Ka Silei Met Sokkun Älillis Kopwe Etiwa?

Ekkewe aposel me sou emmwen ra mwichfengen le pwüngüpwüngfengen woon menni allük Chon Kraist meinisin repwe älleasochisi. Iei met ra apwüngalo fän emmwenien än Kot manaman mi fel: “Aisap anomu womi och chou, pwe ekei chök allük oupwe apwönüretä: Ousap mongö ekewe mongö ra piin asor ngeni ekewe uluulun anümwäl, ousap ün cha, ousap ochoch fituken man mi ffor, ousap föri sokun lisowu.” (Fof. 15:28, 29; 21:25) Weween, sipwe ‘tüttümünükich seni chcha.’ Me ren Kot, lamoten ach föri ena a usun chök lamoten ach tümünükich seni fel ngeni ululun me föfförün lisowu mwääl.

Itä ach tümünükich seni IV chcha a kapachelong lon ena allük? Ewer. Äwewe chök: Ika emön tokter a erenuk pwe kopwe tumunuk seni sakaw, itä kosap ün nge kopwe tongeni opposaalong lon inisum? Aapw! Pwal ina chök usun, ach tümünükich seni chcha a wewe ngeni ach sisap minalong are mut ngeni emön an epwe opposaalong chcha lon inisich.

E fet ika emön Chon Kraist a feiengaw are a lamot an epwe reirei? Ika a aücheani än Kot we liffangen manau, iwe epwe etiwa ekkoch minen älillis ese fiti äeämwäällin chcha. Ina minne, epwe etiwa ena sokkun älillis me siwilin IV chcha.

Ka fen filatä met sokkun älillis en me chon om famili oupwe etiwa? Ka fen amasoua noum DPA card? Nengeni Ewe Leenien Mas, minen October 1, 2004, pekin taropwe 8-18. Mwirin, nengeni Ach Angangen Afalafala ewe Mwu, minen November 2006, itelapan, “Epwe Met Filiei Usun Kinikisitiuen Ekkewe Kifetin Chcha me Ekkewe Minen Älillis lon Pioing Mi Äeä Chchai?” Lon ena, a wor ewe taropween sossot kopwe amasoua ren met ka pwisin filatä. Mwirin, ka tongeni walong lon noum DPA card minne ka makkeei. A lamot pwe kopwe esile ngeni chon om famili rese fiti ach lükü me iö kewe ra mak lon noum we DPA card usun filiom kewe.