Met Weween Än Kot We Mwu?

IFA itelapen än Jises afalafal? Me ren Jises pwisin, ina än Kot we Mwu. (Luk 4:43) Atun aramas ra aüseling ngeni än afalafal, fän chommong, ra rongorong pworausen ewe Mwu. Ra osukosuk ren? Ra itä eisini met ena ewe Mwu? Aapw. Esor kapas eis ussun lon ekkewe rüänü puken Kapas Allim. Iwe, än Kot we Mwu mi iteföülo me ren ekkena aramas?

Ren enletin, ewe Paipel ekkewe chon Jus loom ra süföliti pwe mi fel me rer a aweweei ena Mwu me pwäralo weweöchün meta ena Mwu me met epwe föri. Ikenäi sipwe tongeni alapalo ach käeö ussun Mwuun Kot ussun chök än ekkewe chon Jus käeö, ren ach nöünöü ewe Paipel. Sipwe etittina fisu mettoch mi enlet ewe Paipel a asukulakich ussun ewe Mwu. Ekkewe ülüngät akkom a kawor ngeni ekkewe chon Jus lon fansoun Jises we me pwal me mwen ränin Jises we. Ekkewe ülüngät mwirin ra pwälo ren Kraist are ren nöün kewe aposel lon ewe äeüin senturi. Ewe eü säingo a ffatelo lon ach ei fansoun.

1. Än Kot we Mwu, ina wesewesen eü nemenem, iwe, epwe nonnom tori feilfeilo chök. Än ewe Paipel äeüin oesini a pwäratä pwe Kot epwe tinato emön chon seläni ekkewe aramas mi tuppwöl. A iteni ewe “mwirimwir,” iwe, iei I ewe emön epwe försefälli ekkewe mettoch mi ngaü ra poputä ren ewe föfförün ü ngeni än Atam, If, me Setan. (Keneses 3:15) Lo, lo, lo emön a ereni ewe mi tuppwöl King Tafit eü mettoch mi amwarar ussun ei “mwirimwir,” are Messaia. Ätewe epwe Kingen eü Mwu. Ei mwu epwe sokko seni meinisin ekkewe ekkoch mwu. Epwe nonnom feilfeilo chök.​—2 Samuel 7:12-14.

2. Än Kot we Mwu epwele asopwalo meinisin ekkewe mwuun aramas. Lon künaen ewe soufos Taniel a küna eü längipwi ussun tettelin ekkewe mwuun fönüfan seni loom feffeito tori ach ei fansoun. Nengeni amwararen le sopwoloon ena längipwi: “Iwe, lon fansoun mwün ekewe [säingonoon aramas mi wisen] king, ewe Koten läng epwe aüetä eu mwü esap tongeni tala, esap pwal wor eu mwü epwe tongeni akufu. Iwe, ei mwü epwe ataela o arosala ekewe lusun mwü, nge epwe püsin nom tori feilfeilachök.” Iwe, meinisin ekkewe mwu, are nemenemen ei fönüfan fitifengen me ar kewe maun, kirikiringaü, me pwüngüngaü repwele morolo feilfeilo. Ussun än Taniel we oesini a pwäratä, ekiselo chök, än Kot we Mwu epwele nemenalo unusen fönüfan. (Taniel 2:44, 45) Iei wesewesen eü Mwu, nge esap wor pwal eü mwu epwe nennemenem.a

3. Än Kot we Mwu epwele awesalo maun, semmwen, lengita, pwal mälo. Amwararen än Paipel kewe oesini a pwäralo met än Kot we Mwu epwe föri ikeei ie woon fönüfan. Ena nemenem epwe föri met ekkewe nemenemen aramas rese tongeni föri me loom, resap pwal tongeni föri lon mwachkkan. Anchangei mwo atun pisekin maun meinisin repwe talo feilfeilo! “A aukatiu ekkewe maun ekis meinisin won fonufan.” (Kölfel 46:9) Esap chüen wor tokter, pioing, are sokkopaten samau. “Esap wor eman chon ewe fanü epwe apasa: ‘Üa samau.’” (Aisea 33:24) Esap wor lengita, osupwangen möngö, nafangaüen ekkewe minen apöchökkül lon möngö, are mään echik. “Sokkun mongo mi chommong epwe nonnom lon ewe fonu.” (Kölfel 72:16) Esap chüen wor felin mei mä, aüchimw, leenien peias, leenien mei mä are ekkewe meinisin riäfföü mi feito seniir. Mälo, ewe chon okkoputakich, epwele morolo. Kot “epwe aükätiu mäla, pwe esap chüen wor tori feilfeilachök. Epwe talü chönün mas seni won mesen aramas meinisin.”​—Aisea 25:8.

4. A wor emön Sou Nemenemen Mwuun Kot mi filitä me ren Kot. Ewe Messaia ese seikatä pwisin i, ese pwal kefilitä me ren aramas rese unusöch. A pwisin kefilitä me ren Kot. Ekkeei itelap Messaia me Kraist ra pwäralo pwe a kefil me ren Kot. Iir me ruu ekkeei kapas ra wewe ngeni “Emön Mi Kepit.” Iwe, ei King a kepit, are angei ei it fän iten wisan mi fokkun aüchea me ren Jiowa. Kot a apasa ussun i: “Nengeni! Iei i nei we chon angang üa apöchöküla, nei üa afili, üa unusen pwapwa ren! Üa anomu Ngüni won. Nge i epwe awarato pwüng ngeni mwün fanüfan meinisin.” (Aisea 42:1; Mattu 12:17, 18) ) Iö epwe sileöch lap seni ewe Chon Föratä kefilin ewe sokkun Sou Nemenem sia osupwangan?

5. Ewe Sou Nemenemen än Kot we Mwu a affata aücheaan mwen mesen aramas meinisin. A letelo pwe Jises seni Nasaret ewe Messaia mi fen pwonetiu. A uputiu lon ewe tettelin famili Kot a filatä. (Keneses 22:18; 1 Kronika 17:11; Mattu 1:1) Lupwen a nom woon fönüfan, a apwönüetä chommong oesini ussun ewe Messaia, ekkewe ra fen makketiu fitepükü ier loom. A fen sillelo me läng pwe i ewe Messaia. Ifa ussun a fis ena? Kot a fosetiu seni läng, a affata pwe ina i Nöün we; ekkewe chonläng ra silleni Jises pwe i ewe Messaia mi fen pwonetiu, me Jises a föri manaman fän chommong mwen mesen fitepükü are fen fite ngeröü aramas, iwe, a ffat pwe a popu seni manamanen Kot.b Jises a pwäri fän chommong ika i met sokkun sou nemenem. Ese chök wor an manamanen älisi aramas nge a pwal wesewesen mochen älisiir. (Mattu 8:1-3) Jises a ekieki ekkewe ekkoch lap seni pwisin I, a tongei aramas, tipepwora, me tipetekison. Pworausen manauan woon fönüfan a nom lon ewe Paipel fän itach pwe sipwe älleäni.

6. Än Kot we Mwu a wor 144,000 sou nemenem repwe fiti Kraist. Jises a apasa pwe ekkoch, pachelong nöün kewe aposel, repwe eti i le nemenem lon läng. A eita ngeni ei mwich ewe “mwich kisikis.” (Luk 12:32) Mwirin, ewe aposel Jon a apasa pwe ei mwich kisikis iteiter 144,000. Epwe wor wiser mi fokkun aüchea lon läng. Repwe eti Kraist le nemenem lon ewe wis king me repwe föri angangen samol-fel.​—Pwarata 5:9, 10; 14:1, 3.

7. Än Kot we Mwu, mi nemenem lon läng iei, a mmolnetä an epwele popuetä ena nemenem woon unusen fönüfan. Ewe efisuen pworaus mi enlet, ina ewe mi kon ammeseik sipwe käeö. Ewe Paipel a ngenikich chommong pisekin ännet pwe Jises a fen angei an nemenemen King. Lon ach ei fansoun, a nennemenem ikewe ie, iwe, ekiselo chök, epwele chöülo an na nemenem woon unusen fönüfan me aunusalo ekkewe oesini mi fokkun amwarar sia fen kapas ussun me mwan.

[Footnotes]