Jiowa Ese Fókkun Likitaaló Josef

Atun Josef a kalapus, Farao ewe kingen Isip a eáni fitu ttan, me ese wor emén a tongeni áweweei ngeni. Emén me lein néún Farao kewe chón angang a ereni pwe Josef a tongeni áweweei weween an we ttan. Mwittir chék, Farao a erá pwe Josef epwe etto ren.

Farao a eisini: ‘Ka tongeni áweweei ái kewe ttan?’ Josef a ereni Farao: ‘Ren úkúúkún fisu ier epwe wor chómmóng mwéngé lón Isip, mwirin epwe fis lengita ren úkúúkún fisu ier. Kopwe filaatá emén mi tipáchem an epwe isoni mwéngé pwe noum kewe aramas resap echik.’ Farao a ereni Josef: ‘Úa filuketá! Kopwe nampa ruu faai le nemenem lón unusen Isip!’ Pwata Josef a silei weween án Farao kewe ttan? Pokiten Jiowa a álisi.

Ren úkúúkún fisu ier, Josef a isoni mwéngé. Iwe mwirin, a lengita wóón unusen fénúfan, ussun met Josef a fen erá. Aramas seni ekis meinisin ra kamé mwéngé seni Josef. Seman we Jekop a rong pwe a wor mwéngé lón Isip, iwe a tiinaaló néún kewe engol át pwe repwe ló kamé ener.

Néún Jekop kewe át ra ló ren Josef, me a mwittir esiller. Nge rese silei pwe ina i Josef. Ra chapetiw mwen mesan, ussun met a fen ttana atun a chúen emén alúwél. Josef a mochen silei iká pwiin kana ra chúen kirikiringaw. Ina popun a ereniir: ‘Ámi spai. Oua feito pwe oupwe operi fénúem ei.’ Ra ereni: ‘Aapw! Ám 12 pwipwi seni Kenan. Emén me lein pwiim kewe a máló, me ewe kúkkúnúló a nóm ren semem we.’ Mwirin Josef a erá: ‘Oupwe uweato rei pwiimi we kúkkún, iwe úpwe lúkúkemi.’ Iwe ra feiló ren semer we.

Atun a it sefál enen án Jekop we famili, a tiinaaló néún kewe át ngeni Isip. Lón ei atun ra uwei Peniamin pwiir we kúkkún. Ren án Josef epwe sótuni pwiin kewe, a aopa an we kap silifer lón án Peniamin we tuken wiich, me mwirin a tipi ngeniir pwe ra solááni. Atun néún Josef kewe chón angang ra kúna ewe kap me lón án Peniamin we tuuk, pwiin kewe ra fókkun máirú. Ra tingorei Josef an epwe apwúngúúr, nge esap fen Peniamin.

Iei Josef a silei pwe pwiin kewe ra siwil. Josef ese chúen tongeni nemeni meefian. A fókkun kechiw me erá: ‘Ngang Josef pwiimi we. Semei we a chúen manaw?’ Pwiin kewe ra fókkun máirú. A ereniir: ‘Ousap letipengaw ren met oua féri ngeniei. Pún Kot a tiinieito ikeei mwemi pwe úpwe amanawakemi. Iwe oupwe mwittir feiló me uweato semei we ikeei.’

Ra liwiniti leenier we me ereni semer we ewe pwóróus mi múrinné me ra uwealó ngeni Isip. Josef me seman we ra kerán nómfengen sefál mwirin ar káimufesen lón fite ier.