Än Setan Nemenem Epwe Fokkun Sopwongaw
“Nge ekewe chon föföringau resap feiöch.”—SALAF. 8:13.
1. Pwata arapotoon kapwüngün ekkewe mi ngaw, ina eü minen auruur?
EKISELO chök, aramas mi ngaw repwele küna kapwüng me liwinin ar föfför. (SalF. 5:22; SalAf. 8:12, 13) Ena pworaus a aururu aramas, äkkäeüin, chokkewe mi tongei minne mi enlet me ekkewe mi küna pwüngüngaw me riäfföü mwääl le pöün iir mi ngaw. Setan ewe Tefil, semelapen föfföringaw, epwe äkkäeüin küna kapwüng me lein ekkewe mi ngaw.—Jon 8:44.
2. Pwata a lamot mumutään och fansoun pwe epwe pwäkini ewe osukosuk lon Ichen?
2 Pokiten än Setan pwisin atekiatäi, a etipetipa popuch kewe lon Ichen ar repwe kul seni än Jiowa nemenem. Ina minne, ra fiti Setan le ü ngeni än Jiowa pwüngün nemenem me wiliti chon tipis. (Rom 5:12-14) Pwüngün, Jiowa a fen silei sopwoloon ar süfölüngaw me föfförün ü ngeni. Iwe nge, epwe öch pwe epwe fataffatöch ena mettoch ngeni chonläng me aramas meinisin. Ina popun, mi lamot mumutään ooch fansoun fän iten an epwe letelo pwüngün än Jiowa nemenem me ffatolo pwe ekkewe chon ü ngeni ra fokkun mwääl.
3. Ifa ekiekin Chon Kraist usun mwuun aramas?
3 Pokiten aramas ra pöütalo än Jiowa emmwen, ra föratä pwisin ar kewe mwu. Lon nöün Paul we taropwe ngeni chon Kraist lon Rom, a ereniir pwe repwe älleasochisi “nöüwisen ewe mwu mi nemeniir.” Lon ränin Paul we, a äkkäeüin wewe ngeni ewe mwuun Rom fän nemenien Emperor Nero, ewe a nemenem seni ewe ier 54 ngeni 68. Paul a erä pwe “Kot a ngeni ekewe nöüwis wiser pwe repwe nemenem.” (Älleani Rom 13:1, 2.) Alon Paul na a itä wewe ngeni pwe än aramas nemenem a mürinnö seni än Kot nemenem? Aapwi. A chök apasa pwe atun Jiowa a mutatä än aramas nemenem, ekkewe Chon Kraist repwe süföliti me älleasochisi “met Kot a akota.”
Ewe Al Ngeni Sopwongaw
4. Äweweei pwata än aramas nemenem epwe fokkun sopwongaw.
4 Epwe fokkun sopwongaw än aramas nemenem fän etipetipaen Setan. Pwata? Pun ese longolong woon ewe tipatchem seni Kot. Jiowa chök mi unusöch an tipatchem. I chök a tongeni emmwenikich fän eü nemenem mi sopwöch. (Jer. 8:9; Rom 16:27) Jiowa a silei menni al a pwüng fansoun meinisin, ese usun aramas ra chök asossotfetäl fän chommong ren ar repwe silei ewe alen pwüng. Meinisin kokkotun mwu rese älleasochisi än Jiowa emmwen resap fokkun sopwöch. Pwal eü, pokiten Setan a chök pwisin kütta mochenin ren an etipetipa aramas ar repwe pwisin nemenemeniir, a ffat pwe ar nemenem epwe chök sopwongaw.
5, 6. Met a amwökütü Setan an epwe ü ngeni Jiowa?
5 Emön aramas mi mirit ese kan poputääni och angang ika a silei pwe epwe chök sopwongaw. Nge ika a chök tipeförea le föri met a mochen, epwe chök küna sopwongawen filian. Fän chommong, uruwo a fen ännetatä pwe a lus mwääl än aramas ü ngeni ewe Chon Förikich mi lapalap. (Älleani Än Salomon Fos 21:30.) Iwe nge, Setan a tipetekia me ekieki pwisin lamotan, ina popun, a säpe seni Jiowa, me atolonga pwisin I lon ewe al mi chök sopwongaw.
6 Än Setan lamalam tekia a pwal pwälo lon alon emön kingen Papilon mi mak lon Aisea 14, iei alon mi sikesik: “Üpwe feitä läng o anomu ai lenien motun king asen ekewe fün Kot. Üpwe mottiu won ewe chukun mwich mi fokun toau, a nom peliefeng. Iwe, üpwe feitä, feitä asen ekewe kuchu, pwe üpwe wewe ngeni Ewe mi Fokun Tekia.” (Ais. 14:13-15) An na ekiek mi lamalam tekia a fokkun sopwongaw pun mwuun Papilon a talo. Epwe pwal ina usun Setan me an we otot, ekiselo chök repwele unusen kitetterilo.
Pwata Kot a Mutatä?
7, 8. Ifa öchün än Jiowa mutatä föfföringaw lon ekis fansoun?
7 Ekkoch ra ekieki ika pwata Jiowa ese pinei än aramas peni me fitalo än Setan kokkotun nemenem epwe chök sopwongaw. Pokiten Kot a manaman seni meinisin, a tufichin föri ena. (Eks. 6:3) Nge, a filatä an esap föri. Ren an tipatchem, Jiowa a silei pwe ina ewe alen sopwöch an esap mwittir angolong lon än aramas föfförün ü ngeni. Lo, lo, lo, epwe letelo pwe Jiowa ewe Sou Nemenem mi pwüng me tong, iwe, aramas mi tuppwöl repwe feiöch seni minne a fen apwüngalo.
8 Ika pwe aramas rese fiti Setan le imu seni än Jiowa nemenem, resap fen küna sokkun riäfföü meinisin! Iwe nge, a wor öchün än Jiowa mut ngeni aramas ar repwe pwisin nemenemeniir lon ekis chök fansoun. A affataöchü ngeni aramas mi letip wenechar tipatchemen ar aüselinga me lükülük woon Kot. Lon fitepükü ier, aramas ra fen sotuni sokkopaten mwu, nge esor eü me leir a sopwöch. Ena pworaus a alükülükü chon fel ngeni Jiowa pwe an nemenem a mürinnö seni meinisin. Pwüngün, än Jiowa mutatä än Setan nemenem mi ngaw a fen eriäfföü aramas, kapachelong chon fel ngeni Kot mi tuppwöl. Nge, an mutatä föfföringaw lon ekis chök fansoun a fen pwal efeiöchü ekkewe mi tuppwöl.
Eü Föfförün Ü Ngeni Jiowa A Fen Elingalo I
9, 10. Äweweei ifa usun än Setan nemenem a fen elingalo Jiowa.
9 Inaamwo ika Jiowa a mutatä än aramas tipetipelo ren Setan me pwisin nemenemeniir, nge esap weween pwe a mwääl an nemenem. Nge, uruwo a fen ännetatä pwüngün alon Jeremaia we, ewe a mak fän emmwenien Kot usun lipwäkingawen aramas le pwisin nemeniir. (Älleani Jeremaia 10:23.) Pwal ooch, än Setan ü ngeni Jiowa a fen atufichi an epwe pwäralo napanapöchün kewe. Ifa usun?
10 Ach küna sopwongawen än Setan nemenem a fen affatafataöchü ngenikich unusöchün napanapen Jiowa kewe. A ina usun Jiowa a fen lingemwararelo mwen mesen chokkewe mi tongei. Itä än Setan nemenem epwe eitengawa Jiowa, nge a fen elingalo. A menlapei napanapöchün än Jiowa pwäkini osukosuken än Setan efisatä tipemwaramwar usun pwüngün än Kot nemenem. Ren ach sipwe äweweöchü ena pworaus mi enlet, sipwe käeö usun ekkoch napanapen Jiowa kewe me ppii ifa usun än Setan nemenem mi ngaw a amwökütü Jiowa an epwe pwäralo napanapan kewe lon pwal ekkoch mettoch.
11. Ifa usun Jiowa a pwäralo an tong?
11 Tong. Ewe Paipel a erenikich pwe “Kot mi tong.” (1 Jon 4:8) Akkomw, a pwäralo an tong ren an föratä aramas. A pwal pwäratä an tong ren amwararen me echipwörün napanapen an föriir. Jiowa a pwal eleenier lon eü leeni mi lingöch mi masou ren mettoch meinisin mi atoto ngeniir pwapwa. (Ken. 1:29-31; 2:8, 9; Kölf. 139:14-16) Nge lupwen aramas ra tur lon tipis, Jiowa a pwal pwäratä an tong lon pwal ekkoch napanap. Ifa usun? Ewe aposel Jon a aloni alon Jises ei: “Pun iei usun Kot a echeni chon fanüfan, pwe a fangela Nöün Aleman, pwe meinisin mi lükü i resap pöütmwälila, pwe repwe eäni manau esemüch.” (Jon 3:16) Esor och mettoch mi löllö ngeni amwararen än Kot tong ren an fangolo nöün we äläemön pwe epwe angasalo aramas seni tipis. (Jon 15:13) Ren an na tong, a isetiw eü leenien äppirü ngeni aramas ar repwe pwal eäni ena esin tong mi pennüküolo pwisin mocheniir, usun chök än Jises äppirü än Kot tong.—Jon 17:25, 26.
12. Ifa usun a pwälo än Jiowa manaman?
12 Manaman. Kot chök, ewe “mi Unusen Manaman,” a tongeni awora manau. (Pwar. 11:17; Kölf. 36:9) Lupwen emön a kerän uputiw, manauan a usun chök echö taropwe ese masou. Nge lupwen a mälo, a fen masou ena taropwe ren künaan, filian, me föfförün kewe, iwe, ekkena mettoch ra fen anapanapa manauan. Nge, Jiowa a tongeni chechchemeni meinisin pworausen emönna. Lupwen a tori fansoun, Jiowa a tongeni amanauasefäli, kapachelong napanapan me sorosorun kewe meinisin. (Jon 5:28, 29) Ina minne, inaamwo ika Kot ese akkota seni le poputään pwe aramas repwe mälo, nge a atufichi än Jiowa pwäratä an manaman le amanauasefäli ekkewe mi mälo. Pwüngün, Jiowa i ewe Kot “mi Unusen Manaman.”
13. Ifa usun än Jises asor a pwäratä unusöchün än Jiowa pwüng?
13 Pwüngiöch. Jiowa esap tongeni kapas chofona are eäni föfför ese pwüng. (Tut. 32:4; Tait. 1:2) Fansoun meinisin a chök akkamwöchü an kewe allük mi tekia usun minne mi enlet o pwüng, inaamwo ika usun itä nge esap öchiti I. (Rom 8:32) A ifa me eriäfföün än Jiowa küna mäloon nöün we mi ächengicheng woon efoch irään ninni, usun itä nge i emön chon esiita Kot! Nge, Jiowa a mutatä ei mettoch mi eletipechou an epwe fis pun a tongei aramas rese unusöch, me fän iten an epwe unusen pwönütä minne mi pwüng. (Älleani Rom 5:18-21.) Pokiten ei fönüfan a ur ren pwüngüngaw, iwe, a atufichi än Jiowa pwäratä unusöchün an pwüng.
14, 15. Ifa usun a pwälo unusöchün än Jiowa tipatchem me mosonottam?
14 Tipatchem. Mwirin chök än Atam me If tipis, Jiowa a pwäri ifa usun epwe amoielo pwününgawen mettoch meinisin mi fisitä pokiten ar ü ngeni. (Ken. 3:15) Än Jiowa mwittir mwökütüküt me an pwäralo an kokkot ekis me ekis fän iten nöün kewe chon angang, a affata an tipatchem. (Rom 11:33) Esor met epwe tongeni pinei än Kot tufichin pwäkini ekkena mettoch. Lon ei fönüfan mi ur ren föfförün sikepwach, maun, tipeweires, älleasolap, kirikiringaw, aapap, me likotuputup, Jiowa a tongeni pwär ngeni förian kewe meinisin wesewesen weween tipatchem. Ewe chon käeö Jemes a apasa: “Nge ewe tipachem seni läng a fokun limelimöch, a pwal akinamwe, tipepwetete me kirikiröch, a uren tong o awora chomong föför mi mürina, esap lifilifil aramas, esap pwal atuputup.”—Jem. 3:17.
15 Mosonottam. A fokkun pwälo än Jiowa mosonottam ren an engilo ngeni än aramas tipis, apwangapwang, me mwäällilo. Än Jiowa föri ena ren fite ngeröü ier a pwäratä pwe a unusöch an mosonottam, ina popun, sipwe fokkun kilisou ngeni. Ina minne, a pwüng alon ewe aposel Piter pwe “ren mosonotamen ach Samol oua küna manau.”—2 Pit. 3:9, 15.
16. Pwata än Jiowa tipemecheres le omusalo tipis, ina eü popun ach sipwe meefi pwapwa chapur?
16 Tipemecheres le Omusalo Tipis. Kich meinisin chon tipis me sia mwäällilo fän chommong. (Jem. 3:2; 1 Jon 1:8, 9) Sipwe fokkun pwäratä kilisou ren än Jiowa tipemecheres le omusalo tipisich! (Ais. 55:7) Ekieki mwo, kich chon tipis seni le uputiwach, ina popun, sia meefi pwapwa chapur lupwen Jiowa a omusalo ach tipis. (Kölf. 51:5, 9, 17) Ach pwisin meefi me küna napanapen Jiowa na a fokkun aüfichietä ach tong ngeni me apöchökküla ach mochen äppirü I ren föfförüch ngeni aramas.—Älleani Kolose 3:13.
Pwata Aramas Ra Kon Riäfföü
17, 18. Ifa usun napanapen än Setan nemenem a sopwongaw?
17 Unusen ei otot fän nemenien Setan a fokkun sossopwongaw fansoun meinisin. Fän etipetipaen Setan, popuch kewe ra filatä än aramas nemenem nge esap än Jiowa. Lon ena atun, ra poputääni eü sokkun nemenem epwe chök sopwongaw. Meinisin än aramas riäfföü me letipeta, ina esissillen sopwongawen än aramas nemenem.
18 Tipemmong, ina longolongun än Setan nemenem. Iwe nge, tipemmong esap tongeni akkufu tong, longolongun napanapen än Jiowa nemenem. Än Setan nemenem ese tufichin atoto pwapwa me nükünüköch. A fen letelo napanapöchün än Jiowa nemenem! A wor pisekin pwäratä lon ach ei fansoun pwe a ina usun? Ewer, usun sipwe käeö lon en lesen mwirin ei.
Met Sia Käeö Usun Nemenems Seni Ekkeei Wokisin . . .
• Rom 13:1, 2?
• Än Salomon Fos 21:30?
• Jeremaia 10:23?
• Kolose 3:13?
[Ekkewe sasing lón pekin taropwe 25]
Än Setan nemenem ese fokkun efeiöchü aramas
[Credit Line]
U.S. Army photo
WHO photo by P. Almasy
[Sasing lon pekin taropwe 26]
Ren än Jiowa manaman, a pwal mwo nge tongeni amanauasefäli ekkewe mi mälo
[Sasing lon pekin taropwe 27]
Än Jiowa tong me pwüng ra pwälo ren an asoresini Nöün we