“Minne Mi Enlet Epwe Angasalo Ami”
“Oupwe sinei minne mi enlet, o minne mi enlet epwe angasalo ami.” A ina ussun alon Jises lupwen a asukula ewe mwichen aramas lon ewe imwen fel lon Jerusalem. (Jon 8:32) Noun Jises kewe aposel ra tongeni muttir esinna pwe minne Jises a asukuleer mi enlet. Ra fen kuna chommong pisekin annet mi annetaata pwe nour na sense a feito seni Kot.
IWE NGE, ikenai ekkoch repwe osukosuk ar repwe esinna ewe enlet Jises a fen fos ussun. Ussun chok lon ranin ewe soufos Aisea, ikenai mei wor ekkoch mi “aita ngeni murina mine a ngau, nge ngeni ngau mine a murina. Oua awili rochopwak ngeni saram, nge saram ngeni rochopwak, oua pwal awili ngeni arar mine a maras, nge ngeni maras mine a arar.” (Aisea 5:20) Pokiten mei wor chommong sokkopaten memmeef, ekiek, me lapalapen manau mi etipetipakich ikenai, chommong aramas ra meefi pwe mettoch meinisin mi tongeni sissiwil me esor och mettoch sipwe eita ngeni enlet.
Lupwen Jises a ereni ekkewe mi auseling ngeni pwe ewe enlet epwe angaseerelo, ra polueni ren ar apasa: “Nge am mwirimwirin Eperiam, o sisaamwo nom fan nemenien emon. Iwe ifa usun om apasa pwe ‘epwe angasalo ami’?” (Jon 8:33) Rese meefi ewe lamoten an emon are och mettoch epwe angaseerelo. Nge mwirin Jises a awewei: “Enlet, enlet, upwe apasa ngenikemi, pwe iteiten aramas meinisin mi fori tipis a chok nonnom fan nemenien tipis.” (Jon 8:34) Ewe enlet Jises a foffos ussun epwe tongeni suuki ewe aal ngeni ngaselo seni tipis. Jises a apasa: “Iei minne, are ewe Nau epwe angasalo ami, enlet, ami oupwe ngaselo.” (Jon 8:36) Ina minne, ewe enlet mi angasaalo aramas, ina ewe enlet ussun Jises Kraist, ewe Noun Kot. Epwe chok luku won asorun manauen Jises mi unusoch pwe emon epwe tongeni ngaselo seni tipis me maalo.
Lon pwal eu fansoun Jises a apasa: “Kopwe epinalo ir ren ewe enlet, om kapas mi enlet.” (Jon 17:17) Ewe kapasen Kot mi mak lon ewe Paipel, ina ewe enlet mi tongeni waato ngaselo seni luku mi mwakel me fel mi chofona. Ewe Paipel a masou ren ewe enlet ussun Jises Kraist, mi emmweni aramas ar repwe lukuluk ren me epwe suuki ewe aal ngeni apilukulukoch fan iten mwach kkan. A mmen murinno ach sipwe silei ewe enlet seni Kapasen Kot!
Ifa lamoten ach sipwe silei ewe enlet? Chommong lamalam ikenai, ra apasa pwe ra luku ewe Paipel, nge ekiekin me eorenien aramas ra etipetipeer. Fan chommong, ekkewe sou emmwen lon lamalam ra akkomwa an aramas efichiir lap seni ar repwe asukuleer minne mi enlet. Ekkoch ra meefi pwe Kot epwe etiwa sokkun fel meinisin, ika epwe feito seni letip wenechar. Nge Jises Kraist a awewei: “Nge fansoun epwe feito, iei a fen fis, pwe ekkewe chon fel mi let repwe fel ngeni ewe Sam lon ngun o enlet. Pun ewe Sam a pwal kutta ei sokkun aramas pwe repwe fel ngeni i.”—Jon 4:23.
Ika sia mochen fel ngeni Kot ren ewe lapalap epwe etiwa, a lamot ach sipwe silei ewe enlet. Ei mettoch a mmen lamot. Ach pwapwa esemuch a longolong won. Ina popun, meinisin epwe ita eisini pwisin i: ‘Lapalapen ai fel ngeni Kot epwe apwapwai i? Ua wesewesen mochen kaeo ewe enlet lon an Kot we Kapas? Are ua niueiti met ai atittin epwe pwaraalo?’