Eperiam, Emön Mwän mi Tipetekison
Eperiam a mwot lon imwan we imw mangaku me kinamwe ren chüloon ewe imw leolokenin ewe rän. Atun a nennelo towau, a küna ülümön mwän mi wasölato lon ena leeni.a Eperiam a mwittir ssälo rer me chuuriir, a peseer pwe repwe mwo ekis asösö me pwapwaiti an awasölaöchüür. Akkomw a ngeniir ekis “mongö,” nge mwirin a akkota pwe repwe möngöfengen sokkopaten möngö, choweän pilawa mi kerän umw, pwötö, milik, futuk mi pwetete me annö. Atun Eperiam a amöngöniir, ese chök pwäri an awasölaöchüür nge a pwal pwäri an enletin tipetekison, usun chök met sipwele küna.—Keneses 18:1-8.
MET WEWEEN TIPETEKISON? Tipetekison a wewe ngeni ach sisap lamalam tekia are sikesik. Emön mi tipetekison a ekieki pwe aramas meinisin ra lap seni i lon ekkoch mettoch. (Filipai 2:3) A aüseling ngeni än ekkewe ekkoch kapasen öüröür, me a tipemecheres le föri ekkewe angang mi tekisosson fän iten aramas.
IFA USUN EPERIAM A PWÄRI TIPETEKISON? Eperiam a pwapwa le angang fän iten aramas. Usun chök met sia fen älleani me asan pwe atun Eperiam a küna ekkewe ülümön mwän, a mwittir awora minne a lamot ngeniir. Pwülüwan we Sara a mwittir ammolnatä och möngö. Nengeni mwo ika iö we a pwal föri lapen ekkewe angang. Eperiam a ssälo me chuuri ekkewe wasöla, a ngeniir ener möngö, a ssälo ngeni ewe leenien man me efili emön ochaar, me a watiw meinisin ekkewe möngö mwen mesen ekkewe wasöla. Ei mwan mi tipetekison a pwisin föri ekkena angang mi tekisosson lap seni an ewisa ngeni nöün kewe chon angang ar repwe wisen föri. Eperiam ese ekieki pwe ese fich an epwe angang ngeni ekkewe ekkoch.
Eperiam a aüseling ngeni alon chokkewe mi nom fän nemenian. Ewe Paipel a chök kapas usun fitu än Eperiam me Sara pworausfengen. Nge sia älleani fän ruu lon Paipel usun än Eperiam aüseling ngeni meefien Sara me föri met a ereni. (Keneses 16:2; 21:8-14) Lon eü ekkena atun, Eperiam “a fokun oput alon Sara.” Nge lupwen Jiowa a fos ngeni Eperiam me ereni pwe a mürinnö alon Sara, iwe, Eperiam a tipetekison me föri met Sara a öüröüra ngeni.
IKKEFA EKKEWE LESEN FÄN ITACH? Ika sia enletin tipetekison, iwe, sipwe pwapwa le angang fän iten ekkewe ekkoch. Sipwe küna pwapwa le föri ese lifilifil met sia tufichin föri fän iter pwe repwe meefi kinamwe.
Eli sia pwal tongeni pwäri tipetekison ren napanapen ach etiwa än ekkoch aramas kapasen öüröür. Eli sipwe fen mirit le etiwa öüröür seni ekkewe ekkoch, lap seni ach sipwe tunalo ar ekiek pokiten sise akkomw ekieki ena. (Än Salomon Fos 15:22) Chokkewe mi wor ar nemenem woon aramas repwe feiöch ika repwe etiwa än ekkewe ekkoch öüröür ngeniir. Iei alon emön sou emmwen mi lipwäköch, itan Jon. “Ua küna pwe emön sou emmwen mi mürinnö a kan ämecheresi än aramas meefi kinamwe le foffos ngeni.” A pwal erä: “Mi lamot tipetekison pwe kopwe mirititi pwe ekkewe mi nom fän nemeniom, eli repwe fen kon sile le föri och mettoch lap sonuk. Nge, esor emön, pwal mwo nge ewe sou emmwen a silei met mi pwüng fansoun meinisin.”
Sipwe angei än Jiowa chen, lupwen sia äppirü än Eperiam aüseling ngeni än ekkewe ekkoch öüröür me eäni ekkewe angang mi tekisosson fän iter. Paipel a erä: “Kot a ü ngeni chon lamalamtekia kana, nge a ümöümöch ngeni chon tipetekison kana.”—1 Piter 5:5.