Ewe Angangen Etiwetiw fän iten ewe Ächechchem Epwe Poputä March 17
1. Ifa ewe angang epwe poputä lon March 17?
1 Ewe Ächechchem a fiffis iteiten ier a wisen esilefeili mäloon Jises. (1 Kor. 11:26) Ina minne, sia mochen pwe ekkewe ekkoch repwe pwal fitikich le rongorong usun ewe möön kepich Jiowa a liffang fän tong. (Jon 3:16) Lon ei ier, sipwe poputä lon Ammol, March 17 le etiwa aramas ngeni ewe Ächechchem. Ka mwötöresiti om kopwe unusen fiti ena angang?
2. Met sipwe apasa atun sia anöünöü ewe taropween etiwetiw?
2 Iei Met Sipwe Tongeni Apasa: A fen öch sipwe eäni eü afalafal mi mwochomwoch. Eli sia tongeni apasa: “Rän allim. Aua mochen ngonuk me om famili ei taropween etiwetiw ngeni eü mwich mi fokkun aüchea a kan fiffis woon unusen fönüfan iteiten ier, iwe, lon ei ier epwe fis April 5. Epwe wor eü afalafal epwe äweweei met än Jises mälo a fen apwönüetä me met a föfföri iei. Ei taropween etiwetiw a affata kulokun me leenien ena mwich.” Fansoun ach fiti ewe angangen ineti ewe taropween etiwetiw lon ekkewe wiikend sipwe pwal anöünöü ekkewe Leenien Mas ika mi fich.
3. Ifa usun sipwe etiwa chommong aramas ükükün ach tufich?
3 Etiwa Chommong Aramas Ükükün Om Tufich: Sia mochen etiwa chommong aramas ükükün ach tufich. Kopwe etiwa noum kewe chon käeö, ekkewe aramas ka fen chuursefäliir, aramasom kewe, chienom chon angang, chon sukul, chon orum kewe, me ekkewe aramas ka sissileer. Ekkewe elter lon en me ar mwichefel, repwe awora emmwen woon ifa usun repwe äwesaalo ewe leenien afalafal. Ach angangen etiwetiw iteiten ier fän iten ewe Ächechchem a kan sopwöch. Lon ewe ier, lupwen emön fefin a tolong lon ewe leenien mwich le fiti ewe Ächechchem, itä ewe chon älillis a mochen älisi i le chüri emönnewe a wisen etiwa. Iwe nge, ewe fefin a apasa pwe ese sissilei emön me ikkena pwe a chök angei ewe taropween etiwetiw seni emön mi afalafal imw me imw lon ewe chök rän.
4. Ikkefa ekkewe popun sipwe tinikken le fiti ewe angangen etiwetiw?
4 Eli emön me lein ekkewe mi fiti ewe Ächechchem, a fiti pokiten ka fen etiwa. Inaamwo ika ekkewe ka etiwer ra fiti are rese fiti, nge om tinikken, ina eü minen pwäraatä ngeni aramas. Ekkewe taropween etiwetiw ka einetiir epwe esilefeili pwe Jises a pöchökkül le nennemenem usun emön King. Om tinikken le fiti ei angang epwe pwäraalo ngeni aramas lon om leenien afalafal, chienom kewe chon lükü, nge äkkäeüin ngeni Jiowa pwe ka enletin aücheani ewe liffangen möön kepich.—Kol. 3:15.