Jekop me Iso Ra Efisi Kinamwe Lefiler

Jiowa a pwonei ngeni Jekop pwe epwe túmúnú i ussun chék an túmúnú Eperiam me Aisek. Jekop a nónnóm lón eú leeni itan Haran, me ikena ie, a pwúpwúlú, watteeló an we famili, me a pisekisekiló.

Ló, ló, ló, Jiowa a ereni Jekop: ‘Kopwe liwiniti fénúom.’ Iwe, Jekop me an we famili ra poputá ar sáittam. A wor ekkóch aramas ra feito ren Jekop me ereni: ‘Pwiium we Iso a feito, me a wor 400 mwán ra fiti!’ Jekop a niwokkus iká Iso epwe efeiengawa me an we famili. A iótek ngeni Jiowa: ‘Kese mochen túmúnúei seni pwii we.’ Sorotáán ewe rán Jekop a tiinaaló chómmóng an liffang ngeni Iso, choweán siip, siike, kou, kamel, me aas are donkey.

Lupwen a pwiin, Jekop a chék ákkáláemén, iwe a kúna emén chónláng me ra aúlap! Weween Jekop a turufi ena chónláng nge ewe chónláng a achocho an epwe pichiló. A fis ena tori akkar a tétá. Inaamwo iká Jekop a feiengaw, nge ese fangetá. Ena chónláng a ereni: ‘Kose mochen likitieila.’ Nge Jekop a erá: ‘Aapw, úsap fokun likitukela tori óm kopwe efeiéchúei.’

Iwe, ewe chónláng a efeiéchú Jekop. Iei Jekop a silei pwe Jiowa esap mut ngeni Iso an epwe efeiengawa.

Lón ena sossorun Jekop a kúna Iso me towaw me ekkewe 400 mwán. Jekop a akkomwoló seni an we famili me a chapetiw me mwen pwiin na fán fisu. Iso a ssá ngeni Jekop me a turufi. Ekkena rúúemén pwipwi ra kechiw me ra kinamwefengen. Óm ekiek epwe met meefien Jiowa ren napanapen án Jekop ataweei ar we osukosuk?

Mwirin Iso a liwiniti imwan we, me Jekop a feiló ren imwan. A wor 12 néún Jekop át. Iter Rupen, Simeon, Lifai, Juta, Tan, Naftali, Kat, Aser, Isakar, Sepulon, Josef, me Peniamin. Jiowa a néúnéú emén me lein néún kena át itan Josef an epwe amanawa néún kewe aramas. Ka silei ifa ussun? Sipwe ppii.