Kot A Sótuni Án Apraham Lúkú

KA TONGENI kúna met Apraham a féri me ikeei? A wor efóch néún saar usun itá napanapan pwe epwele nieló néún ei. Pwata epwe tongeni féri ena? Akkomw, sipwe nengeni ifa usun án Apraham me Sara néúni emén át.

Chechchemeni pwe Kot a pwon ngeniir pwe repwe néúni emén át. Pwata epwe tongeni tufich ena, nge Apraham me Sara ra kon chinnap. Iwe nge, Apraham a lúkú pwe Kot epwe tongeni féri met ese tufich. Iwe, met a fis?

A fen mwirin eú ier án Kot féri an pwon. Iwe, lupwen a 100 ierin Apraham me 90 ierin Sara, ra néúni emén át itan Isaak. Kot a apwénúetá an we pwon!

Nge atun Isaak a wattetá, Jiowa a sótuni án Apraham lúkú. A kéri: ‘Apraham!’ Iwe, Apraham a pélúweni: ‘Ngang iei!’ Iwe, Kot a apasa: ‘Angei noum we, noum we áláemén Isaak, iwe kopwe feiló wóón ewe chuuk upwe áiti ngonuk. Ikenan ie, kopwe nieló noum we me eáni asor ngeniei.’

A ifa me alólilenin ekkena kapas ngeni Apraham pún a fókkun tongei néún we. Pwal chechchemeni pwe Kot a pwon ngeni Apraham pwe néún kewe repwe nóm lón ewe fénú Kanaan. Ifa usun epwe tongeni fis ena ika pwe Isaak a fen máló? Apraham ese weweiti ei, nge a chék álleasochisi Kot.

Apraham a féti Isaak lupwen a tétá wóón ewe chuuk, iwe a anómu wóón ewe róng a ssenatá. Iwe, a uwawu ewe saar pwe epwele nieló néún we. Nge lón ena chék atun, emén néún Kot chónláng a kékké: ‘Apraham, Apraham!’ Iwe, Apraham a pélúweni: ‘Ngang iei!’

A apasa: ‘Kosap efeiengawa ewe át, kosap mwo féri ngeni i och. Iei ua silei pwe ka lúkúei, pún en kese tongeni amwéchú noum we át seniei, noum we áláemén.’

A ifa me watteen án Apraham lúkú Kot! A lúkú pwe mettóch meinisin mi chék tufich ngeni Jiowa me a tongeni amanawasefálietá Isaak seni máló. Nge ren enletin, esap wesewesen letipen Kot pwe Apraham epwe nieló Isaak. Iwe, Kot a féri án emén siip epwe mwéchúló lein och petewel, iwe a ereni Apraham an epwe eáni asor pwe siwilin néún we át.