Ámúrinnééló Tufichich lón ewe Angangen Afalafal ren Ifa Usun Sipwe Pélúweni Emén Chón Imw mi Fókkun Song

Pwata A Lamot: Lón ach angangen afalafal, sia chuuri chómmóng aramas mi pwáraatá súfél. Iwe nge, Jesus a oesini pwe ekkóch repwe oputakich. (Joh. 17:14) Ina popun sisap máirú ika sia chuuri emén chón imw mi song. Ika a fis ena, sia mochen pélúweni lón napanap ewe emén sia tupuni, Jiowa, epwe pwapwa ren. (Rom 12:17-21; 1 Pet. 3:15) Ach féri ena epwe álisi an esap lapóló ewe osukosuk. Epwe pwal eú minen pwáraatá ngeni ewe chón imw me ekkewe ekkóch mi nennengenikich pwe epwe efisi ar repwe mochen aúseling lón pwal eú atun emén Chón Pwáraatá Jiowa a chuuriir.—2 Kor. 6:3.

Usun Ach Féri:

Ákkeáni napanap mi mosonoson me chiechiéch. Ena epwe álisi an epwe akúkkúnaló an we song. Kosap ekieki pwe tipisum popun an a ina usun ewe chón imw. (SalAf. 7:9) Neman a song pokiten an pwisin osukosuk are pokiten ka etto nge ese tawe. Ikaamwo ewe chón imw a song ren ach afalafal, nge lape ngeni a ina usun pokiten an tupuló ren ekkewe ekkóch.—2 Kor. 4:4.
Pélúweni fán kirekiréch me kapas pwetete. (SalF. 15:1) Neman ikkeei ekkewe úlúngát popun ewe chón imw epwe song ngeni ekkewe Chón Pwáraatá Jiowa: (1) Ka atai an annut are aúkatiw seni met a féri? Ikaamwo sise kan okkomusomus pokiten ach ei angang nge sia tongeni omusomus fán tipetekison ren ach etto atun ra osukosuk. (2) Itá a song pokiten a rong och pwóróus mi mwaken usuch? Ika ina, neman ka tongeni erá: “Ua weweiti popun ka song. Iwe nge, minne ka rongorong usúm ese pwúng. Ua tongeni áweweei?” (3) Itá a song pokiten ese tipeeú ngeni eú me lein ach kewe afalafal neman angangen katowu are áeáán chcha? Ka tongeni erá: “Ua weweiti. Ekkóch a pwal ina usun ar ekiek. Ua tongeni áiti ngonuk seni Paipel lóngólóngun ena afalafal?”
Ika ewe chón imw a kon lingeringer, neman epwe múrinné óm kopwe ló nge kosap pwal pélúweni. Ika a erá pwe Chón Pwáraatá Jiowa sisap chúen chuuri, iwe kopwe alúkúlúkú pwe minne a mochen epwe fis.

Sótuni fán Ei Maram:

Awora fansoun le asóssót atun ámi famili fel.
Mwirin ámi feiló seni ewe chón imw mi song, pwóróusfengen me chienom we ren ifa usun itá óm kopwe pélúweni ewe chón imw lón eú napanap epwe múrinné seni.