Jakop A Feiló Haran

EN MI esilla ié keei mwán Jakop a kakkapas ngeniir? Mwirin án Jakop sái fitu rán, a chuuriir únúkkún eú ito. Ra kan mammasa néúr kewe siip. Jakop a eis: ‘Ia oua kan nónnóm ie?’

Ra apasa: ‘Haran.’

Jakop a eis: ‘Ámi mi sissilei Lapan?’

Ra pélúweni: ‘Ewer. Katol, ina i néún we fépwúl Rahel a pwereto fán néún pwiin siip.’ En mi kúna Rahel, iei i a feffeito me ikenan ie?

Lupwen Jakop a kúna Rahel fán ekkewe siip, néún Lapan tettelin semen Jakop we, a feiló an epwe okullaló ewe faú seni ewe ito pwe ekkewe siip repwe tongeni ka. Iwe, a foropachei Rahel me ereni ika i ié. Iwe, neminnei a fókkun pwapwa, a feiló ngeni imwan we me ereni seman we Lapan.

Lapan a mmen pwapwa ren án Jakop epwele nónnóm ren. Iwe, lupwen Jakop a tingor an epwe pwúlúweni Rahel, Lapan a pwapwa. Iwe nge, a tingorei Jakop an epwe angang ngeni fisu ier fán iten Rahel. A féri, pokiten a fókkun watte an tongei Rahel. Nge atun a tori ewe ránin apwúpwúlú, en mi silei met a fis?

Lapan a ngeni Jakop néún we watte, Lea, nge esap Rahel. Lupwen Jakop a tipeeú ngeni an epwe pwal angang fisu ier, iwe, Lapan a ngeni Rahel an epwe pwúlúweni. Lón ena fansoun, Kot a mutatá ngeni mwán ar repwe pwúlúweni lap seni emén. Nge iei, Paipel a affata pwe emén mwán epwe pwúlúweni emén chék.