PWÓRÓUS LÚKÚNPÉÉN | LÁNGIPWI USUN LÁNG MET WEWEEN?
Kapas Eis Usun Chókkewe Lón Láng
Ka fen piin ekieki usun láng me chókkewe ra nónnóm lón? Ika ina, a pwal wor chienom. Lón fite ngeréú ier, a wor án aramas ekiek usun. Ekkóch ra lúkú pwe ar kewe lewo ra nóm lón nge mi lamot repwe asamoluur. Nge ekkóch ra ekieki pwe láng ina eú leeni mi kon kinamwe, ekkewe chónláng me ekkewe aramas mi múrinné mi fen máló ra nónnóm lón. Nge ekkóch ra ekieki pwe ina leenien ekkewe fitu million sókkopaten kot.
Chómmóng aramas ra erá pwe sise tongeni silei och mettóch usun láng pún ese mwo wor emén mi feitiw seni me erenikich usun. Iwe nge, ena ekiek ese pwúng. Jesus Kraist a fen piin nónnóm lón láng, ikewe ekkewe mi inisini inisin ngún ra nónnóm ie me mwen an a feitiw fénúfan. A fen affata ena ngeni ekkewe néúwisin lamalam atun a nónnóm fénúfan. A erá: “Üa feitiu seni läng pwe üpwe föri letipen ewe mi tiniei, nge sap püsin letipei.” Jesus a apasa pwisin silean ngeni néún kewe aposel atun a erá ei: “Mi wor chomong ruum lon imwen Semei.”—Johannes 6:38; 14:2.
Iwe Semen Jesus, i ewe Kot itan Jiowa me ‘imwan’ a nóm láng. (Kölfel 83:18)a Ina popun ese wor emén epwe unusen tongeni áweweei usun láng me lúkún Jiowa Kot me Jesus Kraist. Ra pwáraatá chómmóng pwóróus usun láng ren lángipwi mi amwarar ra ápwár ngeni ekkewe mi tuppwél.
Ewe lesen mwirin ei epwe áiti ngenikich ekkóch kinikin lón Paipel mi áweweei met aramas ra kúna lón chómmóng lángipwi. Atun ka álleani usun ekkeei lángipwi, kopwe chechchemeni pwe láng esap och mettóch sia tongeni kúna are attapa. Ina popun Kot a féri ekkewe lángipwi lón napanap aramas repwe tufichin weweiti pwe epwe áiti ngenikich ika mei fet láng. Ekkewe lángipwi repwe álisuk le weweiti chókkewe ra nónnóm lón láng ikewe a “chomong ruum” ie.
a Jiowa, ina iten Kot we me ren ewe Paipel.