A Tori Tina Eú Fitikoko Watte

EN MI kúna ika ié keei Tina epwele chuuriir? Epwe chuuri ekkewe ekkóch fépwúlún Kanaan. Itá seman we Jakop epwe pwapwa ika a silei ei mettóch? Ren óm kopwe pélúweni ei kapas eis, sótun chechchemeni met Apraham me Isaak ra ekieki usun ekkewe fefin lón Kanaan.

Itá Apraham a mochen pwe Isaak epwe pwúlúweni emén fépwúl seni Kanaan? Aapw, ese mochen. Itá Isaak me Repeka ra mochen pwe néúr we alúwél Jakop epwe pwúlúweni emén fépwúlún Kanaan? Aapw, rese mochen. En mi silei pwata?

Popun, pún ekkeei aramas lón Kanaan ra fel ngeni ekkewe kot chofona. Esap iir aramas mi múrinné fán iten án ekkewe chón Israel repwe tongeni ekiekin pwúlúweniir, iwe esap pwal iir aramas mi múrinné repwe tongeni ekiekin chieneniir. Iwe, sia tongeni wesewesen lúkú pwe Jakop ese pwapwa ren néún ei fépwúl an epwe chieneni ekkeei fépwúlún Kanaan.

Iwe pwúngún, a tori Tina eú fitikoko. En mi kúna ena re Kanaan lón ei lios, ina i mi nennengeni Tina? Itan Sikem. Eú rán lupwen Tina a etto kukkunou, Sikem a turufi, iwe a kirikiringaw ngeni. Ei mettóch a mwáál, pún itá úrúrún ekkewe chék mi pwúpwúlú repwe tongeni konfengen. Ei mettóch mi ngaw Sikem a féri ngeni Tina, a efisatá fitikoko watte.

Lupwen mwongeeien Tina kewe ra rong usun met a fis, ra fókkun song. Rúúemén me leir Simeon me Lefi ra kon song, pwe iwe ra angei ketilas, ánnifelong lón ewe telinimw me ra liapeni ekkewe mwán. Iir me pwiir kewe ra nieló Sikem me meinisin ekkewe mwán. Jakop a song pokiten féfféringawen néún kewe alúwél.

A ifa usun an a poputá ekkeei osukosuk meinisin? Popun, pún Tina a chieneni iir kewe rese álleasochisi án Kot kewe allúk. Sise mochen ach sipwe chieneni ekkena sókkun aramas, ika met?