Apraham, Emén Chiechien Kot

EÚ ME lein ekkewe leeni ekkewe aramas ra feiló ngeni mwirin ewe Noter, a iteni Ur. Ei leeni a wiliti eú telinimw mi aúchea pún a wor ekkóch imw mi múrinné ie. Nge ekkewe aramas mi nónnóm ie ra fel ngeni ekkewe kot chofona. A ina usun met ra pwal féri lón ewe leeni Papilon. Ekkewe aramas lón Ur me Papilon rese usun Noa me néún we Säm, ekkewe mi achocho le féri letipen Jiowa.

Iwe 350 ier mwirin ewe noter, Noa, ewe mi tuppwél a máló. Mwirin chék ruu ier, ewe mwán ka kúna lón ei lios a uputiw. I emén aramas mi fókkun aúchea me ren Kot. Itan Apraham. Iir me an we famili ra nónnóm lón Ur.

Eú rán Jiowa a ereni Apraham: ‘Kopwe sú seni Ur me aramasom, kopwe feiló ngeni eú leeni ngang upwe áiti ngonuk.’ Itá Apraham a aúselinga Jiowa me likitaló meinisin kinamween manawan lón Ur? Ewer, a féri. Ina popun, pokiten Apraham a álleasochisi Kot fansoun meinisin, iwe Kot a kér ngeni chiechian.

Ekkóch me lein chón án Apraham we famili ra pwal fiti le sú seni Ur. Seman we itan Tara mi pwal fiti. Pwal néún pwiin we itan Lot a pwal fiti. Ewer, pwúlúwen Apraham we itan Sara a pwal ló. Iwe fetál, fetál, ra tori ewe leeni itan Haran, iwe, Tara a máló me ie. Ra fókkun towau seni Ur.

Mwirin och fansoun, Apraham me chón lón imwan kewe ra sú seni Haran, iwe ra tori ewe fénú itan Kanaan. Ikena ie, Jiowa Kot a apasa: ‘Iei ewe fénú upwe ngeni noum kewe.’ Apraham a kan nónnóm lón Kanaan me nóm lón ekkewe imw mangaku.

Kot a poputá le álisi Apraham ina pwata a tongeni wor néún pwiin siip, néún man me fitepúkú néún chón angang. Nge iir me Sara ese mwo wor néúr semirit.

Lupwen Apraham a ierini 99, Jiowa a apasa: ‘Ngang ua pwon ngonuk pwe en kopwe wiliti emén sam ngeni chómmóng aramasen fénúfan.’ Nge epwe ifa usun an epwe fis ena, nge Apraham me Sara ra kon chinnap, me rese chúen échún néúnéú?