Amúrinnéló Tufichich lón ewe Angangen Afalafal ren Ach Pélúweni Kapasen Eppet

Pwata A Lamot: Ekieki pwe ka silei pwe a wor feiengaw watte epwele fis. Aramas repwe máló chilóón chék ika ra nónnóm lón eú leeni mi túmún. Ka feiló ren imwen chón órum me éúréúra. Iwe nge, a pékú óm pwóróus me apasa pwe ese tawe. Nge inaamwo, kesap pwal mwittir fangetá le éúréúra me álisi! Chómmóng lón leeniach rese áfánnikich, rese fen weweiti aúchean ewe pwóróus sia uwei pwe a tongeni amanawer. Neman ra angang atun sia chuuriir. (Mat. 24:37-39) Are meni ra oputakich pokiten ra rong pwóróus usuch nge mi mwaken. (Mat. 11:18, 19) Eli ra ekieki pwe kich mi usun chék ekkewe lamalam mi wor chóchóór nge ra féri met ese pwúng. (2 Pet. 2:1, 2) Ika ewe chón imw ese mochen aúseling me lepoputáán, a lamot sisap mwittir fangetá.

Usun Ach Féri:

Me mwen óm kopwe afalafal imw me imw, néúni fitu minich le ekieki ifa usun kopwe tongeni pélúweni chókkewe repwe eáni kapasen eppet.
Ika ewe chón imw a eáni kapasen eppet, mosonoson le sópweló óm pwóróus ngeni. Eli ka tongeni féri ena ren óm apúnga. Áwewe chék, ika a erá pwe a wor pwisin an lamalam, ka tongeni apasa, “Ua kan áneánei le chuuri emén mi sani pwóróusen Kot usun chék en.” Fán ekkóch ach áfánni meefien chón imw are nónnómun epwe tongeni efisi ach sipwe sópweló le afalafal ngeni. Ren chék áwewe, ika a erá pwe a osukosuk, ka tongeni apasa, “Ua kúna pwe ka osukosuk, nge me mwen upwe ló, ua mochen ngonuk ei puk.” Pwal eú, kopwe eáni kapas eis ika chón imw a erá pwe ese mochen aúseling. Ka tongeni erá, “Weween pwe kese lien pwapwaiti Paipel are kese lien pwapwaiti pwóróusen lamalam?”
Kopwe eáni ekiekéch. Chechchemeni pwe Jiowa ese eriáni aramas ar repwe aúseling. (Tut. 30:19) Emén me emén epwe pwisin mwárei osan mwen mesen Jiowa. (Kal. 6:5) Ika ewe chón imw ese fókkun mochen, epwe kon múrinné ach sipwele feiló. Ren ach pwáraatá súfél ngeni meefian, eli lón ekkan rán mwach pwal emén chón afalafal epwe tongeni afalafal ngeni.—1 Pet. 3:15.

Sótuni fán ei Maram:

Atun ka chuuri emén mi eáni kapasen eppet me mwirin óm feiló seni, pwóróusfengen me chienom we usun óm pélúweni ewe chón imw nge lón eú napanap itá epwe múrinné seni.