Aúcheani Óm Akkangangfengen me Jiowa!

1. Met meefien Jiowa usun ewe mettóch angang, iwe, met a féri?

JIOWA a pwapwaiti an kewe angang. (Kölf. 135:6; Joh. 5:17) Ren án férian kewe chónláng me aramas repwe pwal meefi ena esin pwapwa lón ar kewe angang, Jiowa a ewisa ngeniir ekkewe sókkun angang mi ámmeseik mi atoto ngeniir pwapwa. Áwewe chék, lupwen a fératá mettóch meinisin a etiwa néún we Mwánichi an epwe pwal fiti I. (Álleani Kolose 1:15, 16.) Ewe Paipel a apasa pwe mwen án Jesus feitiw fénúfan a nóm ren Kot lón láng usun “eman sousile angang.”​—SalF. 8:30.

2. Met a pwáraatá pwe seni lóóm ekkewe chónláng ra kan eáni ekkewe sókkun angang mi lamot me atoto ngeniir pwapwa?

² Lón ewe Paipel, seni lepoputáán tori lesópwólóón a masou ren chómmóng pwóróus mi pwáraatá pwe Jiowa a kan ewisa ngeni néún kewe chónláng ekkóch angang. Mwirin án Atam me Efa tipis me ra katowu seni leenier we ewe Paratis, Kot a “anomu Keropim ötiuen ewe tanipi Eten, pwal efoch ketilas mi pulopulen ekkei o märäkul, pwe repwe mamasa ewe al a ale ngeni ewe irän manau.” (Ken. 3:24) Pwärätä 22:6 a pwal apasa pwe Jiowa a “tinala nöün chon läng pwe epwe pwäri ngeni nöün kewe chon angang mine epwe fisikai.”

IFA USUN REN ARAMAS?

3. Lupwen Jesus a nóm wóón fénúfan, ifa usun a áppirú Seman we?

³ Lupwen Jesus a nóm wóón fénúfan usun emén aramas mi unuséch, a pwapwa le féri ewe angang Jiowa a ewisa ngeni. Jesus a áppirú án Seman we leenien áppirú ren an ewisa ngeni néún kewe chón káé eú angang mi lamot. A amwasangasanger ren an ereniir ekkewe mettóch ra tongeni féri, a erá: “Enlet, üpwe wesewesen ürenikemi: Iö a lüküei epwe föri ekewe föför ngang üa föriir, ewer, epwe pwal mwo nge föri föför mi lap seni ekei, pun ngang üpwe feila ren Semei.” (Joh. 14:12) Jesus a apéchékkúla ngeniir atapwalapwalen ekkena angang, a ereniir: “Lupwen a chüen rän, üpwe fokun föri angangen ewe mi tinieito. Pwin epwe war lupwen esap wor eman a tongeni angang lon.”​—Joh. 9:4.

4-6. (a) Pwata sipwe kilisou ren án Noa me Moses apwénúetáéchú wiser kewe me ren Jiowa? (b) Meinisin ekkewe angang Kot a ewisa ngeni aramas a kan atoto met?

⁴ Pwal mwo me mwen án Jesus nóm wóón fénúfan, Kot a fen ngeni aramas ekkewe sókkun angang mi lamot. Inaamwo ika Atam me Efa rese apwénúetá ekkewe angang Kot a ewisa ngeniir, nge chómmóng aramas ra féri met Kot a ewisa ngeniir. (Ken. 1:28) Kot a ngeni Noa ekkewe kapasen éúréúr mi tichiki ifa usun epwe falei ewe waimw epwe amanawa aramas seni lón ewe Noter. A apwénúetáéchú meinisin minne Jiowa a ereni. Sia kilisou ngeni, pún ren an álleasochis sia kúna manaw iei!​—Ken. 6:14-16, 22; 2 Pet. 2:5.

⁵ Kot a ngeni Moses ekkewe kapasen éúréúr mi tichik usun kaútáán ewe imwenfel mangaku, me akkótéchún ekkewe souasor. I a féri mettóch meinisin Jiowa a ereni. (Eks. 39:32; 40:12-16) Pwal mwo nge lón ach ei fansoun, sia kúna feiéch seni án Moses apwénúetá wisan we fán tuppwél. Ifa usun? Ewe aposel Paulus a áweweei pwe ekkewe sókkópaten kinikin lón ewe Allúk ra liosuetá “ekewe mettoch mi mürina repwe feito.”​—Ipru 9:1-5, 9; 10:1.

⁶ A sókkópat ekkewe angang Kot a ewisa ngeni néún kewe chón angang lón eú me eú fansoun me ren feffeitáán pwénúetáán an we kókkót. Nge fansoun meinisin, ekkewe angang ra elingaaló Jiowa me atoto feiéch ngeni ekkewe aramas mi lúkú. A ina usun ren ekkewe mettóch Jesus a féri lupwen a nónnóm láng me lón ewe fansoun a nónnóm wóón fénúfan. (Joh. 4:34; 17:4) Pwal ina chék usun, ewe angang sia eáni ikenái a pwal elingaaló Jiowa. (Mat. 5:16; álleani 1 Korint 15:58.) Pwata?

ÁKKEÁNI EKIEK PWÚNG USUN EWE ANGANG SIA EÁNI

7, 8. (a) Apwóróusa usun ekkewe angang mi kkóló aúchean Chón Kraist ra eáni. (b) Epwe itá ifa meefiach ngeni án Jiowa emmwen?

⁷ A mmen amwarar án Jiowa etiwa aramas rese unuséch ar repwe akkangangfengen me I. (1 Kor. 3:9, NW) Chókkewe ra angang lón kaútáán ekkewe Leenien Mwichelap, Leenien Mwich, me ekkewe keangen ofesilap ra fiti ewe sókkun angangen kaú wesewesen imw usun chék met Noa me Moses ra féri. Iwe, kopwe aúcheani óm we angang, ese lifilifil ika ka fiti angangen fférsefálin eú Leenien Mwich lón sópwum we are kaútáán ach we ofesilap lón Warwick, New York. (Ppii ewe lios lepoputáán ei lesen.) Ina eú angang mi pin. Iwe nge, lap ngeni ekkewe Chón Kraist ra ketiw le fiti eú angangen kaú lón pekin lúkú, ina ewe angangen afalafal. Ei angang a pwal elingaaló Jiowa me efeiéchú ekkewe aramas mi álleasochis. (Föf. 13:47-49) Án Kot we mwicheich a kan awora emmwen ren ifa usun epwe fisiéch ei angang. Nge neman fán ekkóch epwe wewe ngeni an epwe ekkesiwil ewe angang sia eáni.

⁸ Néún Jiowa kewe chón angang mi tuppwél ra kan pwapwa le álleasochisi an emmwen. (Álleani Ipru 13:7, 17.) Neman lupwen sia kerán eáni eú mineféén angang, sise kon lien weweiti ewe popun a ina usun. Nge sia fókkun mirititi échún ach sipwe álleasochisi Jiowa me féri ekkewe ekkesiwil mi fich me ren.

9. Ifa ewe leenien áppirú ekkewe mwán mi ásimaw ra isetiw fán iten ewe mwichefel?

⁹ Napanapen án ekkewe mwán mi ásimaw emmweni ewe mwichefel a pwáraatá pwe ra fókkun mochen féri letipen Jiowa. (2 Kor. 1:24; 1 Tes. 5:12, 13) Ra pwáraatá ar tipemecheres le angang weires me fiti ekkewe siwil a kan fis. Ra éttúres le apwénúetá ekkewe mineféén napanapen ach sipwe afalafala aramas usun án Kot we Mwú. Inaamwo ika eli me lepoputáán ekkóch ra pireir le akkóta angangen afalafal wóón phone, wóón oroor, are lón ekkewe leeni mi wor chómmóng aramas ie, nge mwirin och fansoun ra kúna uwaéchún ena esin angang. Áwewe chék, fémén pioneer lón Tois ra filatá ar repwe afalafal lón ekkewe leenien business me sitowa, ikkena ekkewe leeni a fansoun langattam ese wor emén a afalafal ie. Emén leir itan Michael a erá pwe me lepoputáán ra fókkun niwokkus pún a fen fite ier ar rese féri ei sókkun napanapen afalafal. A pwal apasa: “Ese mwáál Jiowa a silei meefiem, ina popun a féri pwe epwe fókkun apwapwa ám afalafal lón ena sossorun. Aua fókkun pwapwa pwe aua fiti ewe emmwen lón Ach Angangen Afalafala ewe Mwú, me aua lúkúlúk wóón án Jiowa álillis!” Ka pwal mwétéresiti óm kopwe sótuni ekkewe mineféén napanapen afalafal lón leeniom we?

10. Kukkuto chék, ikkefa ekkewe siwil mi fis lón án Jiowa we mwicheich?

¹⁰ Fán ekkóch a lamot an epwe wor ekkesiwil lón án Kot we mwicheich. Lón ekkewe ier kukkuto chék, mi wor fitu keangen ofesilap ra kochufengen me ekkewe pwal ekkóch. Inaamwo ika a lamot pwe chón angangen ekkena ofesilap repwe féri siwil, nge ekiseló chék mwirin a ffatoló feiéchún an fis ekkena siwil. (SalAf. 7:8) A ifa me pwapwaan ekkewe chón angang mi tipemecheres le álleasochis ren ar álisatá feffeitáán án Jiowa we mwicheich!

11-13. Met sókkun ekkesiwil mi áweires ekkóch ra féri pokiten a fis siwil lón ach mwicheich?

¹¹ Sia tongeni káé lesen mi múrinné seni chókkewe ra angang lón ekkewe keangen ofesilap ra kochufengen. Ekkóch leir ra fen angang lón ekkena Bethel ren fite fite ier. Eú pean pwúpwúlú mi angang lón eú Bethel mi chék chókúkkún chóchóór, ra ketiw le angang lón pwal eú Bethel lón Mexico mi fókkun chómmóng chóchóór lap seni ewe Bethel ra angang lón akkomw. Iwe, ewe mwán Rogelio, a erá: “A kon weires ám ló seni ám famili me chiechiem kewe.” Pwal emén pwiich itan Juan a pwal ketiw an epwe mwékút ngeni Mexico, a erá pwe usun itá a poputááni sefál manawan, iei alon: “Mi lamot kopwe ámááraatá sefál eú mineféén riri lefilemi me ekkewe ekkóch. A pwal lamot kopwe féri ekkesiwil pwe kopwe káé ekkewe mineféén eéreni me ekiekin chón ena leeni.”

¹² Ekkóch chón Bethel seni ekkóch fénú lón Iurop ra ketiw ar repwe mwékút ngeni ewe keangen ofesilap lón Tois. Iir ra pwal féri chómmóng ekkesiwil lón manawer. Chókkewe mi pwapwaiti le akkattola lingen ekkewe chuuk repwe weweiti weiresin ekkewe chón Bethel lón Switzerland le ló seni fénúer na mi kon amwarar tettekian ekkewe chuuk lón. Nge ekkewe seni ewe Bethel lón Austria ra pwosiiti kinamween chókúkkúnún ar na familien Bethel.

¹³ Ren chókkewe repwe mwékút ngeni pwal eú fénú, epwe wewe ngeni ar repwe eérenaaló leenier minefé, repwe angangfengen me pwiir kewe rese sissileer, me neman repwe pwal káé pwal eú sókkun angang. Repwe pwal fiti eú mineféén mwichefel, me afalafal lón eú mineféén leenien afalafal, neman repwe pwal mwo nge káé pwal eú mineféén fós. Mi tongeni weires ar féri ekkena siwil lón manawer. Nge, chómmóng chón Bethel ra pwapwa le féri ekkena siwil. Pwata?

14, 15. (a) Ifa usun chómmóng ra pwáraatá pwe ra aúcheani ar repwe angangfengen me Jiowa ese lifilifil menni angang repwe eáni? (b) Ifa usun iir eú leenien áppirú mi múrinné fán itach?

¹⁴ Grethel a apasa: “Ua etiwa ai mineféén angang pún ina alen ai upwe tongeni pwáraatá ngeni Jiowa pwe ai tong ngeni ese chék lóngólóng wóón eú fénú, eú imw, are ewe wis ua angang ngeni lón.” Dayska a erá: “Lupwen ua chechchemeni pwe ewe etiwetiw a feito seni Jiowa, ua pwapwa le etiwa.” A pwal ina usun meefien André me Gabriela, ra erá: “Aua meefi pwe ám etiwa ei etiwetiw epwe pwal ina eú alen ach sipwe tongeni angang ngeni Jiowa ren ach pennúkúóló pwisin mochenich.” Ra lúkú pwe lupwen a wor ekkesiwil lón án Jiowa we mwicheich, mi éch sipwe etiwa lap seni ach sipwe ú ngeni.

¹⁵ Pokiten kochufengenin ekkewe keangen ofesilap, iwe a wor ekkesiwil ren wisen ekkóch chón Bethel pwe repwe fiti ewe angangen pioneer. Ina met a fis ngeni chómmóng chón Bethel lupwen ekkewe keangen ofesilap lón Denmark, Norway, me Sweden ra kochufengen me a fférútá eú keangen ofesilap itan Scandinavia. Iei alon rúúemén me leir iter Florian me Anja: “Me rem, mi ámmeseik ei mineféén angang inaamwo ika a atoto watteen siwil lón manawem. Aua meefi pwe a mmen múrinné án Jiowa epwe néúnéú kich lón an angang ese lifilifil ia. Enlet, aua meefi pwe Jiowa a fókkun efeiéchúkem!” Inaamwo ika lap ngeni kich neman sisap féri ekkena sókkun ekkesiwil lón manawach, nge sia tongeni áppirú án pwiich kana tipemecheres le akkomwa lón manawer angangen ewe Mwú. (Ais. 6:8) Jiowa a kan efeiéchú chókkewe ra aúcheani ar repwe angangfengen me I, ese lifilifil ia ena angang epwe fis ie.

SÓPWELÓ LE PWAPWAITI ÓM ANGANG MI AÚCHEA LE AKKANGANGFENGEN ME KOT!

16. (a) Ifa ewe kapasen fén lón Kalatia 6:4? (b) Ifa ewe angang mi kkóló aúchean seni meinisin sia tongeni eáni?

¹⁶ Pokiten kich aramas sise unuséch, sia kan apépééi kich ngeni ekkewe ekkóch. Nge án Kot we Kapas a apasa pwe sipwe afóta ekiekich wóón met kich pwisin sia tongeni féri. (Álleani Kalatia 6:4.) Lap ngenikich sise eáni ewe wis le emmweni án Kot mwicheich. Pwal och, sanne kich meinisin sipwe tongeni fiti angangen pioneer, misineri are angang lón Bethel. Enlet, ekkena wis ra fókkun múrinné! Nge sisap ménúki pwe a suuk ngenikich meinisin ewe angang mi kkóló aúchean seni meinisin. Ina ach sipwe angangfengen me Jiowa lón ewe angangen afalafal. Ina ewe angang sipwe fókkun aúcheani!

17. Lón án Satan ei ótót, eli epwe chék kaúk met? Nge pwata sisap kon lichippúng ren?

¹⁷ Lón án Satan ei ótót, eli epwe chék kaúk met sia tongeni féri lón ach angang ngeni Jiowa. Neman sise tongeni nemeni nónnómun péchékkúlen inisich, wisach kewe lón famili, are pwal ekkóch mettóch. Nge ese wor popun ach sipwe kon lichippúng. Kosap ekieki pwe mi lamot kisikis met ka tongeni féri lón óm akkangangfengen me Kot ren óm pwáraatá ngeni aramas itan we me ekkesilefetálei an we Mwú. Ewe a fókkun lamot, ina óm akkangangfengen me Kot ren úkúkún óm tufich, me óm ikkiótek pwe Kot epwe efeiéchú pwiim kewe Chón Kraist ra tufichin féri chómmóng angang fán iten Kot nge en pwisin kese tufichin féri. Chechchemeni pwe Jiowa a aúcheani meinisin chókkewe mi mwareiti itan we!

18. Met sipwe tipemecheres ach sisap mwo féri, me pwata?

¹⁸ Inaamwo ika kich aramas mi tipis, Jiowa a pwapwa le néúnéú kich pwe sipwe chienan kewe chón angang. A ifa me watteen aúchean ach akkangangfengen me Kot lón ekkeei ránin lesópwólóón! Ina popun, sia pwal tipemecheres ach sisap mwo achocho le apwénúetá pwisin mochenich pún sia silei pwe lón án Jiowa we fénúfan sefé, i epwe efeiéchúkich le pwapwaiti ewe “enletin manau,” ewe manaw esemuch fán pwapwa me kinamwe.—1 Tim. 6:18, 19.

19. Menni ápilúkúlúk Jiowa a ngenikich fán iten mwachkkan?

¹⁹ Ekiseló chék, epwele pwénútá án Kot we pwon usun ewe fénúfan sefé. Ekieki met Moses a ereni ekkewe chón Israel lupwen repwele tolong lón ewe Fénúen Pwon, a erá: “Ewe Samol mi Lapalap epwe fokun afeiöchü angangen pöümi meinisin.” (Tut. 30:9) Wesin ewe Armaketon, chókkewe mi achocho le akkangangfengen me Kot repwe fénúeni ewe fénú Kot a pwon ngeniir. Iwe, sipwe poputá le féri ewe mineféén angang le ewilaaló fénúfan ngeni eú paratis mi ling!