Popun Án Moses Sú

NENGENI Moses an ei a sú seni Isip. En mi kúna ekkena mwán ra chei? Ka silei pwata ra mochen nieló Moses? Sipwe ppii ika sipwe tongeni kúna ewe popun.

Moses a mááritá lón imwen Farao we, ewe kingen Isip. A mááritá ngeni emén mwán mi fókkun tipachem me iteféúló. Moses a silei pwe esap i chón Isip, nge wesewesen inan me seman, iir chón Israel, chón angang.

Eú rán atun a tori 40 ierin Moses, a ekiekin ló ppii ika ifa usun chón fénúan we. A kúna pwe ra fókkun riáfféú. A kúna án emén chón Isip awata emén chón Israel chón angang. Moses a nennefetál, iwe lupwen a kúna pwe esor a nengeni, a opuni ewe chón Isip, iwe ewe chón Isip a máló. Mwirin, Moses a aopa inisin we lón ewe ppi.

Sorotáán, Moses a pwal towu pwe epwe ló ppii chón fénúan we. A ekieki pwe epwe tongeni álisiir fán iten ar resap chúen chón angang. Nge a kúna án rúúemén re Israel fiffiu, ina popun, a ereni ewe minne ká tipisin: ‘Pwata ka awata pwiom na?’

Ewe mwán a apasa: ‘Itá ién a seikuketá pwe ám sou nemenem me sou kapwúng? Kopwe itá nieiló usun óm we nieló ewe chón Isip?’

Iwe iei, Moses a niwokkus. A silei pwe aramas ra fen silei usun met a féri ngeni ewe chón Isip. Pwal mwo nge Farao a rong usun, iwe, a tiinaaló ekkóch mwán pwe repwe nieló Moses. Ina ewe popun Moses a sú seni Isip.

Lupwen Moses a sú seni Isip, a ló ngeni ewe fénúen Mitian mi towau. Me ikkena ie a chuuri án Setiro we famili, iwe a pwúlúweni emén me lein néún kewe fépwúl, itan Sipora. Moses a wiliti emén chón masen siip, iwe a túmúnú néún Setiro kewe siip. Ren úkúkún 40 ier a nónnóm lón ewe fénú Mitian. Iwe iei, a tori 80 ierin. Iwe lón eú rán, lupwen Moses a túmúnú néún Setiro kewe siip, eú mettóch mi amwarar a fis, nge ena mettóch a siwili unusen manawen Moses. Suuk ngeni ena eché, iwe sipwe ppii ika ifa ewe mettóch mi amwarar.