Kot A Féraatá ewe Áeménún Mwán me Fefin

Jiowa a féri eú tánipi lón ewe leeni itan Ichen. A wor sókkopaten péénirá, man, me irá lón. Mwirin, Kot a féri ewe áeménún mwán itan Atam seni pwúl me a usi lón pwéétún. Ka silei met a fis mwirin? Ena mwán a manaw! Jiowa a ereni Atam an epwe túmúnú ewe tánipi, me eita meinisin ekkewe man.

Jiowa a ngeni Atam eú allúk mi lamot. A ereni: ‘Ka tongeni mwéngé seni iráán ei tánipi meinisin chilóón chék efóch irá mi aúchea. Iká ka mwéngé seni ena irá, iwe kopwe máló.’

Mwirin Jiowa a erá: ‘Úpwe féri emén epwe álisi Atam.’ A annuta Atam, iwe a angei seni efóch chúrárán pwe epwe féri emén pwúlúwan. Itan we, If. Atam me If iir ewe áeúin famili wóón fénúfan. Met meefien Atam atun a kerán kúna If? Atam a fókkun pwapwa me a erá: ‘Katol met Jiowa a féri seni chúúi! A kerán wor emén mi wewe ngeniei.’

Jiowa a ereni Atam me If pwe repwe néúnéú me achómmóngereló wóón fénúfan. A mochen ar repwe pwapwa le angangfengen me ewili unusen fénúfan ngeni eú paratis, are eú leeni mi ling, ussun chék ewe tánipiin Ichen. Nge ese fis ena. Pwata? Sipwe ppii lón en lesen mwirin ei.