Pwúlúwen Lot We A Nesefál

LOT me an we famili ra nónnómfengen me Apraham lón ewe fénú Kanaan. Eú rán Apraham a ereni Lot: ‘A nafangawoló fénúach keei fán iten néúch kewe man meinisin. Kese kan mochen sipwele káimufesen. Ika kopwe feiló epek, iwe ngang upwe nónnóm lón ewe epek.’

Lot a nennengeni ewe fénú. A kúna eú kinikin lón ewe fénú mi fókkun múrinné mi wor konik me pwal chómmóng fetil fán iten néún kewe man. Iten ena leeni, Jortan. Iwe, Lot a eleenia an we famili me pwal néún kewe man ikena ie. Fetál, fetál, ra nónnómóló lón ewe telinimw Sotom.

Ekkewe chón Sotom ra fókkun ngaw. A eletipengawa Lot pún i emén mwán mi pwúng. Jiowa a pwal letipengaw. Iwe, a tiinaaló rúúemén chónláng ar repwe esilei ngeni Lot pwe epwe ataieló Sotom me pwal ewe telinimw únúkkún Sotom, itan Komora, pún iir mi ngaw.

Ekkewe chónláng ra ereni Lot: ‘Kái! Oule towu, en me pwúlúwom we me pwal néúmi kewe rúúemén fépwúl!’ Pokiten Lot me an we famili ra ekis mmang le towu, iwe ekkewe chónláng ra angolói kumuchur kewe me pwal emmweniir seni ewe telinimw. Iwe, emén lein ekkewe chónláng a apasa: ‘Oule ssá ngeni manaw! Oute nennesefál. Súúri ekkewe chuuk, pwe oute máló.’

Lot me néún kewe fépwúl ra álleasochis le sú seni Sotom. Rese kaúló ekis, rese pwal nennesefál. Nge pwúlúwen Lot we a álleasolap. Mwirin ar ra fen ekis towau seni Sotom, a kaúló me nesefál. Iwe, pwúlúwen Lot we a wiliti úrelapen salt. En mi kúna lón ei lios?

Sia tongeni káé eú lesen mi múrinné seni ei pwóróus. A áiti ngenikich pwe Kot a amanawa ekkewe mi álleasochisi i usun chék Lot me néún kewe fépwúl, nge ekkewe rese álleasochisi usun chék pwúlúwen Lot we, epwe péút seniir manawer.