Noa A Fala Efóch Waimw

A WOR emén pwúlúwen Noa me úlúmén néún át. Iten néún kewe, Säm, Ham me Jafet. Néún kewe meinisin a wor en me pwúlúwan. Weween, a wor walimén lón án Noa we famili.

Iwe, Kot a ereni Noa an epwe féri eú mettóch mi ámáirú ngeni. A ereni an epwe fala efóch waimw mi watte. Ewe waimw a watte usun efóch sip, nge napanapan a usun eú pwoor mi watte, pwal ttam. Kot a apasa: ‘Kopwe féri pwe tekian epwe úlúngát sássár, iwe, epwe refiref lón.’ Ekkewe ruumw repwe fán iten Noa me an we famili, ekkewe man me pwal ener mwéngé.

Kot a pwal ereni Noa an epwe féri ewe waimw pwe esap nichilóng konik lón. Kot a apasa: ‘Upwe tiinatiw eú noter mi watte, iwe, epwe ataieló unusen fénúfan. Ekkewe rese nóm lón ewe waimw repwe máló meinisin.’

Noa me néún kewe ra álleasochisi Jiowa, iwe, ra poputá le fala. Nge ekkewe aramas ra chék takir. Ra sópweló féfféringawer. Esor mwo emén e lúkú Noa lupwen a esile ngeniir met Kot epwe féri.

A langattam fansoun ar angang wóón ewe waimw pún a mmen watte. Iwe, mwirin fitu, fitu ier, a wesiló. Iei Kot a ereni Noa an epwe waalong ekkewe man lón ewe waimw. Kot a ereni Noa an epwe waalong rúúemén seni ekkóch sókkun man, emén niemwán me emén niefefin. Nge seni ekkewe ekkóch sókkun man, Kot a ereni Noa an epwe waalong fúmén. Kot a pwal ereni Noa an epwe waalong ekkewe sókkópaten machchang meinisin. Noa a féri minne chék alón Kot ngeni.

Mwirin, Noa me an we famili ra pwal tolong lón ewe waimw. Iwe, Kot a éppúngaaló ewe asam. Noa me an we famili ra chék witiwit lón. Kopwe chék ekkekieki pwe iei en mi nónnóm rer lón ewe waimw, nge oua chék witiwit. Epwe wesewesen fis eú noter usun Kot a apasa?