Ewe Noter Tori Ar Ngaseló Seni Isip

Walimén chék aramas ra kúna manaw atun a fis ewe Noter, nge mwirin och fansoun, ra chómmóngóló tori fite ngeréú. Iwe, 352 ier mwirin ewe Noter, Apraham a uputiw. Sipwe káé ifa usun Kot a apwénúetá an we pwon ren an awora ngeni Apraham emén néún át itan Isaak. Iwe mwirin, Kot a filatá Jakop seni me lein néún Isaak kewe rúúemén át.

A watte án Jakop we famili, iwe a wor engol me rúúemén néún át me pwal ekkóch nengngin. Néún Jakop kewe át ra oput pwiir we kúkkún Josef, iwe ra améméló pwe epwe emén chón angang lón Isip. Mwirin, Josef a wiliti emén mwán mi iteféúló lón Isip. Lupwen eú lengita mi watte a fis, Josef a sótuni pwiin kewe pwe epwe ppii ika a fen siwil letiper. Mwirilóón, unusen án Jakop we famili, ewe mi iteni chón Israel, ra mwékút ngeni Isip. Ei mettóch a fis 290 ier mwirin án Apraham uputiw.

Lón ekkewe 215 ier mwirin, ekkewe chón Israel ra nónnóm lón Isip. Mwirin án Josef máló, ra wiliti chón angang ikena ie. Ló, ló, ló, Moses a uputiw, iwe Kot a néúnéú i an epwe angasaaló ekkewe chón Israel seni Isip. Kinikin RUU a uruwooni uruwoon met a fis lón 857 ier.