Lángipwiin Chókkewe Lón Láng

JIOWA I EWE MI LAPALAP

“Ikenan lon läng a wor eu lenien motun king, eman a mot won. Won mesen ewe mi mot a saramaram usun ekewe fau aüchea mi arauarau fetil me par iter jasper me karnelian, nge pwelin ünükün ewe lenien motun king a wor eu resim mi wewe ngeni anüen eföü fau aüchea itan emeralt.”​—Pwärätä 4:2, 3.

“A pwal wor och saram ünükün. Iwe, usun lapalapen ewe resim a pwä lon kuchu lupwen püngün üt, iei usun lapalapen ewe saram ünükün ewe mi mot. Iei usun lapalapen lingen ewe Samol mi Lapalap.”​—Isikiel 1:27, 28.

Ewe aposel Johannes me ewe soufós Isikiel ra kúna ekkeei lángipwi. Ekkeei lángipwi ra áweweei usun lingen ewe Kot mi Lapalap Jiowa, ren ekkewe mettóch sia tongeni mecheresin eliosu, ren choweán faú aúchea mi meretittin, eú resim me lingen ewe leenien motun king. Ra áiti ngenikich pwe ika Jiowa a nónnóm, a wor ling, pwapwa me kinamwe.

Ekkeei áwewe usun Jiowa ra tipeeú ngeni ekkeei kapas ewe soumakken kélfel a makkeei: “Ewe Samol mi Lapalap a tekia. Sipwe alapala ach mwareiti i, sipwe pwal niuokusiti i lap seni ekewe kot meinisin. Pun än chon ekewe mwü kewe kot ra chök uluulun anümwäl. Nge ewe Samol mi Lapalap a föri ekewe läng. Iteüöch me manaman ra nonom mwan, pöchökül me ling ra nonom lon imwan mi pin.”​—Kölfel 96:4-6.

Inaamwo ika Jiowa i ewe mi Lapalap nge a etiwakich le arap ngeni lón iótek me anúkúnúkúkich pwe a aúselinga ach kewe iótek. (Kölfel 65:2) Kot a fókkun tongekich me chúngúkich, ina popun ewe aposel Johannes a pwúng an apasa: “Kot mi tong.”​—1 Johannes 4:8, Testament Mi Fö.

JESUS A ÚTÁ LEPELIEFICHIN KOT

“Stefanus a uren Ngünmifel, a anetai mesan ngeni läng o a küna lingen Kot me Jesus mi ütä lepelifichin Kot. Iwe, a üra, ‘Nengeni, üa küna pwe läng a suk o Nöün Aramas a ütä lepelifichin Kot!’”​—Föför 7:55, 56.

Me mwen án Stefanus kúna ei lángipwi, Jesus a kúna ninni ren efisien ekkeei néúwisin chón Jus Stefanus a fóffós ngeniir. Ewe lángipwi a ánnetatá pwe Jesus a manaw me manawsefál me Kot a átekiatá. Ewe aposel Paulus a makkeei usun ena iei usun: “[Jiowa] a amanauasefäli Kraist seni mäla o amota i lepelifichin lon läng. Kraist a watte an nemenem ikenan lap seni ekewe sounemenem . . . , seni ekewe manaman me ekewe samol. Wisan a tekia seni wisen ekewe sounemenem lon ei fansoun pwal lon ekewe fansoun repwe feito.”​—Efisos 1:20, 21.

Me lúkún án Paipel áweweei usun tekian wisen Jesus, a pwal áiti ngenikich pwe i a enletin chúngú aramas usun chék Jiowa. Atun Jesus a nónnóm wóón fénúfan, a echikaraatá ekkewe mi semmwen, apéchékkúla ekkewe mi apwangapwang me amanawatá ekkewe mi máló. Ren an asoresini manawan, a pwáraatá alóllóólun an tongei Kot me aramas. (Efisos 2:4, 5) Jesus a úkkúútá lepeliefichin Kot, ekiseló chék epwe anganga an nemenem me atoto feiéch wachemwuk ngeni aramas meinisin mi álleasochis.

CHÓNLÁNG RA ANGANG NGENI KOT

‘Üa [ewe soufós Taniel] nengeni o küna pwe ra amolätä lenien motun king, nge Kot [Jiowa] ewe mi nom seni me lomlom a mottiu won eu. . . . Ngeröün chon angang ra angang ngeni, nge eu mwichen million . . . ra ütä mwan.’​—Taniel 7:9, 10.

Lón ei lángipwi usun láng, Taniel ese chék kúna emén chónláng nge a kúna ngeréú me ngeréú. A ifa me amwararen ena lángipwi! Chónláng iir mi inisini inisin ngún ra ling, tipachem me manaman. Ekkóch me lein ekkewe wis ra eáni, ina serafim me kerop. Ewe Paipel a apasa ena kapas chónláng lap seni fán 250.

Ekkewe chónláng rese piin manaw wóón fénúfan. Seni lóóm lóóm, me mwen án Kot féri aramas a fen fératá ekkewe chónláng. Ekkewe chónláng ra fen nóm atun Kot a fératá fénúfan, ra kakkatol me ra mweireir fán pwapwa.​—Hiop 38:4-7.

Eú angang ekkewe chónláng mi tuppwél ra eáni ngeni Kot ina ar fitipachei ewe angang mi kon lamot wóón fénúfan ikenái, ewe angangen esilefeili ewe kapas allim usun Mwúún we. (Mateus 24:14) A fen pwáló ar fitipachei ei angang lón eú lángipwi aposel Johannes a kúna, iei alon: “Mürin üa küna pwal eman chon läng mi äkkäs fän läng, a uwei ewe Pworausen Manau esemüch pwe epwe arongafeili ngeni chon fanüfan, ngeni sokun mwich me ainang, kapas me mwü meinisin.” (Pwärätä 14:6) Inaamwo ika ekkewe chónláng rese fós ngeni aramas ikenái usun met ra féri fán ekkóch me lóóm nge ra emmweni chókkewe ra afalafala ewe pwóróus allim ngeni aramas mi letip wenechar.

SATAN A OTUPU MILLION

“A fis maun lon läng. Mikael [Jesus Kraist] me nöün kewe chon läng ra fiu ngeni ewe trakon, nge ewe trakon me nöün kewe chon läng ra pwal fiu ngeniir. Iwe, ewe trakon a kuf, nge i me nöün kewe chon läng resap chüen mwümwütä ar repwe nonom lon läng. Ewe trakon mi watte a koturuwu lükün, ewe serepenitin lom mi iteni Tefil are Satan, a atupu unusen chon fanüfan. A koturutiu won fanüfan, i me nöün kewe chon läng.”​—Pwärätä 12:7-9.

Esap fansoun meinisin láng a kinamwe. Atun Kot a kerán fératá aramas emén me lein ekkewe chónláng a eáni eú chék ekiek pwe aramas repwe fel ngeni, iwe a ú ngeni Jiowa me a wiliti Satan, weween “Chón Ú Ngeni.” Ekkóch chónláng ra fiti i lón an angangen u ngeni me wiliti chónláng mi ngaw. Iir ra fókkun ngaw, a lululó ar ú ngeni Jiowa me ra otupu lap ngeni aramas ar repwe áeá manawer le towau seni án Jiowa emmwen mi tong.

Satan me néún kewe chónláng mi ngaw ra kon ngaw me kirikiringaw. Ra oputa aramas me efisi watteen riáfféú wóón fénúfan. Áwewe chék, Satan a nieló néún Hiop emén mwán mi tuppwél kewe man me chón angang. Mwirin, a nieló meinisin néún Hiop kewe engol ren enitoon “och asepwäl mi pöchökül,” a amékkú ewe imw me turutiw woor. Mwirin ena, Satan a efeiengawa Hiop ren “kilingau o rup seni fän pechen tori won möküran.”​—Hiop 1:7-19; 2:7.

Ekiseló chék, Satan epwe kómóróló. Seni ewe atun a kóturutiw wóón fénúfan, a silei pwe “a mochomoch chök an fansoun.” (Pwärätä 12:12) Satan epwele ninniiló, esap pwe ina wesewesen eú pwóróus allim!

CHÓKKEWE SENI FÉNÚFAN

“Ka [Jesus] möni aramas fän iten Kot, ekewe aramas seni ekewe ainang me kapas me mwü me sokopaten aramas meinisin. Ka för seniir eu mwün souasor, pwe repwe angang ngeni ach Kot, nge repwe nemenem won fanüfan.”​—Pwärätä 5:9, 10.

Ekkóch repwe usun Jesus le manawetá seni fénúfan ngeni ewe manaw lón láng. Jesus a apasa ngeni néún kewe aposel mi tuppwél: “Üpwe feila o amolätä leniemi. . . . Üpwe pwal liwinsefälito o angeekemi, pwe oupwe nonom rei, pwe ia ngang üpwe nom ie, iei ämi oupwe pwal nom ie.”​—Johannes 14:2, 3.

Chókkewe repwe ló láng repwe feiló ren eú popun. Repwe eti Jesus le nemenem lón ewe Mwúún Kot, repwe nemeni meinisin chón fénúfan me atoto feiéch ngeniir. Iei ewe Mwú Jesus a ereni néún kewe chón áppirú ar repwe ióteki lón ewe iótekin ach Samol: “Semem lon läng. Itom epwe pin, Mwum epwe war, letipom epwe fis won fanüfan usun chök lon läng.”​—Mateus 6:9, 10.

MET CHÓKKEWE LÓN LÁNG REPWE FÉRI?

“Üa [ewe aposel Johannes] rong mwelien eman mi leüömong a kapasowu seni ewe lenien motun king, ‘Nengeni, imwen Kot a nom lein aramas! . . . Epwe talüpwasei chönün mas seni won meser meinisin. Esap chüen wor mäla ika letipeta ika kechü ika cheuch, pun ekewe mettochun lom ra morola.’”​—Pwärätä 21:3, 4.

Ei lángipwi a weneiti ewe fansoun ewe Mwúún Kot epwe mwékút le asopwaló án Satan nemenem me ewilaaló fénúfan ngeni eú paratis, chón nemenem lón ei Mwú, Jesus me ekkewe mi manawsefál seni fénúfan. Ekkewe mettóch mi efisatá watteen metek me letipeta ngeni aramas resap chúen wor. Pwal mwo nge máló epwe móróló.

Nge repwele fet ekkewe fite billion aramas ra máló resap manawsefálitá ngeni manaw lón láng? Lón ekkan fansoun mwach repwe manawsefál fitifengen me tongeni kúna ewe feiéch ar repwe manaw feilfeiló lón ena Paratis wóón fénúfan.​—Lukas 23:43.