Jekop A Angei ewe Álemwir

A 40 ierin Aisek atun a pwúlúweni Repeka. Aisek a fókkun tongei. Mwirin och fansoun a wor néúr rúúemén nippwe át.

Iten ewe mwánichi, Iso nge ewe kúkkún Jekop. Iso a sani an epwe ló kukkunou lúkún me a sile nikáppich man. Nge Jekop a sani le nónnóm lón imw.

Lón ena fansoun ewe mwánichi a kan wisen angei lap ngeni ekkewe fénú me moni atun ewe sam a máló. Ra kan eita ngeni ena, álemwir. Lón án Aisek we famili, án Jiowa kewe pwon a eáni ngeni Eperiam a kapachelong lón ena álemwir. Iso ese pwal ekieki ussun ekkena pwon, nge Jekop a silei pwe ra fókkun aúchea.

Lón eú atun, Iso a wareiti imwer we me a fókkun pekkus seni an nikáppich lón ena rán. A fáreni ewe mwéngé mi anné Jekop a kuku me a erá: ‘Úa echik! Ngeniei och ena mwéngé mi par!’ Jekop a erá: ‘Ewer, nge akkomw kopwe pwon ngeniei pwe kopwe ngeniei wisom we wisen mwánichi.’ Iso a erá: ‘Úse pwal ekieki ussun wisei na! Ka tongeni wiseni. Úa chék mochen mwéngé.’ Óm ekiek nge a éch met Iso a féri? Fókkun aapw. Iso a fangoló eú mettóch mi fókkun aúchea fán iten chék och mwéngé.

Atun Aisek a fókkun chinnap, a tori atun an epwele ngeni néún we mwánichi ewe feiéch. Nge Repeka a álisi Jekop, néúr we kúkkún át pwe epwe angei ena feiéch. Atun Iso a silei ena a fókkun song me a mochen nieló nippween we. Aisek me Repeka ra mochen túmúnú Jekop, ina popun ra ereni: ‘Kopwe feiló nóm ren mongeen inom we Lapan tori án Iso song epwe wesiló.’ Jekop a aúseling ngeni met inan kewe me seman ra ereni, iwe a sú pwe esap máló.