Ámi Kana Mwán mi Ásimaw​—Oupwe Apéchékkúlasefáli ewe mi Mélúlú?

Angela, emén Chón Kraist mi lipich a 30 som ierin.a Ekkewe mwán mi ásimaw repwele chuuri nge a ekis niwokkus. A ekieki, ‘Met repwe ereniei?’ Ua silei pwe ua fen etiwaaló ekkóch mwich, nge ua fókkun ménú lupwen ua tori leimw seni ai angang unusen rán le túmún chinnap.” Me lúkún ena, Angela a pwal lólilen ren apwangapwangen inan we.

Ika en emén ekkewe mwán mi ásimaw epwele chuuri Angela, ifa usun kopwe apéchékkúla? Nge me mwan, met kopwe akkomw féri lón óm ammólnatá le chuuri emén mi “malülü” usun Angela?​—Jeremaia 31:25.

EKIEKI USUN NÓNNÓMUN PWIICH WE

Fán ekkóch kich meinisin sia meefi mélúlú pokiten ach angang are wisach kewe usun Chón Kraist. Áwewe chék, ewe soufós Taniel a meefi pwe a “apwangapwangala” lupwen a kúna eú lángipwi nge ese weweiti. (Taniel 8:27) Met a álisi? Kot a tinató emén chónláng itan Kapriel an epwe áweweei ekkóch mettóch me ereni pwe Jiowa a fen rongorong an kewe iótek. Ewe chónláng a pwal ereni pwe i a chúen emén mi “fokun chen me ren” Jiowa. (Taniel 9:21-23) Mwirin och fansoun, pwal emén chónláng a pwá ngeni Taniel me apéchékkúla ren pwal chék ekkena esin kapas.​—Taniel 10:19.

Ka pwal tongeni féri ena sókkun lupwen ka chuuri emén chón ewe mwichefel mi mélúlú are letipengaw. Me mwen kopwe chuuri pwiich we, awora fansoun le ekieki usun nónnómun. Met an kewe osukosuk? Ifa usun ekkena osukosuk a eletipengawa i? Met sókkun napanap mi múrinné a pwáraatá? Richard, emén mi wiseni ewe wis mwán mi ásimaw lap seni 20 ier, a erá pwe a achocho le ekieki usun án pwiich we napanap mi múrinné me mwen epwe chuuri. A pwal ekiekiéchú nónnómun. Ei mettóch a ámecheresi Richard an epwe néúnéú ewe sókkun kapasen apéchékkúl mi lamot ngeni ewe emén epwe chuuri. Ika en me pwal emén mwán mi ásimaw oua akkóta pwe oupwe chuuri emén, epwe éch ika ámi me rúúemén oupwe fós usun nónnómun eménna me mwen ámi oupwe chuuri.

FÉRI PWE PWIICH WE EPWE MEEFI KINAMWE

Eli pwiich we epwe meefi an sáw le uwawu meefian ngeni emén mwán mi ásimaw. Iwe, ifa usun kopwe álisi pwiich na an epwe meefi kinamwe? Ka tongeni emelimel ngeni me apasa ekkóch kapas mi kirekiréch lepoputáán ámi chufengen. Michael, emén mwán mi ásimaw lap seni 40 ier, fán chómmóng iei met a apasa lepoputáán ar chufengen: “Ka silei, eú me lein wisen ekkewe mwán mi ásimaw a fókkun éch, ina ám chuuri pwiich kewe lón imwer me alapaaló ám sissileer. Ina popun, ua fókkun mwétéresiti ach chufengen ikenái.”

Lepoputáán ewe chufengen, ka tongeni eáni eú iótek. Lón óm iótek, ka tongeni apasa napanapéchún pwiich we usun an lúkú, tong, are likiitú. Ina met ewe aposel Paulus a apasa lupwen a iótek fán iten pwiin kewe. (1 Tesalonika 1:2, 3) Lupwen oupwe iótekfengen iei usun, epwe álisikemi me rúúemén le eáni ekiek pwúng usun ewe chufengen. Iwe, ámi pwóróusfengen epwe apechékkúlafengenikemi. Óm iótek a pwal tongeni oururu. Ray, emén mwán mi ásimaw langattam fansoun, a erá pwe fan ekkóch kich meinisin sia ménúki féfféréchúch kewe lón ach angang ngeni Kot, me sia meefi péchékkúl lupwen emén a áchemasefáli ngenikich ekkeei mettóch.

NÉÚNÉÚ EWE PAIPEL LE APÉCHÉKKÚLA EKKÓCH

Eú mettóch ka tongeni féri pwe kopwe apéchékkúla emén pwiich, ina óm néúnéú ewe Paipel le álisi i, inaamwo ika kopwe chék néúnéú eú wokisin. (Rom 1:11) Áwewe chék, emén pwiich mi letipechou a tongeni meefi pwe i a lamotongaw. Oua tongeni álleafengen usun meefien emén soumak kélfel atun a meefi pwe a “usun chök eu rumen wain seni silin man mi nürüfengen ren ötüöt.” Inaamwo ika ina meefian nge a erá: “Üsap manlükala om kewe allük.” (Kölfel 119:83, 176) Mwirin óm ekis áweweei ena wokisin ka tongeni ereni pwiich we pwe ka fókkun lúkú pwe pwal i ‘ese manlükala’ án Kot kewe allúk.

Ifa usun kopwe néúnéú ewe Paipel le apéchékkúla emén pwiich ese chúen akkafalafal are ese chúen tinikken lón an angang ngeni Kot? Ewe kapas áwewe usun ewe eféú féún moni mi péútúló eli epwe apéchékkúla pwiich we. (Lukas 15:8-10) Eli ena féún moni, eféú féún ewe mwáár mi aúchea mi ppit seni chómmóng féún moni silifer. Lupwen ka apwóróusa ena kapas áwewe ngeni pwiich we, eli ka tongeni álisi le mirititi pwe i mi aúchea lón án Chón Kraist we mwichefel. Ka tongeni álisi le kúna pwe i emén lein néún Jiowa kúkkún siip me a fókkun tongei.

Pwiich kewe ra kan pwapwa le fós usun ekkewe wokisin ra fen álleani. Ina popun, kosap chék fós unusen ena fansoun chufengen! Mwirin ámi álleani eú wokisin, ka tongeni filatá eú kapas are mwuten kapas seni ewe wokisin me tingorei an epwe uwawu meefian. Áwewe chék, mwirin álleaan 2 Korint 4:16, ka tongeni eis, “Ka chemeni ekkóch fansoun Jiowa a apéchékkúlok are efisi óm kopwe meefi pwe ka ‘söföla’”? Ren ei sókkun kapas eis ámi pwóróusfengen epwe eú minen apéchékkúl ngenikemi me rúúemén.​—Rom 1:12.

Ka pwal tongeni apéchékkúla pwiich we ren óm apwóróusa pwóróusen emén lón Paipel nge a chék léllé nónnómur. Emén mi letipechou mi tongeni meefi met Hana are Epafrotitus ra meefi. Iir me rúúemén ra letipechou fán ekkóch nge me ren Kot iir mi chúen aúchea. (1 Samuel 1:9-11, 20; Filipi 2:25-30) A wor chómmóng pwóróus mi múrinné lón Paipel ka tongeni néúnéú.

SÓPWÓSÓPWÓLÓ LE ÁFÁNNI EKKEWE EKKÓCH

Mwirin ewe chufengen sópweló le ákkáfánni pwiich we. (Föför 15:36) Áwewe chék, wesin ámi chufengen, oua tongeni kókkótfengen pwe oupwe mwin le afalafal. Lupwen Bernard, emén mwán mi ásimaw langattam fansoun, a chuursefáli pwiich we a kerán álisi, a tongeni kapas eis ngeni fán túmúnúéch usun ewe kapasen fén a ngeni atun ar we chufengen, iwe a eis, “Iwe met, a éch met sia pwóróusfengen wóón?” Ren óm pwáraatá pwe ka áfánni lón ekkeei napanap, kopwe kúna ika mi pwal wor met kopwe tongeni pwal álisi wóón.

Met a kon lamot ngeni pwiich kewe, ina ar repwe meefi pwe ka áfánniir, weweitiir, me tonger. (1 Tesalonika 5:11) Ina popun, me mwen óm kopwe chuuri pwiich we, ekieki usun nónnómun. Ióteki ewe chufengen. Ekiekiéchú ekkewe wokisin kopwe néúnéú. Iwe, kopwe kúna ewe kapas mi fich epwe apéchékkúlasefáli ewe mi “malülü”!