A Watte Án Jakop We Famili

NENGENI mwo ei watteen famili. Ikkeei iir néún Jakop kewe engol me rúúemén át. A pwal wor néún kewe nengngin. En mi silei iten ekkóch me leir? Iwe, sipwe káé.

Lea a néúnatiw Rupen, Simeon, Lefi me Juta. Lupwen Rahel a kúna pwe ese néúnéú, a fókkun letipechou. Iwe, a ngeni Jakop néún we chón angang Pila, iwe, Pila a néúnatiw rúúemén át, iter Tan me Naftali. Iwe, Lea a pwal ngeni Jakop néún we chón angang Silpa, iwe, Silpa a néúnatiw Kat me Aser. Lea a pwal néúnatiw rúúemén át, Isakar me Sepulon.

Ló, ló, ló, Rahel a néúnéú. A eita ngeni Josef. Mwirin, sipwe káé chómmóng pwóróusen Josef, pún a wiliti emén mi watte aúchean. Ikkeei iir ekkewe engol me emén át upun wóón Jakop atun a nónnóm ren Lapan, semen Rahel we.

A pwal wor ekkóch néún Jakop nengngin, nge Paipel a chék affata iten emén me leir. Itan we Tina.

A tori ewe fansoun lupwen Jakop a ekiekin ló seni Lapan me feiló ngeni Kanaan. Iwe, a ionfengeni an we watteen famili me néún kewe pwiin siip me pwiin kou, iwe, ra poputááni ar sáittam.

Mwirin án Jakop me an we famili nónnóm ekis fansoun lón Kanaan, Rahel a néúnatiw pwal emén át. A fis ena atun ar sái. Iwe, Rahel a fókkun riáfféú, iwe a máló atun a néúnéú, nge ewe ménúkol a péchékkúl. Jakop a eita ngeni Peniamin.

Sia mochen chechchemeni iten néún Jakop kewe engol me rúúemén át pún unusen mwúún Israel a popu seniir. Ren enletin, ekkewe 12 einangen Israel ra iteit seni néún Jakop kewe 10 át me néún Josef kewe rúúemén át. Isaak a chúen manaw ren fite ier mwirin uputiwen ekkeei át, iwe, ese mwáál a pwapwa ren tepetepen néún néún kewe. Nge sipwe ppii met a fis ngeni Tina, néún néún we.