Álisi Aramas le Aúseling Ngeni Kot
1. Ikkefa ekkewe brochure ra katowu lón ewe Mwichelap lón Summer, ‘Mwuun Kot Epwe War!’? Me pwata ra mmen álilliséch?
1 Lón ewe Mwichelap lón Summer, ‘Mwuun Kot Epwe War!’ a fen katowu ruu mineféén brochure, Akkaüseling ngeni Kot pwe Kopwe Küna Manau Esemuch me ewe Listen to God, mi ffér lón eú napanap mi mecheres.a Pokiten mi chék mwochomwoch kapasen lón, iwe a mwittir me mecheres le chiyakú. Ina popun, atun a katowu ewe Akkaüseling ngeni Kot pwe Kopwe Küna Manau Esemuch lón fósun Merika, a fen mumutá an epwe chiyakú lón 431 fósun fénúfan.
2. Ié kewe repwe kúna álillis seni ekkeei brochure?
2 Ié kewe repwe ákkáeúin kúna álillis seni ekkeei brochure? Sipwe ppii ekkeei mettóch iir mi fiffis wóón unusen fénúfan:
• Emén chón afalafal mi pwóppwóróus ngeni emén chón imw a kerán chuuri are niwiniti, nge a esilla pwe ena chón imw ese kon sile állea are ese fen sile állea.
• Emén chón afalafal a afalafal ngeni ekkewe aramas mi eáni eú sókkun fós nge ese kon wor néúch puk mi chiyakú lón ar na fós, are ese fen wor. Are rese tongeni álleani ekkena puk pun rese chiyakú lón pwisin fósun fénúer.
• Emén chón afalafal mi afalafal lón sign language ngeni ekkewe mi awemwéch me selingepúng lón an we leenien afalafal.
• Emén sam ika in mi mochen áiti ngeni néún we kúkkún ewe enlet nge esaamwo sile állea.
3. Ifa napanapen an a ffér ewe Listen to God?
3 Napanapen an A Ffér: Ewe brochure Listen to God, a mmen kúkkún masouen lón. Lape ngeni a chék wor fitu kapasen lón, me a wor Wokisin lón eú me eú ekkewe pekin taropwe mi menlapei ekkewe pwóróus mi lamot. Pwata? Ekieki mwo ika emén a anéúnéú ngonuk eú brochure mi mak lón eú fós kese weweiti, me neman mi sókkóló ekkewe mesen mak lón, iwe itá kopwe sani inaamwo ika a masou ren lios mi ling? Neman aapw. A pwal ina usun ekkewe aramas rese sile állea, resap kinamwe ika ra kúna ekkewe kapas lón ekkewe puk. Ina minne, a pwápwáló ekkewe lios mi fich lón eú me eú pekin taropwe me a pwal wor esissil pwe epwe emmweni ewe pwóróusfengen ngeni pwal eú lios.
4. Ifa napanapen an a ffér ewe Akkaüseling ngeni Kot pwe Kopwe Küna Manau Esemuch?
4 Léllé chék ekkewe lios lón Akkaüseling ngeni Kot pwe Kopwe Küna Manau Esemuch me Listen to God. A ffér fán iten ach sipwe káé ngeni chókkewe rese kon sile állea are ra kerán káé állea. Ewe emén mi emmweni ewe káé, a tongeni néúnéú ei brochure inaamwo ika ewe chón káé a néúnéú ewe Listen to God brochure. A wor eú kapas eis wóón peliefefinin me asen eú me eú lesen, epwe tongeni pélú me lón ekkena pekin taropwe. Kapachelong ekkewe lios mi makketiw kapaser me ekkewe wokisin. A wor ekkóch pwoor mi toputop fán lepekin ekkóch pekin taropwe me fengen pwal ekkóch pwóróus me ekkewe Wokisin sia tongeni áweweei ngeni ewe chón káé alóngólóng wóón nónnómun.
5. Ineet me ifa usun sipwe anéúnéú ekkena brochure?
5 Usun Néúnéúr: Ka tongeni anéúnéú ekkena brochure lón ewe angangen afalafal imw me imw, ineet chék ka meefi pwe a lamot óm kopwe anéúnéú, inaamwo ika esap ina maramen anéúnéú brochure. (Ppii ewe pwoor “Usun Anéúnéún.”) Ka tongeni áiti ngeni chókkewe ka churisefáliir ren óm ereni ewe emén mi mochen aúseling pwe mi wor och mettóch ka mochen áiti ngeni me eiti ngeni ewe brochure.
6. Ifa usun sipwe néúnéú ekkena brochure le káé ngeni aramas ewe Paipel?
6 Pokiten esor kapas eisin ewe Listen to God, ewe káé esap usun ach káé lón ewe puk Paipel A Apasa pún a wor kapas eisin me epwe wor pélúwan. Lón ekkewe fénú, aramas ra kan sani le aúseling pwóróus. Iwe néúnéú ekkewe lios le apwóróusa ekkewe pwóróus mi enlet mi mak lón ewe Paipel. Áweweei ekkewe lios. Kopwe mwasangasang. Etiwa meefien ewe chón káé. Álleani ekkewe wokisin fachikin ewe pekin taropwe me áweweefengeni masouan. Áeá kapas eis pwe epwe uwawu meefian me ppii ika a weweiti. Ika a néúnéú ewe Akkaüseling ngeni Kot pwe Kopwe Küna Manau Esemuch, oupwe álleanifengeni ekkewe pwóróus me wokisin atun oua pwóróus wóón eú me eú lios.
7. Ifa usun sipwe álisi néúch kewe chón káé le feffeitá?
7 Álisi ewe Chón Káé le Feffeitá: Amwo ámi pwóróusfengen epwe amwékútú noum we chón káé le mochen káé állea pwe a tongeni silei usun Jiowa. (Mat. 5:3; Joh. 17:3) Ina popun, ika oua néúnéú ewe Listen to God me eli ka tongeni ereni pwe ka mochen álisi an epwe káé állea, me ka tongeni siwili ámi káé ngeni ewe puk Akkaúseling ngeni Kot pwe Kopwe Küna Manau Esemuch. Ese lifilifil menni brochure oua néúnéú, nge ewe chón káé esap mwo mmolnetá fán iten papatais inaamwo ika a fen áwesi an káé lón ena brochure. A lamot kopwe siwili ámi káé ngeni ewe puk Paipel A Apasa are ngeni pwal ekkóch puk mi fich pwe epwe tongeni alapaaló an weweiti ewe Paipel.
8. Pwata sia kilisou ren ekkena mineféén brochure fán iten ewe angangen afalafal?
8 Ika aramas ra mochen kúna manaw esemuch, mi lamot repwe aúseling ngeni ewe mi Tekia wóón unuselapen láng me fénúfan. (Ais. 55:3) Letipen Jiowa pwe “aramas meinisin” repwe káé le aúselinga i, kapachelong chókkewe rese tongeni állea. (1 Tim. 2:3, 4) A ifa me kilisouch ren ekkena mineféén brochure sia tongeni néúnéú le áiti ngeni aramas ifa usun repwe akkaúseling ngeni Kot!
[Pwóróus fan]
a Mi wor lón fósun Merika.
[Pwóór lon pekin taropwe 3]
Usun Anéúnéún
Áiti ngeni ewe chón imw ekkewe pekin taropwe 2-3 me apasa: “En mi mochen manaw lón eú fénúfan usun chék ei? [Aúseling ngeni meefian.] Ewe Paipel a pwonei [are, ei puk mi pin a pwonei] pwe Kot epwele féri pwe ei fénúfan epwele wiliti eú leeni mi ling me kinamwe, ikewe esap chúen wor osupwang are semmwen ie. Nengeni met a lamot ach sipwe féri pwe sipwe nónnóm lón. [Álleani Aisea 55:3, ewe mi mak asen pekin taropwe 3.] A erenikich pwe sipwe ‘feito’ ren Kot me ‘aúseling’ ngeni. Nge ifa usun sipwe aúseling ngeni Kot?” suuki ngeni pekin taropwe 4-5 me pwóróus ngeni wóón pélúwan. Ika esor an fansoun, likiti ngeni ewe brochure me akkóta ineet kopwe liwin me pwóróus ngeni wóón pélúwan.