A Fisitä Eü Tingor Woon Unusen Fönüfan
ANCHANGEI mwo itä fitepükü milion, ika fen fite bilion aramas, ra tingor eü chök mettoch. Ra kan tingorei ewe mi unusen tekia woon unuselapen läng me fönüfan, an epwe apwönüetä eü chök tingor mi titchik. Iwe nge, fokkun äkkäemön chök leir re weweiti wesewesen met ena ra tittingor ussun. Itä epwe tongeni fis ei sokkun? Ren enletin, mi fen fiffis iteiten rän. Met ena ekkeei aramas ra kan tingor? Warotoon ewe Mwuun Kot!
Me ren eü aükük, mi wor orun 37,000 lamalam ra erä pwe iir chon Kraist, ra lükü pwe Jises Kraist nöür Meilap. Mi wor lap seni ruu bilion chon ekkena lamalam. Chommong me leir ra eäni ewe iotek a iteni Semach are ewe Iotekin ach Samol. Ka silei ei iotek? Jises a äiti nöün kewe chon käeö, a iei ititin: “Semem mi nonnom lang, itom epwe fel, muom epwe feito, letipom epwe pwonueta, won fonufan usun chok lon lang.”—Mattu 6:9, 10.
Ren fite pükü ier iei, chon eäni ena iotek ra kan epinipini ekkena kapas lon ar fel. Ra mwo nge chechchemenalo ewe iotek lon ar kewe famili me pwal emön me emön lon fansoun mi öch are fansoun ese öch. Ra apasa ekkewe kapas ren enletin letiper me pwal mwo nge alolloonun meefier. Ekkoch ra käeö pwe repwe amwöchülükün ren ar chök ekkenniwili me äkkeäni iteitan, iwe nge, rese ekieki weween. Esap chök chon Kristentom ra äpilükülükü me ioteki warotoon ewe Mwuun Kot.
Ekkewe Lamalamen Lükün Ra Pwal Eäni Ena chök Tingor
Än chon Jus we iotek mi iteföülo, ina ewe iotek woon somä itan Kaddish. Inaamwo ika ese äkkäekis kapas ussun ekkewe mi mälo are letipechou, nge ra chök eöreni ar repwe chök apasa atun ar letipeta. Ewe iotek a erä: “Amwo i [Kot] epwe föratiu an we Mwu lon ränin manauom . . . nge esap mmang.” Pwal eü iotekin loom ra eäni lon ekkewe sinakok a kapas ussun ewe äpilükülükün ewe Mwuun Messaia seni lon imwen Tafit we.
Ekkoch chon lükün ra pwal mochen küna Mwuun Kot we. Me ren The Times of India (Pworausen India), emön sou nemenem mi iteföülo lon eü lamalamen India lon 1800 som a kütta ifa ussun chon Hindu, chon Muslim, me chon Kraist repwe tipeeüfengen woon ar lükü, a apasa: “Esap tongeni fisitä ewe Mwuun Kot mi enlet tori fansoun ekiekin aramas seni ewe epek fönüfan tori ewe epek repwe tipeeüfengen.” Iwe, emön meilapen ewe Islamic college lon Strathfield, Australia, a kerän mak ngeni eü simpung: “Ussun meinisin ekkewe Muslim, üa lükü pwe Jises epwe liwinsefäl me aüetä wesewesen ewe Mwuun Kot.”
Ese wor tipemwaramwar pwe a wor fite bilion aramas ra lükülük woon me tingor än Kot we Mwu. Nge ekieki ei pworaus mi amwarar.
Eli ka fen silei pwe äm Chon Pwäratä Jiowa, aua föri ei chassi, aua feilo imw me imw lon sopwum we pun aua mochen pwoppworausfengen me aramas ussun ewe Paipel. Tori fansoun an a mak ei pworaus, am aua föri ei angang woon unusen fönüfan, lon ükükün 236 fönü me lon lap seni 400 fosun fönüfan. Wesewesen itelapen äm angangen afalafal, ewe Mwuun Kot. Nengeni pwe unusen itelapen ei chassi Ewe Leenien Mas A Esilefeili än Jiowa we Mwu. Sia eisini aramas ika ra ioteki ewe Mwu. Chommong ra pölüeni ewer. Iwe nge, atun sia eis ika meta ewe Mwu, chommong repwe apasa, “Enen, use silei,” are ar pölüeni ese ffataffatöch.
Pwata chommong aramas ra tingor än Kot we Mwu inaamwo ika rese silei met ena? Epwe itä pokiten mi weires ach weweiti ewe Mwuun Kot? Aapw. Ewe Paipel a unusen aweweöchü ewe Mwuun Kot. Pwal eü, ewe pworaus lon ewe Paipel ussun ewe Mwu epwe wesewesen ngonuk äpilükülük allim lon ei fansoun rochopwak. Lon ewe lesen mwirin ei, sipwe küna ifa ussun ewe Paipel a aweweei ena äpilükülük.