Mi Lamot Sipwe Silei Pölüwan?
“Oupwe silei ewe let, nge ewe let epwe angasakemi.”—JON 8:32.
EWE Paipel a masou ren pworaus mi enlet a tongeni angasakichelo seni ekkewe lükü mi otuputup usun Jises. Nge itä mi wesewesen lamot minne sia lükü usun i? Ewer, a fokkun lamot. A lamot ngeni Jiowa. A lamot ngeni Jises. Me epwe pwal lamot ngenikich.
● Pwata a lamot ngeni Jiowa? Pun “Kot mi tong.” (1 Jon 4:8, TF) Jiowa a mochen ach sipwe küna manau esemuch fän pwapwa. Jises a apasa: “Kot a echeni [tongei] chon fanüfan, pwe a fangela Nöün Aleman, pwe meinisin mi lükü i . . . repwe eäni manau esemüch.” (Jon 3:16) Kot a tiinaato nöün we pwe epwe ach Chon Amanau me suuki ngenikich ewe al pwe sipwe manau feilfeilo lon Paratis woon fönüfan, usun minne a tipeeü ngeni met a aotalo seni lepoputään. (Keneses 1:28) Kot a mwötöres le fangolo ewe liffangen manau esemuch ngeni chokkewe mi käeö ewe enlet usun Nöün we me etipeeüfengeni manauer ngeni.—Rom 6:23.
● Pwata a lamot ngeni Jises? Jises a pwal tongei aramas. A pennüküolo pwisin manauan fän tong ren an tipemecheres le mälo fän itach. (Jon 15:13) A weweiti pwe i a awora ewe chök al ngeni amanau. (Jon 14:6) Itä sipwe mäirü ren än Jises mochen chommong repwe küna feiöch seni an we asoren mälo? Ina ewe popun a ewisa ngeni nöün kewe chon künö mi enlet pwe repwe asukula aramas woon fönüfan usun met Kot a tipeni me aotalo seni me lepoputään.—Mattu 24:14; 28:19, 20.
● Pwata epwe lamot ngenikich? Ekieki mwo ekkewe mettoch mi fokkun lamot ngonuk, äwewe chök om famili me pöchökkülen inisum. Ka äneänei an epwe pöchökkül inisum me nonnomum me chon om famili epwe nonnomöch? Ren Jises, Jiowa a awora ngonuk me attongom kewe ewe äpilükülükün pöchökkülen inis mi unusöch me manau esemuch lon eü fönüfan mi fö ikewe ie esap chüen wor cheuch me riäfföü. (Kölfel 37:11, 29; Pwarata 21:3, 4) Ka sani le manau lon ena sokkun leeni? Ika ina, a wor och mettoch mi lamot kopwe föri.
Nengenisefäli ewe wokisin mi mak fän itelapen ei lesen: “Oupwe silei ewe let, nge ewe let epwe angasakemi.” Ewe enlet usun Jises me wisan lon pwönüetään minne Kot a aotalo seni lepoputään a tongeni angasakichelo seni ewe sokkun fötek mi lululo ngawan, ina ewe fötekin tipis me mälo. Ren om kopwe ngaselo seni, a lamot kopwe “silei ewe let.” Pwata kese käeö pwe epwe lapolo om silei usun ei enlet me ifa usum me attongom kewe oupwe küna feiöch seni? Chon Pwäraatä Jiowa repwe pwapwa le älisuk.