Ekkewe Nippwe Mi Sókkofesen Napanaper

EKKEEI rúúemén át a kon sókkofesen napanaper, ika met? En mi silei iter? Iten ei souppek man, Esau, nge ei át mi mammasa ei siip, Jakop.

Esau me Jakop, iir néún Isaak me Repeka kewe nippwe. Ewe sam, Isaak, a kon sani Esau, pún a mmen angéch le ppek man, iwe a kan uwouto enen ar we famili. Nge Repeka a kon tongei Jakop, pún i emén át mi mosonoson.

Semer we chinnap Apraham a chúen manaw, iwe sia tongeni chék ekieki án Jakop mochen rongorong an epwe fós usun Jiowa. Fetál, fetál, Apraham a máló lón an 175 ierin, nge ekkewe nippwe a 15 ieriir.

Lupwen a 40 ierin Esau a pwúlúweni fefin seni ewe fénú Kanaan. Ei féffér a fókkun eletipechowu Isaak me Repeka, pún ekkeei fefin rese kan fel ngeni Jiowa.

Iwe lón eú rán, a fis och mettóch mi efisi án Esau fókkun song ren pwiin we Jakop. A tori ewe fansoun lupwen Isaak epwe apasa och kapasen efeiéch ngeni néún we mwánichi. Pokiten Esau a watte seni Jakop, Esau a chék lúkú pwe epwe tori ewe feiéch. Nge me mwan a fen ekkesiwil ngeni Jakop wóón mwéngé, weween ese aúcheani án seman we liffang ngeni. Pwal och, lupwen ekkewe rúúemén át ra uputiw, Kot a fen apasa pwe epwe tori Jakop ewe feiéch. Iwe, a ina usun met a fis. Isaak a ngeni néún we Jakop ewe feiéch.

Iwe mwirin, atun Esau a silei, a fókkun song ngeni Jakop. A kon watte an we song pwe a erá epwe nieló Jakop. Lupwen Repeka a rongorong ei a fókkun lólilen. A pwal lólilen ika Jakop epwe pwúpwúlú fin Kanaan. Iwe, a ereni pwúlúwan we Isaak: ‘Epwe wesewesen ngaw ika pwal Jakop a pwúpwúlú Kanaan.’

Pokiten ena, Isaak a kéri Jakop me ereni: ‘Kosap pwúpwúlú Kanaan. Kopwe fen feiló ren imwen Petuel, semen inom we me lón Haran. Kopwe pwúlúweni emén me lein néún tettelin semom we, Lapan, kewe fépwúl.’

Jakop a aúseling ngeni seman we, iwe mwittir chék a poputá an sáittam ngeni ia aramasan kewe ra nónnóm ie me lón Haran.