Etiwaéchúúr!
1. Ineet a suuk ngenikich ewe fansoun mi fókkun múrinné fán iten ewe angangen pwáraatá me pwata?
1 Ese wor eú fansoun me lúkún ewe Áchechchem a fis iteiten ier epwe atufichikich lón ach angangen pwáraatá. Ekieki ei mettóch, lón ei ier sia ekieki pwe epwe wor lap seni engol million repwe fiti ewe Áchechchem me rongorong usun ekkewe ruu esissillen tong mi lapalap mi pwáló ren ewe méén kepich. (Joh. 3:16; 15:13) Repwe káé usun ekkewe feiéch mi suuk ngeniir pokiten án Jiowa we liffang. (Ais. 65:21-23) Iwe nge, sap minne ewe chék mi wisen afalafal epwe awora ewe minen pwáraatá lón ena fansoun. Atun ena Áchechchem a suuk ngenikich meinisin ach sipwe fiti ewe angangen pwáraatá ren etiwetiwéchúch ngeni ekkewe waséla.—Rom 15:7.
2. Ifa usun sipwe tongeni etiwaéchú ekkewe ra etto fiti mwich?
2 Lap seni óm kopwe chék kútta ia kopwe mómmót ie me witiwiti an ewe mwich epwe poputá, pwata kese erá itom ngeni ekkewe ra nóm únúkúm? Eli ekkewe ra etto fiti ewe mwich ra niwokkus me rese silei met epwe fis. Nge ach emelimel me chiechiéch ngeniir epwe tongeni álisiir le meefi kinamwe me tiwéch. Ren óm kopwe silei ika ena emén a etto pokiten an emén ngeni ewe taropween etiwetiw, eli kopwe eis ika a kerán ina an fiti eú me lein ach kewe mwich are a sissilei emén lón ach we mwichefel. Neman ka tongeni etiwa pwe epwe mómmót reom pwe oupwe néúnéúfengen noum Paipel me puken kél. Ika sia mwich lón ewe Leenien Mwich, iwe, meni kopwe tongeni ekis eppii ngeni ewe leeni. Mwirin ewe afalafal, awora óm fansoun le pélúweni an kewe kapas eis. Ika óm mwichefel epwe mwittir feiló pokiten mi wor pwal eú mwichefel epwe áeá ewe leeni, eli kopwe apasa: “Ua mochen silei ekiekum usun ach ei mwich. Ifa usun sipwe tongeni fósfengensefál?” Iwe akkóta pwe kopwe fós ngeni lón pwal eú rán. Ákkáeúin ekkewe elter repwe ppii pwe repwe apéchékkúla ekkewe rese chúen akkapwénúetá wiser wisen Chón Kraist mi fiti ewe mwich.
3. Pwata a lamot ach sipwe achocho le etiwaéchú ekkewe waséla atun ewe Áchechchem?
3 Chómmóng waséla lón ena fansoun repwe kerán kúna pwapwaan, kinamween, tipeeúin néún Jiowa kewe aramas pokiten ar riri ngeni. (Kölf. 29:11; Ais. 11:6-9; 65:13, 14) Met ekkeei waséla repwe chechchemeni mwirin ar fiti ewe Áchechchem? Epwe lóngólóng wóón ach achocho le etiwaéchúúr.