Chechchemeni Pwúlúwen Lot We

Lot a nóm ren Eperiam, tettelin seman, lón ewe fénú Kenan. Ló, ló, ló, a wor chómmóng néún Eperiam me Lot man, iwe rese chúen kuch ar repwe nómfengen lón ena fénú. Eperiam a ereni Lot: ‘Sise chúen tongeni nómfengen lón eú leeni. Kese mochen kopwe filaatá menni leeni ka mochen ló ngeni, iwe úpwe feiló ngeni ewe epek.’ Eperiam ese chék ekieki pwisin i, iká met?

Lot a kúna eú leeni mi ling kkan ngeni ewe telinimw itan Sotom. A chómmóng konik me pwal fetil. Iwe, a filaatá ena leeni me a uwei an famili ngeni ikena.

Ekkewe aramasen Sotom me ewe telinimw únúkkún itan Komora ra fókkun ngaw. Ren enletin, Jiowa a filaatá le atai ekkena telinimw pokiten ekkena aramas ra fókkun ngaw. Nge Kot a mochen amanawa Lot me an famili, ina popun a tiinaaló rúúemén chónláng pwe repwe ereniir: ‘Oupwe mwittir towu seni ei telinimw! Jiowa epwele ataieló.’

Lot ese mwittir sú. A akkammang. Iwe, ekkewe chónláng ra kémwéch péún Lot, pwúlúwan we, me néún kewe rúúemén nengngin me ra mwittir towu seni ewe telinimw me ra ereniir: ‘Oupwe ssá pwe oupwe kúna manaw! Nge ousap kulusefál. Iká oua kulusefál, oupwe máló!’

Atun ra tori ewe telinimw itan Soar, Jiowa a apúngatiw ekkei me primiston, eú sókkun faw mi mwittir le nget, wóón Sotom me Komora. Ekkena ruu telinimw ra unusen taló. Atun pwúlúwen Lot we a álleasolapa Jiowa ren an kulusefál, a wiliiti efóch úresalt! Nge Lot me néún kewe nengngin ra manaw pokiten ra álleasochisi Jiowa. Eli repwele fókkun letipengaw pokiten pwúlúwen Lot we ese álleasochis. Nge ra pwapwa pokiten ra aúseling ngeni met Jiowa a ereniir.