PWÓRÓUS LÚKÚNPÉÉN: MET SIA KÁÉ SENI MOSES
Ié Ena Moses?
Met ka ekieki lupwen ka rongorong ewe it Moses?
I emén ménúkol, inan we a aopaaló lón eú pasikit lón ewe Chénúpupu Nil.
I emén át, néún Farao we fépwúl a foleni lón wéún Isip, nge ese ménúkaaló pwe i wesewesen chón Israel.
I emén chón masen siip mi nóm lón Mitian úkúkún 40 ier.
I ewe ra fósfengen me Jiowaa mwen ewe irá mi ngetenget.
I ewe mwán mi útá mwen mesen ewe kingen Isip fán pwora me tingorei an epwe angasaaló ekkewe Chón Israel seni ar slave.
I ewe mwán Kot a akúnééi an epwe esilei ngeni chón Isip pwe Engol Riáfféú epwe toriir lupwen ar we king a turunufaseei ewe Kot mi enlet.
I ewe a emmwenawu ekkewe chón Israel seni Isip.
I ewe emén Kot a néúnéú le áimufeseni ewe Setipar.
I ewe a ngeni ekkewe chón Israel ewe Allúk Engol seni Kot.
EKKENA mettóch meinisin mi mak asan a fis lón manawen Moses, me a pwal wor ekkóch. Ina popun, sise máirú ren án ekkewe Chón Kraist, ekkewe chón Jus me chón Muslim fókkun súféliti ei mwán mi tuppwél!
Esor tipemwaramwar pwe Moses, i emén soufós me an kewe féffér ra “lapalap o eniwokus.” (Tuteronomi 34:10-12) A anómu pwisin i fán án Kot nemenem pwe Kot epwe néúnéú i lón eú napanap mi amwarar. Nge, Moses emén chék pwal aramas. Usun chék ewe soufós Elias, ewe a pwá únúkkún Moses lón eú lángipwi atun Jesus a nóm fénúfan, Moses i “eman aramas usun chök kich.” (James 5:17; Mateus 17:1-9) Moses a kúna lón manawan chómmóng ekkewe esin osukosuk sia pwal kúkkúna ikenái, nge a pwákiniir.
En mi mochen silei ifa usun a pwákiniir? Nengeni úlúngát napanap mi múrinné Moses a napanapeni me ppii met sipwe tongeni káé seni.
a Jiowa, ina iten Kot we me ren ewe Paipel. Ppii ewe kapasen akkomw lón ewe Paipel are Testamentin Lom me Testament Söfö.