Iei Usun Án Ewe Ménúkol Moses A Manaw

NENGENI ena kúkkún ménúkol mi kekkechiw me kamwéch aútún ena fefin. Ina i Moses. Ka silei ié ena fefin mi liéch? I emén finesamolun Isip, néún Farao we fépwúl. Nge, ifa usun Moses a nóm ren ena finesamolun Isip? Sipwe ppii.

Inen Moses we a aopa néún na tori a úlúngát maraman, pún ese mochen an epwe ninniiló ren ekkewe chón Isip. Nge a silei pwe eli eú rán repwe kúna Moses, ina minne, a féri ei mettóch pwe ewe ménúkol esap máló.

A angei eú pasikit, iwe a féri pwe esap nichilóng konik lón. Mwirin a waalong Moses lón, iwe a anómu ewe pasikit lein ekkewe fetil mi ttam lepekin ewe chénúpupu Nil. A ereni fefinen Moses we, Miriam, pwe epwe úkkúútá ekis towau seni me ppii met epwe fis.

Ekiseló chék, néún Farao we fépwúl a feitiw ngeni ewe chénúpupu Nil pwe epwe tútú. A kúna ewe pasikit lein ekkewe fetil mi ttam. A ké ngeni emén lein néún kewe chón angang fépwúl: ‘Kolo wato enan pasikit.’ Lupwen ewe finesamol a suuki ewe pasikit, a ifa me átéchún ewe ménúkol a kúna me lón! Ewe ménúkol Moses a kechiw, iwe ewe finesamol a kan tongei. Ese mochen ewe ménúkol epwe ninniiló.

Lón ena atun, Miriam a pwereto. En mi tongeni kúna lón ei lios. Miriam a eisini néún Farao we fépwúl: ‘Ka mochen ai upwe ló kéri emén fin Israel pwe epwe oupwu ewe ménúkol fán itom?’

Ewe finesamol a apasa: ‘Kese mochen.’

Iwe, Miriam a mwittir ssá pwe epwe ló ereni inan we. Lupwen inen Moses we a feito ren ewe finesamol, ewe finesamol a apasa: ‘Angei ei ménúkol me pwal oupwu, iwe upwe niwinuk.’

Iwe, inen Moses we a túmúnú pwisin néún we. Mwirin, lupwen Moses a wattetá, a waló ren néún Farao we fépwúl, iwe neminnewe a mwuuti. A ina usun án Moses mááritá lón imwen Farao we.