A Kúna Sóssótun An Lúkú

Eperiam a áiti ngeni néún we Aisek an epwe tongei Jiowa me lúkúlúk wóón meinisin án Jiowa kewe pwon. Ina epwele 25 ierin Aisek atun Jiowa a ereni Eperiam an epwe féri och mettóch mi fókkun weires an epwe féri. Epwe met ena?

Kot a ereni Eperiam: ‘Kese mochen kopwe angei noum we áláemén pwe kopwe eáni asor ngeniei wóón eú chuuk lón ewe fénú Moria.’ Eperiam ese fókkun silei pwata Jiowa a ereni an epwe féri ena. Nge a chúen álleasochisi Jiowa.

Sorotáán ewe rán, Eperiam a uwei Aisek me rúúemén néún chón angang me ra feiló Moria. Lón ewe aúlúngátin rán, ra kúna ekkewe chuuk me towaw. Eperiam a ereni néún kewe chón angang ar repwe witiwit atun i me Aisek repwe ló eáni asor ngeni Jiowa. Eperiam a ngeni Aisek ekkewe amúch an epwe uwei, me Eperiam a uwei efóch saar. Aisek a eisini seman we: ‘Ifa i ewe man sipwe eáni asor?’ Eperiam a pélúweni: ‘Nei, Jiowa epwe wisen fang ngenikich.’

Atun ra tori ewe chuuk, ra féri eú róngen asor. Mwirin Eperiam a fééti péún me pechen Aisek me a akoonaaló wóón ewe róngen asor.

Eperiam a angei ewe saar. Lón chék ena atun, néún Jiowa we chónláng a kékké seni láng: ‘Eperiam! Kosap efeiengawa ewe át! Iei úa silei pwe ka lúkú Kot pwe ka tipemecheres le eáni asor noum we át.’ Mwirin, Eperiam a kúna emén átemwánnin siip a mwéch mecháán ren efóch irá. A mwittir epichi Aisek me a eáni asor ewe átemwánnin siip.

Seni chék ena atun, Jiowa a kér ngeni Eperiam pwe i chiechian. Ka silei pwata? Pokiten Eperiam a féri met chék Jiowa a ereni, pwal mwo nge atun ese weweiti pwata Jiowa a ereni an epwe féri.

Jiowa a erenisefál Eperiam an we pwon: ‘Úpwe efeiéchuk, me achómmóngaaló mwirimwirum kewe.’ Ena a wewe ngeni pwe Jiowa epwe néúnéú án Eperiam famili le efeiéchú meinisin aramas mi pwúng.