Ewe Áeménún Mwán Me Ewe Áeménún Fefin

PWATA a sókkóló ei lios seni ewe mwan? Pún a wor aramas lón ei lios. Ikkeei iir ewe áeménún mwán me ewe áeménún fefin. Ié a fériir? Kot. En mi silei itan? Itan Jiowa. Iwe, iten ekkena mwán me fefin, Atam me Efa.

Iei usun án Jiowa Kot fératá Atam. A angei och súsú seni ewe pwúl, iwe, a anapanapa ngeni eú inis mi unuséch, usun inisin emén mwán. Mwirin, a usi lón pwéétún ewe mwán, iwe a poputá le ngasangas, a pwáátá me fetál.

Jiowa Kot a ewisa ngeni Atam eú angang. A ereni Atam pwe epwe eita ekkewe sókkópaten man meinisin. Eli Atam a nennengeni ekkewe man fansoun langattam ren an epwe eita ngeniir ekkewe it mi fichitiir meinisin. Atun Atam a eita ekkewe man, a kerán weweiti och mettóch. En mi silei met ena?

Ekkewe man meinisin a wor pwúlúwer. A wor papa elefán me mama elefán, iwe a pwal wor papa laion me mama laion. Nge Atam ese wor pwúlúwan. Ina popun, Jiowa a améúraaló Atam pwe epwe annutochou, iwe a angei efóch chúrárán seni lepekin. Jiowa a fératá emén fefin fán iten Atam seni ei chúrárá, iwe, neminnewe a wiliti pwúlúwan.

A ifa me pwapwaan Atam lón ena atun! Ekieki mwo pwapwaan Efa ren an nóm lón eú leeni mi lingéch! Iei repwele tongeni néúnéú, iwe repwe tongeni nomfengen fán pwapwa.

Jiowa a mochen pwe Atam me Efa repwe manaw tori feilfeiló chék. A mochen pwe repwe féri ach ei fénúfan an epwe lingéch usun chék ewe leeni Eten. Ese mwáál a watte pwapwaan Atam me Efa ar ra ekiekin apwénúetá wiser ei! Nge en, kese fen pwal mochen fiti ena angangen féri ei fénúfan an epwe eú leeni mi lingéch? Nge pwapwaan Atam me Efa ese sópwósópwóló. Sipwe ppii ika pwata.