Gimahal Ka Pag-ayo ni Jehova

1-2. Unsay makatabang nato nga makita nga importante ta kang Jehova?

IMPORTANTE kaayo kang Jehova ang iyang mga alagad. Pero makapaguol kay naa gihapoy uban nila nga ubos ug panglantaw sa kaugalingon, tingali kay nakasulay sila nga gipakaubos sila sa mga tawo. Mao ba nay imong naeksperyensiyahan? Kon mao, unsay makatabang nimo nga makita nga importante ka kang Jehova?

² Basin makatabang nimo ang pagbasa ug pagpamalandong sa mga estorya sa Bibliya nga nagpakita kon unsay panglantaw ni Jehova sa mga tawo. Ang iyang Anak, si Jesus, nagtahod sa mga tawo ug nagtratar nila nga may dignidad. Pinaagi ana, gipakita ni Jesus nga importante kaayo para niya ug sa iyang Amahan kadtong mga tawo nga giisip sa uban nga ubos ug walay pulos. (Juan 5:19; Heb. 1:3) Niining artikuloha, atong hisgotan (1) kon sa unsang paagi gitabangan ni Jesus ang mga tawo nga makita nga gimahal sila ni Jehova ug (2) kon sa unsang paagi makombinsir nato ang atong kaugalingon nga bililhon ta sa Diyos.—Hag. 2:7.

KON GIUNSA PAGTABANG NI JESUS ANG MGA TAWO NGA MAKITA NGA BILILHON SILA

3. Giunsa pagtratar ni Jesus ang mga Galileanhon nga nangayog tabang niya?

³ Dihang nagsangyaw si Jesus sa Galilea, daghang tawo ang nangadto kaniya aron maminaw ug maulian sila sa ilang mga sakit. Nakita ni Jesus nga “sila pinanitan ug nagkatibulaag samag mga karnero nga walay magbalantay.” (Mat. 9:36; tan-awa ang mga study note.) Ang ilang relihiyosong mga lider walay pagpakabana nila ug nag-isip pa gani nila nga “tinunglo nga katawhan.” (Juan 7:​47-49; study note) Pero gipakitaan sila ni Jesus ug dignidad kay migahin siyag panahon nga tudloan sila ug ayohon ang ilang mga sakit. (Mat. 9:35) Ug aron mas daghan ang matabangan, gibansay niya ang iyang mga tinun-an sa pagsangyaw ug gihatagan silag awtoridad sa pag-ayog mga sakit.—Mat. 10:​5-8.

4. Unsay atong makat-onan kang Jesus sa iyang pagtratar sa mga tawo nga giisip sa uban nga ubos?

⁴ Buotan kaayo si Jesus sa mga tawo, ug iya silang gitratar nga may dignidad. Pinaagi ana, gipakita ni Jesus nga importante para niya ug sa iyang Amahan kadtong mga tawo nga giisip sa uban nga ubos ug walay pulos. Kon nag-alagad ka kang Jehova pero nagduhaduha ka kon importante ba ka niya, hunahunaa kon giunsa pagtratar ni Jesus ang ubos ug makaluluoy nga mga tawo nga gustong mokat-on gikan niya. Makatabang na nimo nga makita nga gimahal gyod ka ni Jehova.

5. Unsay kahimtang sa babaye nga miduol kang Jesus didto sa Galilea?

⁵ Gawas nga nanudlo si Jesus sa daghang tawo, gihatagan pod niyag atensiyon ang mga indibiduwal. Pananglitan, panahon sa iyang ministeryo sa Galilea, naay babaye nga gitalinug-an sulod na sa 12 ka tuig. (Mar. 5:25) Tungod sa iyang sakit, giisip siyang hugaw ubos sa Balaod, ug si bisan kinsa nga mohikap niya mahimo pong hugaw. Busa seguradong nalimitahan gyod ang iyang pagpakig-uban sa mga tawo. Dili pod siya puwedeng makig-uban nila sa pagsimba kang Jehova diha sa sinagoga ug panahon sa mga pista. (Lev. 15:​19, 25) Maong gawas nga nag-antos siya sa iyang sakit, posible nga mibati pod siyang walay pulos ug walay nagmahal niya.—Mar. 5:26.

6. Sa unsang paagi naayo ang babaye nga gitalinug-an?

⁶ Gusto sa babaye nga ayohon siya ni Jesus, pero wala siya direktang miduol ug mihangyo kang Jesus. Ngano? Tingali naulaw siya tungod sa iyang sakit. O kaha nahadlok siya nga masuko si Jesus kay misagol siya sa daghang tawo bisag hugaw siya. Maong igo ra niyang gihikap ang besti ni Jesus, kay dako siyag pagtuo nga ang paghimo ana makaayo niya. (Mar. 5:​27, 28) Gipanalanginan gyod ang iyang pagtuo kay naulian siya. Dayon nangutana si Jesus kon kinsay mihikap niya, ug mitug-an ang babaye. Giunsa siya pagtratar ni Jesus?

7. Giunsa pagtratar ni Jesus ang nahadlok nga babaye? (Marcos 5:34)

⁷ Gipakitaan ni Jesus ug kaayo ug pagtahod ang babaye. Iyang nakita nga ang babaye “nagkurog sa kahadlok.” (Mar. 5:33) Tungod ana, nagpakita siyag konsiderasyon ug buotan siyang nakig-estorya niya. Iya pa gani siyang gitawag nga “anak.” Pinaagi sa paggamit ani nga pulong, gipakita ni Jesus dili lang ang iyang pagtahod, kondili ang iya pong kaayo ug gugma. (Basaha ang Marcos 5:34.) Ang study note bahin ani nga pulong nag-ingon nga “mao ra ni ang rekord diha sa Bibliya diin direktang gitawag ni Jesus ang usa ka babaye ingong ‘anak,’ tingali kay nakita ni Jesus nga nahadlok kaayo siya.” Seguradong nahupayan gyod ang babaye! Imadyina kon unsa kahay nahitabo kon nasuko si Jesus niya. Tingali maulian siya sa iyang sakit, pero basig makonsensiya kaayo siya kay iyang gihikap ang besti ni Jesus ug misagol siya sa mga tawo. Pero dili kana ang gihimo ni Jesus. Hinuon buotan siyang nakig-estorya sa babaye, ug iyang gipabati kaniya nga pinangga siya sa iyang langitnong Amahan.

8. Unsang mga kalisdanan ang naeksperyensiyahan sa usa ka sister nga taga-Brazil?

⁸ Karon, naay mga alagad ni Jehova nga nag-antos sa sakit o depekto sa lawas, maong ubos silag panglantaw sa ilang kaugalingon. Si Maria,a regular payunir nga taga-Brazil, natawo nga pungkol ang kamot ug walay mga paa. Siya miingon: “Pirme kong ma-bully sa eskuwelahan tungod sa akong depekto. Sakit kaayo kay bisag unsa na lay ilang giangga nako. Bisan gani ang akong pamilya dili maayog pagtratar nako.”

9. Unsay nakatabang kang Maria nga makita nga bililhon siya kang Jehova?

⁹ Sa unsang paagi natabangan si Maria? Dihang nahimo siyang Saksi ni Jehova, gihupay siya sa mga igsoon. Ila siyang gitabangan nga isipon ang iyang kaugalingon sama sa pag-isip ni Jehova kaniya. Siya miingon: “Kon akong ilista ang tanang igsoon nga mitabang nako, dili gyod paigo ang ilang mga ngalan sa akong notebook. Mapasalamaton kaayo ko kang Jehova kay iya kong gihatagan ug mahigugmaong espirituwal nga pamilya.” Ang mga igsoon nakatabang kang Maria nga makita nga gimahal ug gipabilhan siya ni Jehova.

10. Unsay giantos ni Maria Magdalena, ug unsa tingali ang iyang gibati tungod ana? (Tan-awa sab ang mga hulagway.)

¹⁰ Konsideraha kon giunsa pagtabang ni Jesus ang usa pa ka babaye, si Maria Magdalena. Si Maria gisudlan ug pito ka demonyo. (Luc. 8:2) Kay gidemonyohan, dili gyod normal ang iyang linihokan ug inestoryahan, maong gilikayan siya sa mga tawo. Grabe gyod ang iyang pag-antos niadtong panahona. Seguradong mibati siya nga walay nagtagad o nagmahal niya ug nga wala nay paglaom ang iyang kahimtang. Pero gipagula ni Jesus ang mga demonyo nga nagpaantos niya, ug nahimo siyang maunongong tinun-an ni Jesus. Unsa pay laing paagi nga gitabangan ni Jesus si Maria Magdalena nga makita nga importante siya sa Diyos?

11. Unsa pay laing gihimo ni Jesus aron makita ni Maria Magdalena nga importante siya sa Diyos? (Tan-awa sab ang mga hulagway.)

¹¹ Gidapit ni Jesus si Maria Magdalena nga mouban niya panahon sa iyang pagsangyaw.b Tungod ana, nakabenepisyo si Maria sa pagpaminaw sa mga gitudlo ni Jesus. Nagpakita pod si Jesus kaniya sa mismong adlaw nga nabanhaw siya. Si Maria Magdalena ang usa sa pinakaunang mga tinun-an nga iyang naestorya nianang adlawa. Iya pa ganing gisugo si Maria nga sultihan ang mga apostoles nga nabanhaw na siya. Pamatuod gyod ni nga importante si Maria kang Jehova.—Juan 20:​11-18.

12. Nganong mibati si Lidia nga walay nagmahal niya?

¹² Sama tingali sa gibati ni Maria Magdalena, daghan karon ang naghunahuna nga walay nagmahal nila. Si Lidia, sister nga taga-Spain, miingon nga sa wala pa siya matawo, ang iyang mama nagplano nga ipa-abort siya. Nahinumdom si Lidia nga bisan sa bata pa siya, pasagdan ra siya sa iyang mama ug pirme siyang sultihag sakit. Siya miingon: “Pangandoy gyod nako nga dawaton ug higugmaon ko sa uban. Kay wala man ko gipakitaan ni Mama ug gugma, abi nakog dili ko maayo nga tawo ug nga dili ko angayng higugmaon.”

13. Unsay nakatabang kang Lidia nga makita nga gimahal siya ni Jehova?

¹³ Nabag-o ang tanan dihang nakakat-on si Lidia sa kamatuoran. Ang pag-ampo kang Jehova, pagtuon sa Bibliya, ug ang pagdasig nga iyang nadawat gikan sa mga igsoon nakatabang niyang makita nga gimahal siya ni Jehova. Siya miingon: “Pirme kong ingnan sa akong bana nga pinangga kaayo ko niya. Pirme pod ko niyang pahinumdoman sa akong maayong mga hiyas. Dako pog tabang ang mga igsoon kay ilang gipabati nako nga gimahal ko nila.” Naa ba kay mahunahunaang igsoon nga puwede nimong tabangan aron iyang makita nga gimahal siya ni Jehova?

ISIPA ANG IMONG KAUGALINGON SAMA SA PAG-ISIP NI JEHOVA KANIMO

14. Base sa 1 Samuel 16:​7, unsay panglantaw ni Jehova sa mga tawo? (Tan-awa sab ang kahong “Nganong Gipabilhan ni Jehova ang Iyang mga Alagad?”)

¹⁴ Hinumdomi nga ang panglantaw ni Jehova kanimo lahi kaayo kon itandi sa panglantaw sa kalibotan. (Basaha ang 1 Samuel 16:7.) Ang imong bili para niya wala magdepende sa imong hitsura, kahimtang sa kinabuhi, o edukasyon. (Isa. 55:​8, 9) Maong isipa ang imong kaugalingon base sa panglantaw ni Jehova kanimo, dili sa kon unsay panglantaw sa kalibotan. Puwede pod nimong konsiderahon ang kasinatian sa mga alagad ni Jehova nga nagduhaduha kon bililhon ba gyod sila, sama kang Elias, Noemi, ug Ana. Dihang basahon nimo ang ilang eksperyensiya, makita nimo nga gimahal gyod sila ni Jehova. Puwede pod nimong isulat ang imo mismong mga naeksperyensiyahan nga nagpakita nga gimahal ug gipabilhan gyod ka ni Jehova. Makatabang pod nimo ang pag-research sa atong mga publikasyon bahin sa kon unsa ka ka bililhon kang Jehova.c

15. Nganong gimahal pag-ayo ni Jehova si Daniel? (Daniel 9:23)

¹⁵ Hinumdomi nga gimahal ka ni Jehova kay matinumanon ka. Dihay higayon nga si propetang Daniel mibatig grabeng kaluya ug kaguol. Tingali kapig 90 na ang iyang edad niadtong panahona. (Dan. 9:​20, 21) Giunsa siya pagdasig ni Jehova? Gipadala ni Jehova ang anghel nga si Gabriel aron pahinumdoman si Daniel nga siya “tawong gimahal pag-ayo” ug nga gidungog ni Jehova ang iyang mga pag-ampo. (Basaha ang Daniel 9:23.) Nganong gimahal pag-ayo ni Jehova si Daniel? Tungod kay daghan kaayo siyag nindot nga mga hiyas, sama sa iyang gugma sa pagkamatarong ug sa iyang pagkamatinumanon. (Ezeq. 14:14) Gipasulat ni Jehova diha sa Bibliya kini nga asoy aron hupayon ta. (Roma 15:4) Maminaw pod si Jehova sa imong mga pag-ampo, ug gipabilhan ka niya tungod sa imong gugma sa pagkamatarong ug sa imong pagkamatinumanon.—Miq. 6:​8, mga footnote; Heb. 6:10.

16. Unsay makatabang nimo nga isipon si Jehova ingong imong mahigugmaong Amahan?

¹⁶ Isipa si Jehova ingong imong Amahan nga nagmahal nimo. Gusto ka niyang tabangan, ug dili siya mangitag sayop nimo. (Sal. 130:3; Mat. 7:11; Luc. 12:​6, 7) Ang pagpamalandong niana nakatabang sa mga tawo nga ubos ug panglantaw sa ilang kaugalingon. Pananglitan, ang sister nga si Michelle nga taga-Spain daghang tuig nga nag-antos kay pirme siyang pakaulawan ug sultihag sakit sa iyang bana. Tungod ana, mibati siyang walay pulos ug wala higugmaa. Siya miingon, “Dihang mobati ko nga walay pulos, gina-imagine nako si Jehova nga mahigugmaong nagsapnay nako ug nanalipod nako.” (Sal. 28:9) Si Lauren, sister nga taga-South Africa, miingon, “Akong pahinumdoman ang akong kaugalingon nga mahigugmaon kong gikabig ni Jehova, gitabangan nga masuod niya sulod na sa daghang tuig, ug gigamit pa gani ko niya sa pagtudlo sa uban. Maong segurado ko nga bililhon ug mapuslanon ko para niya.”—Os. 11:4.

17. Unsay makatabang nimo nga makombinsir nga giuyonan ka ni Jehova? (Salmo 5:12) (Tan-awa sab ang hulagway.)

¹⁷ Kombinsiha ang imong kaugalingon nga giuyonan ka ni Jehova. (Basaha ang Salmo 5:12.) Si David miingon nga ang pag-uyon ni Jehova samag “dakong taming” nga manalipod sa matarong nga mga tawo. Ang pagkahibalo nga giuyonan ug ginatabangan ka ni Jehova manalipod nimo aron dili ka madaog sa negatibong mga pagbati. Unsaon nimo pagkahibalo nga giuyonan ka ni Jehova? Sa ato nang nahisgotan, gipasaligan ka ni Jehova pinaagi sa iyang Pulong. Dugang pa, iyang gigamit ang mga ansiyano, mga igsoon, ug ang uban aron pahinumdoman ka nga gimahal ka ni Jehova. Busa unsay imong himoon kon makadawat ka niana nga mga pagdasig?

18. Nganong maayo nga imong dawaton ang mga komendasyon gikan sa uban?

¹⁸ Kon makadawat kag sinserong komendasyon gikan sa mga tawo nga nakaila ug nagmahal nimo, ayaw nag balewalaa. Hinumdomi nga basin gigamit sila ni Jehova aron imong bation ang iyang pag-uyon. Si Michelle nga gihisgotan ganiha miingon: “Sa una, dili ko motuo dihang komendahan ko sa uban. Pero karon, anam-anam kong nakakat-on nga dawaton ang ilang sinserong komendasyon. Nahibalo ko nga mao nay gusto ni Jehova nga akong himoon.” Nakabenepisyo pod si Michelle sa mahigugmaong paningkamot sa mga ansiyano, ug karon nag-alagad na siya ingong payunir ug remote volunteer sa Bethel.

19. Nganong makaseguro ka nga gimahal ka ni Jehova?

¹⁹ Mahigugmaon tang gipahinumdoman ni Jesus nga importante kaayo ta sa atong langitnong Amahan. (Luc. 12:24) Makaseguro gyod ta nga gipabilhan ug gimahal gyod ta ni Jehova. Maong hinaot nga dili nato ni kalimtan, ug hinaot maningkamot ta sa pagtabang sa uban aron ilang makita nga gimahal sila pag-ayo sa Diyos!