1922​—Ipúkú Ier A Ló

‘A MMEN ÁMMESEIK ENA EKIEK’

Atun a lapóló chóchóón pwiich kewe mi fiti ewe angangen afalafal, a pwal lapóló ar need néúch kewe puk. Pwiich kewe lón Bethel lón Brooklyn, New York ra kan féri néúch kewe magazine, nge néúch kewe puk ekkewe kompeni lúkún Bethel ra chúen printini. Nge ren fitu maram, ese chúen ki ngeni ekkena kompeni ar repwe printini ewe úkúkún puk sia need fán iten ewe angangen afalafal. Ina popun, Pwiich Rutherford a eisini Pwiich Robert Martin, ewe mi wisen túmúnú ewe leenien print, ika mi tufich ach sipwele pwisin féri me printini néúch kewe puk.

Iei alon Pwiich Robert Martin, “A mmen ámmeseik minne Pwiich Rutherford a ekieki, pún a wewe ngeni pwe sipwele poputááni eú leenien ffér puk.” Iwe, pwiich kewe ra rentini eú leeni lón 18 Concord Street lón Brooklyn me ra mééni eú mwesinen print.

Esap meinisin ra pwapwa ren án pwiich kewe repwele wisen féri néúch kewe puk. Ewe presetenin ewe kompeni mi kan wisen printini néúch kewe puk a ló katol ena mineféén leeni. Iwe a erá: “A fen nóm remi ei mwesinen print mi fókkun múrinné, nge ese wor emén leimi mi silei áeáán. Mwirin wonu maram oupwele fen atai ámi ei mwesin.”

Pwiich Martin a erá, “Usun mi fen pwúng met átena a apasa, nge aua chék likiti ngeni Jiowa mettóch meinisin pún fansoun meinisin a chék álisikem.” A mmen pwúng alon Pwiich Martin na pún ekiseló mwirin, ena mineféén mwesinen print a kan féri 2,000 puk iteiten rán.

RA AFALAFAL NGENI CHÓMMÓNG ARAMAS WÓÓN REITIO

Me lúkún án néún Jiowa kewe printini pwisin néúch kewe puk, ra pwal poputááni eú alen ar repwe esilefetálei ewe kapas allim, ina ren ar néúnéú reitio. Lón February 26, 1922, leolowasen Ráninfel, ina ewe áeúin atun Pwiich Rutherford a eáni afalafal wóón reitio, lón ewe reitio station KOG Los Angeles, California, U.S.A. Itelapen an we afalafal “Fite Million mi Manaw Iei Resap Máló.”

Ina epwe 25,000 aramas ra aúseling ngeni ena prokram. Ekkóch me leir ra tiinaaló taropween kilisou ren ena afalafal. Eché taropwe a feito seni Willard Ashford, chón Santa Ana, California. A kilisou ren án Pwiich Rutherford afalafal mi “amwasangasang me múrinné.” A pwal apasa: “Lón imwem ei, a wor úlúmén mi samau, ám ause kan tongeni towu seni imwem ei. Ina popun ika ewe afalafal ese fis wóón reitio, iwe ausap tongeni rong, pwal mwo nge ika ewe afalafal epwe fis lón ewe leeni mi kkan ngeni imwem ei.”

A katowu pwal ekkóch afalafal wóón reitio lón ekkewe wiik mwirin. Lemuchúlóón ena ier 1922, me ren ewe The Watch Tower, “ina epwe 300,000 aramas ra rongorong ekkewe afalafal wóón reitio.”

Pokiten met ekkewe chón rong ra apasa me néúr kewe taropwe, ekkewe Chón Káé Paipel ra apwúngaló ar repwe aúetá eú reitio station lón Staten Island, ese pwal towau seni Brooklyn Bethel. Lón ekkewe ier ra feito, ra áeá ena station WBBR le esilefetálei pwóróusen án Kot we Mwú ekis meinisin.

“ADV”

Ewe The Watch Tower minen June 15, 1922 a esilei an epwe fis eú mwichelap lón Cedar Point, Ohio seni September 5 ngeni 13, 1922. Ekkewe Chón Káé Paipel ra fókkun mwétéres lupwen ra wareiti Cedar Point.

Iei alon Pwiich Rutherford lón an we afalafalen lepoputáán: “Ua fókkun lúkúlúk pwe ewe Samol epwe . . . efeiéchú ei mwichelap me epwe efisi eú watteen angangen afalafal esaamwo fis fán eú wóón unusen fénúfan.” Fán fite, chókkewe mi eáni ekkewe afalafal lón ena mwichelap ra pesei pwiich kewe le fiti ewe angangen afalafal.

Mwirin lón Enimu September 8, ina epwe 8,000 aramas ra tolong lón ewe leenien mwich me ra mwétéresiti le rong án Pwiich Rutherford afalafal. Ra áneánei an epwe áweweei weween ekkewe úlúngát mesen mak “ADV” mi mak lón néúr kewe taropween etiwetiw. Atun ra mómmóót, ese mwáál ra kúna ewe chémmóngun taropwe mi numw asetáán ewe stage. Arthur Claus a sái seni Tulsa, Oklahoma, U.S.A. ren an epwe fiti ei mwichelap, me a kúna eú leenien móót ikewe a tongeni fataffatéch me ie an rongorong ekkewe afalafal. A áweires lón ena fansoun pún ese wor maik are speaker an epwe tongeni léúwommóng ewe chón afalafal.

Ren an epwe fis fán kinamwe án Pwiich Rutherford we afalafal, ewe chón átettel a esilesil pwe ese chúen mumutá án aramas repwe tolong lón ewe leenien mwich atun a fen poputá ewe afalafal. Lón 9:30 a.m. Pwiich Rutherford a poputá le aloni alon Jesus kewe mi mak lón Mateus 4:17: “A arap Mwün Läng!” Atun a áweweei ifa usun án aramas repwe rong pwóróusen ewe Mwúún Kot, a erá: “Jesus a apasa pwe lón an fansoun nónnóm, epwe féri eú angangen rás, ikewe epwe ionifengeni chókkewe mi tuppwél me let.”

Pwiich Claus a mómmóót lón ewe leenien mwich, me iei met a chemeni: “Ám aua aúselingaéchú eú me eú kapas a apasa.” Nge mwirin, pwiich na a meefi semmwen me a lamot an epwe towu. Iwe, a towu lón an lichippúng pún a silei pwe esap chúen tongeni tolongsefál.

Mwirin fitu minich, a poputá le péchékkúlsefál. A apwóróusa pwe atun a fetál ngeni ewe leenien mwich, a rong án aramas léúwommóng le episipis, iwe a fókkun mwétéres! Iwe a ekieki an epwe chék féri met ren an epwe tongeni rongorong ena afalafal mi amwarar, inaamwo a wewe ngeni an epwe tétá wóón ósun ewe imw. Pwiich Claus, i emén alúwél 23 ierin lón ena atun, a kúna alen an epwe tongeni tiketá wóón ewe óós. A wor usun asammwacho mi suuk wóón ewe óós, me ikena ie a mmen ffat ewe afalafal.

Nge mi pwal wor ekkóch chienen Arthur wóón ewe óós. Emén me leir itan Frank Johnson a feito ren me eisini, “Mi wor noum kúkkúnún naif?”

Arthur a erá: “Ewer.”

Frank a erá: “Iwe, aua fen ikkióteki ám aupwe kúna emén mi wor néún naif. Ka kúna ei chémmóngun taropwe mi numw? Iei eú esissil mi féfé ngeni ekkeei chúfél. Aúselingaéchú ewe Soukapwúng.a Atun a erá: ‘me a lamot ach sipwe esilefeili, esilefeili,’ iwe, kopwe katei ekkena fófóch sáál.”

Iwe, Arthur a witiwit fán néún we naif fengen me chienan kewe án Pwiich Rutherford epwe apasa ekkewe kapas epwe esissillatá pwe a tori fansoun epwe katei ekkewe sáál. Iwe ekiseló mwirin, a tori ewe kinikin mi lamot lón án Pwiich Rutherford we afalafal. A fókkun mwétéres me fán mwasangasang iei met a léúwommóng le apasa: “Oupwe tuppwél ngeni ach Samol me oupwe néún chón pwáraatá mi enlet. Oupwe chék ú péchékkúl tori a unusen móróló ewe lamalam chofona. Esilefetálei ewe pwóróus allim ekis meinisin. A lamot ekkewe chón fénúfan repwe silei pwe Jiowa, i ewe Kot, me Jesus Kraist i ewe King mi tekia seni ekkewe king meinisin, me ewe Samol mi lap seni ekkewe samol meinisin. Iei ewe fansoun mi lamot lap seni meinisin. Nengeni, ewe King a nemenem! Wisemi ámi oupwe esile ngeni aramas usun ena mettóch. Ina minne, esilefeili, esilefeili, esilefeili ewe King me an we Mwú!”

Arthur a erá pwe i me chienan kewe ra katei ekkewe sáál, iwe ewe taropwe a suukuló. Iwe iei met a mak lón ewe taropwe “Advertise the King and Kingdom.” Iwe ekkewe mesen mak “ADV” ina itemwochen ewe kapas lón fósun Merika “advertise,” mi weneiti án emén epwe “afalafal” are “esilefeil.”

EÚ ANGANG MI LAMOT

Ewe mwichelap lón Cedar Point a álisi pwiich kewe le nefótófót wóón ewe angang mi lamot, ina ewe angangen afalafala pwóróusen ewe Mwúún Kot, me chókkewe mi mochen ra pwapwa le fiti ei angang. Iei alon emén pioneer seni Oklahoma, U.S.A, “Aua kan afalafal lón ewe leeni ikewe chómmóng aramas iir chón ttu féúchól fán pwúl, me ra fókkun wéúngaw.” A erá pwe fán chómmóng atun aramas ra rong ewe pwóróus mi mak lón ewe puk Golden Age, “ra poputá le kechiw.” A erá: “A eú feiéch ám aua tongeni awora ngeniir pwóróus mi oururuur.”

Ekkena Chón Káé Paipel ra meefi atapwalapwalen alon Jesus keei lón Lukas 10:2 “Ewe räs a fokun watte, nge ekewe chon angang lon ra chokükün.” Muchúlóón ena ier, ra fókkun tipeppós le esilefeili pwóróusen ewe Mwú ekis meinisin.