebreohanon 5:​7-9.

ANG PINALANGGANG ANAK SA DIYOS MIANHI SA YUTA

3-4. Unsang mga kausaban ang naeksperyensiyahan ni Jesus dihang mianhi siya sa yuta?

³ Daghan nato ang nakaeksperyensiyag mga kausaban, sama sa pagbalhin ug laing lugar, nga tungod niana malayo ta sa atong pamilya ug mga higala. Dili gyod ni sayon nga mga kausaban. Pero wala ra ni kon itandi sa mga kausaban nga naeksperyensiyahan ni Jesus. Sa langit, siya ang una ug pinakaespesyal nga anak ni Jehova. Gihigugma gyod siya ni Jehova, ug malipayon siyang nag-alagad diha sa “tuong kamot” sa Diyos. (Sal. 16:11; Prov. 8:30) Pero ang Filipos 2:7 nag-ingon nga “gihaw-asan [ni Jesus] ang iyang kaugalingon.” Sa ato pa, iyang gibiyaan ang iyang maayong kahimtang didto sa langit aron mopuyo uban sa dili hingpit nga mga tawo.

⁴ Matikdi pod ang mga kahimtang dihang natawo si Jesus. Pobre ang iyang pamilya. Nahibalo ta ani tungod kay duha lang ka gagmayng langgam ang gihalad sa iyang mga ginikanan human siya matawo. (Lev. 12:8; Luc. 2:24) Dihang nahibaloan sa daotang hari nga si Herodes nga natawo na si Jesus, gusto niya siyang patyon. Aron maluwas si Jesus gikan sa daotang plano ni Herodes, ang ilang pamilya mibakwet sa Ehipto ug mipuyo kadiyot didto. (Mat. 2:​13, 15) Lahi ra gyod kaayo ang kinabuhi ni Jesus dinhi sa yuta kon itandi didto sa langit.

5. Unsay nakita ni Jesus samtang dinhi siya sa yuta, ug sa unsang paagi ni nakatabang niya aron maandam ingong Hataas nga Saserdote? (Tan-awa sab ang hulagway.)

⁵ Dihang dinhi si Jesus sa yuta, nakita niya ang pag-antos sa mga tawo. Si Jesus nahibalo pag-ayo kon unsa ka sakit nga mamatyag minahal sa kinabuhi kay naeksperyensiyahan na niya mismo, sama niadtong namatay ang iyang amaama nga si Jose. Diha sa iyang ministeryo, nakita ni Jesus nga luoy kaayog kahimtang ang mga tawo. Pananglitan, naa siyay nakita nga mga tawo nga sanlahon, buta, dili na makalakaw, ug mga ginikanan nga namatyag anak, ug naluoy kaayo siya nila. (Mat. 9:​2, 6; 15:30; 20:34; Mar. 1:​40, 41; Luc. 7:13) Tinuod, nakita kana ni Jesus bisag didto pa siya sa langit. Pero mas nasabtan niya ang gibati sa mga tawo dihang dinhi na siya sa yuta. (Isa. 53:4) Ang mga naeksperyensiyahan ni Jesus dinhi sa yuta nagtabang niya nga masabtan ang pagbati sa mga tawo ug ang kasakit nga ilang giantos. Sama nila, mibati pod si Jesus ug lainlaing emosyon, apil na ang kakapoy, kabalaka, ug kaguol.

GIMAHAL GYOD NI JESUS ANG MGA TAWO

6. Unsay atong makat-onan sa tagna ni Isaias bahin sa pagkamaluluy-on ni Jesus? (Isaias 42:3)

⁶ Sa iyang ministeryo, gipakita ni Jesus ang iyang pagkamaluluy-on niadtong mga gipangdaogdaog. Pinaagi niana, iyang gituman ang tagna ni Isaias. Sa Hebreohanong Kasulatan, ang mga tawo nga dato ug maayog kahimtang gipakasama sa garden nga giatiman pag-ayo o sa mga kahoy nga dagko ug lig-on. (Sal. 92:12; Isa. 61:3; Jer. 31:12) Pero ang mga pobre ug makaluluoy gipakasama sa buak nga tangbo ug sa nagkaawop nga pabilo nga wala kaayoy pulos. (Basaha ang Isaias 42:3; Mat. 12:20) Pinaagi sa paggiya ni Jehova, gitagna ni propetang Isaias nga si Jesus magpakitag gugma ug kaluoy ngadto sa mga tawo nga giisip sa uban nga walay pulos.

7-8. Sa unsang paagi gituman ni Jesus ang tagna ni Isaias?

⁷ Gipakita sa magsusulat sa Ebanghelyo nga si Mateo nga gituman ni Jesus ang tagna ni Isaias: “Dili niya balion ang nabawog nga tangbo, ug dili niya palongon ang nagkaawop nga pabilo.” Kadaghanan sa mga milagro ni Jesus nakahatag ug kaayohan niadtong mga tawo nga gidaogdaog o mibating walay paglaom. Pananglitan, sa panahon ni Jesus, dihay usa ka tawo nga punog sanla. Seguradong mibati siya nga wala na siyay paglaom nga maulian o makauban pa ang iyang pamilya ug mga higala. (Luc. 5:​12, 13) Imadyina pod kon unsay gibati niadtong tawo nga bungol ug maglisod ug sulti dihang makita niya ang uban nga lingaw kaayong mag-estoryahanay pero wala siyay madunggan. (Mar. 7:​32, 33) Pero dili lang kana.

⁸ Sa panahon ni Jesus, daghang Hudiyo ang nagtuo nga kon ang usa masakiton o naay depekto sa lawas, tungod kana kay gisilotan siya sa iyang mga sala o sa mga sala sa iyang mga ginikanan. (Juan 9:2) Tungod niining sayop nga pagtulon-an, kadtong mga masakiton ug naay depekto sa lawas sagad ginadaogdaog sa uban ug giisip nga walay pulos. Pero ingong katumanan sa tagna ni Isaias, giayo sila ni Jesus ug gipahinumdoman nga wala sila pasagdi sa Diyos. Unsay atong makat-onan niini bahin kang Jesus?

9. Sa unsang paagi gipakita sa Hebreohanon 4:​15, 16 nga ang atong langitnong Hataas nga Saserdote nakasabot gyod sa gibati sa dili hingpit nga mga tawo?

⁹ Basaha ang Hebreohanon 4:​15, 16. Makaseguro gyod ta nga si Jesus maluluy-on ug makasabot sa atong gibati. Magpakita siyag simpatiya sa atong mga pag-antos. Niini nga teksto, ang Gregong pulong nga gihubad ug “makasabot” naghatag ug ideya nga bation ni Jesus ang atong kasakit ug kaguol. Ang mga milagro ni Jesus nagpakita nga nasakitan siya pag-ayo sa pag-antos sa katawhan. Giayo niya ang mga tawo dili tungod kay mibati siya nga iya ning obligasyon, kondili kay gimahal niya ang mga tawo ug gusto gyod siyang motabang nila. Pananglitan, dihang iyang giayo ang tawong sanlahon, puwede ra man unta niyang himoon kana sa layo. Pero napalihok si Jesus nga hikapon siya. Posible nga ang maong tawo daghang tuig nang gisanla, ug tingali mao to ang unang higayon nga naay mihikap niyag balik. Si Jesus nagpakita pod ug konsiderasyon sa tawong bungol dihang iya siyang gidala palayo ug giayo nga walay tawo sa palibot. Hunahunaa pod ang mahinulsolong babaye nga naghugas sa tiil ni Jesus pinaagi sa iyang mga luha ug nagpahid niini pinaagi sa iyang buhok. Nasuko ang usa ka Pariseo sa maong babaye, pero gidepensahan siya ni Jesus. (Mat. 8:3; Mar. 7:33; Luc. 7:44) Makita nato nga wala gyod likayi ni Jesus kadtong mga tawo nga naay sakit o mga makasasala. Hinuon, iya silang gidapit nga moduol niya ug gipasaligan nga gihigugma niya sila. Makasalig gyod ta nga ingon ana pod ka maluluy-on ug ka mahigugmaon si Jesus nato.

KON GIUNSA NATO PAGSUNDOG ANG ATONG HATAAS NGA SASERDOTE

10. Unsang espirituwal nga mga tagana ang atong magamit sa pagtabang sa mga amang ug buta? (Tan-awa sab ang mga hulagway.)

¹⁰ Ingong matinumanong mga sumusunod ni Jesus, maningkamot ta nga sundogon siya sa pagpakitag gugma, inigsoong pagmahal, ug kaluoy. (1Ped. 2:21; 3:8) Dili nato kayang ayohon ang mga amang ug buta, pero matabangan nato sila sa espirituwal nga paagi. Pananglitan, ang binase sa Bibliya nga mga publikasyon gihubad na sa kapig 100 ka pinulongan diha sa sign language. Ug aron makabenepisyo pod ang mga buta o kadtong dili kaayo makakita, naa pod tay mga braille nga publikasyon nga mabatonan sa kapig 60 ka pinulongan, ug mga audio description sa atong mga video diha sa kapig 100 ka pinulongan. Kini nga mga tagana nakatabang gyod sa mga amang ug buta nga masuod kang Jehova ug sa iyang Anak.

11. Giunsa pagsundog sa organisasyon ni Jehova ang pagkamaluluy-on ni Jesus sa tanang tawo? (Buhat 2:​5-7, 33) (Tan-awa sab ang mga hulagway.)

¹¹ Ang organisasyon ni Jehova naningkamot gyod nga matabangan ang tanang tawo. Human sa pagkabanhaw ni Jesus, iyang gibubo ang balaang espiritu sa tanang nagtigom panahon sa pista sa Pentekostes aron nga ang matag usa makadungog sa maayong balita diha sa “iyang pinulongan.” (Basaha ang Buhat 2:​5-7, 33.) Pinaagi sa paggiya ni Jesus, ang atong organisasyon nagtaganag binase sa Bibliya nga mga publikasyon sa kapig 1,000 ka pinulongan. Ang uban niini nga mga pinulongan gamay rag naggamit. Pananglitan, ang Amerindian nga mga pinulongan gigamit lang sa gamayng populasyon didto sa North ug South America. Pero ang atong mga publikasyon gihubad sa kapig 160 ka Amerindian nga pinulongan aron daghang tawo kutob sa mahimo ang makakat-on sa maayong balita. Ang atong mga publikasyon gihubad pod sa kapig 20 ka Romany nga mga pinulongan. Libolibo na ka tawo nga nagsulti niana nga mga pinulongan ang midawat sa kamatuoran.

12. Unsang praktikal nga tabang ang gitagana sa organisasyon ni Jehova?

¹² Gawas pa sa pagtabang sa mga tawo nga makakat-on sa maayong balita, ang organisasyon ni Jehova nagtabang pod sa mga biktima sa kalamidad. Libolibo ka igsoon ang moboluntaryo sa pagtabang sa mga igsoon nga naapektohan. Ang organisasyon nagtagana pod ug simpleng mga tigomanan aron ang mga tawo makakat-on kon unsa ka mahigugmaon ang Diyos.

ANG ATONG HATAAS NGA SASERDOTE MOTABANG NIMO

13. Sa unsang paagi ginatabangan ta ni Jesus karon?

¹³ Ingong atong maayong magbalantay, gitagana ni Jesus ang espirituwal nga panginahanglan sa matag usa nato. (Juan 10:14; Efe. 4:7) Usahay, mobati tingali ta nga mora tag hapit nang maawop nga pabilo o buak nga tangbo. Maguol tingali ta tungod kay naa tay grabeng sakit, nakahimo tag sala, o nadaot ang atong relasyon sa usa ka igsoon. Basin grabe kaayo ang atong gibati nga kasakit, maong dili na ta makapokus sa atong paglaom sa umaabot. Pero hinumdomi nga nakita ug nasabtan gyod ni Jesus kon unsa gyoy imong gihunahuna o gibati. Ang kaluoy ni Jesus mopalihok niya nga tabangan ka. Pananglitan, gamiton niya ang balaang espiritu aron palig-onon ka dihang luya ka. (Juan 16:7; Tito 3:6) Gamiton pod ni Jesus ang “gasa nga mga lalaki” ug ang ubang igsoon aron dasigon, palig-onon, ug tabangan ka.—Efe. 4:8.

14. Unsay puwede natong himoon kon maguol ta?

¹⁴ Kon maguol o maluya ta, pamalandongon nato kon unsay ginahimo ni Jesus ingong atong Hataas nga Saserdote. Atong hinumdoman nga gipadala ni Jehova si Jesus dinhi sa yuta dili lang aron lukaton ta, kondili aron tabangan pod siya nga mas masabtan ang mga problema nga giatubang sa dili hingpit nga mga tawo. Kon maguol ta tungod sa atong mga sala o kahuyangan, si Jesus andam kaayong motabang nato dihang ato ning gikinahanglan.—Heb. 4:​15, 16.

15. Unsay nakatabang sa usa ka brader nga makabalik sa kongregasyon?

¹⁵ Gigiyahan pod ni Jesus ang iyang mga sumusunod nga pangitaon ug tabangan kadtong nasaag nga mga karnero ni Jehova. (Mat. 18:​12, 13) Konsideraha ang eksperyensiya ni Stefano,b kinsa natangtang sa kongregasyon. Human sa 12 ka tuig, midesisyon siya nga motambong ug tigom. Siya miingon: “Dili to sayon, pero gusto kong mobalik sa mahigugmaong pamilya ni Jehova. . . . Ang mga ansiyano nga nakig-estorya nako buotan kaayo, ug ilang gipabati nako nga nalipay sila nga mitambong ko pag-usab. Pero usahay, tungod sa akong pagkakonsensiya, maluya ko ug maghunahuna nga dili na lang mobalik kang Jehova. Pero gipahinumdoman ko sa mga ansiyano nga gusto ni Jehova ug Jesus nga mobalik ko. Dihang nakabalik ko, ang tibuok kongregasyon mahigugmaong midawat nako ug sa akong pamilya. Ang akong asawa nagpa-Bible study, ug karon nag-alagad ko kang Jehova uban sa akong pamilya.” Malipay gyod ang atong mahigugmaong Hataas nga Saserdote dihang makita niya nga ang mga mahinulsolon matabangan nga makabalik sa kongregasyon.

16. Nganong mapasalamaton kaayo ta nga naa tay maluluy-ong Hataas nga Saserdote?

¹⁶ Sa dinhi pa si Jesus sa yuta, daghan kaayo siyag gitabangan nga mga tawo. Karon, makasalig gyod ta nga andam siyang motabang nato dihang manginahanglan tag tabang. Ug sa bag-ong kalibotan nga hapit nang moabot, iyang tabangan ang masinugtanong mga tawo nga mahigawas sa tanang epekto sa sala ug pagkadili-hingpit. Mapasalamaton gyod kaayo ta sa gugma ug kaluoy sa atong Diyos nga si Jehova, kinsa nagpili sa iyang Anak nga mahimong atong maluluy-ong Hataas nga Saserdote!