Äeä Ekkeei Afalafal

Le Poputääni Käeöön Paipel lon ewe Äeüin Ammol fän February

Ngeni ewe chon imw ewe taropwe itelapan Ka Mochen Silei ewe Enlet? me äiti ngeni ekkewe kapas eis woon ewe taropwe me apasa: “Ikkeei ekkoch kapas eis a fataffatöch pölüwer seni Paipel. Ka fen eäni eü me lein ekkeei kapas eis?” Mwirin än ewe chon imw pölüweni, pworausfengen woon pölüwen eü me lein an kewe kapas eis seni ewe taropwe, me älleani eü me lein ekkewe wokisin. Akkota ineet kopwe liwiniti pwe oupwe pworaus woon pwal eü kapas eis lon ewe taropwe.

Ewe Leenien Mas January 2012

“Ka fen mwo ekieki ika pwata a chommongolo ekkewe feiengaw watte lon ekkeei fansoun? [Aüseling ngeni meefian.] A mmen amwarar pwe ewe Paipel a fen oesini pwe ekkewe feiengaw watte repwe eü esissil. [Älleani Mattu 24:7, 8.] Ei Leenien Mas epwe pölüweni ekkeei kapas eis: Pwata sia kükküna chommong feiengaw watte ikenäi? Itä iir kapwüng seni Kot? A wor ekkewe popun sipwe lükü pwe ekiselo chök Kot epwele aükatiw ekkewe feiengaw watte.”

Ewe Leenien Mas January 2012

“Chommong aramas ra meefi pwe Kot a äeä ekkewe feiengaw watte le apwüngü aramas. Nge en, met meefiom usun ena mettoch? [Aüseling ngeni meefian.] Ekkewe feiengaw watte ra kküü aramas meinisin. Ewe Paipel a affata pwata Kot esap apwüngü aramas mi pwüng ren eü feiengaw watte. [Älleani 1 Jon 4:8.] Ei Leenien Mas a äiti ngenikich chommong popun seni ewe Paipel ika pwata sipwe tongeni lükülük pwe Kot esap fokkun apwüngü aramas mi pwüng.”