Jiowa A Ngeniir An Kewe Allúk

ÓRUN ruu maram mwirin án ekkewe chón Israel ló seni Isip, ra tori ewe chuuk Sinai, oruuochun itan, Horep. Ina ewe leeni Jiowa a fen kapas ngeni Moses me lón ewe irá félúfél mi ngetenget. Ekkewe aramas ra féri leenier me ikeei ie, iwe ra nomwotiw arapakkan eú ier.

Moses a tétá wóón ewe chuuk, nge ekkewe aramas ra chék witiwit me fan. Jiowa a ereni Moses me wóón ewe chuuk pwe a mochen ekkewe chón Israel repwe álleasochisi I me pwal wiliti Néún kewe aramas mi aúchea. Lupwen Moses a feitiw, a ereni ekkewe chón Israel met Jiowa a apasa. Iwe, ekkewe aramas ra apasa pwe repwe álleasochisi Jiowa, pún ra mochen pwe repwe néún aramas.

Iwe iei, Jiowa a féri eú mettóch mi amwarar. A féri pwe epwe étúét wóón ewe chuuk, iwe a efisi chopulap. A pwal kapas ngeni ekkewe aramas: ‘Ngang Jiowa ámi Kot, ewe mi uweikemiwu me lón Isip.’ Mwirin a allúk ngeniir: ‘Ámi ousap fel ngeni pwal ekkóch kot lúkún ngang.’

Kot a pwal ngeni ekkewe chón Israel tiu allúk. Ekkewe aramas ra fókkun niwokkus. Ra ereni Moses: ‘En kopwe wisen fós ngenikem, pún aua niwokkus pwe aupwe máló ika Kot a kapas ngenikem.’

Mwirin Jiowa a ereni Moses: ‘Kopwe pweretá rei wóón ewe chuuk. Upwe ngonuk rúúaché faú mi chépép, ngang mi makkeetiw ekkewe allúk wóór, ekkewe allúk ua mochen ekkewe aramas repwe álleasochisiir.’ Iwe, Moses a ettásefál wóón ewe chuuk. A kan nónnóm ie 40 rán me 40 pwin.

A wor chómmóng, chómmóng án Kot allúk ngeni néún kewe aramas. Moses a makkeetiw ekkeei allúk. Kot a pwal ngeni Moses ekkewe rúúaché faú mi chépép. Kot a pwisin makkeei ekkewe 10 allúk wóón ekkeei faú, ekkewe allúk i a fen kapas ngeni ekkewe aramas usur. Ekkena allúk ra iteni Allúk Engol.

Ekkewe Allúk Engol, iir allúk mi wesewesen lamot usun chék ekkewe lusun allúk Kot a ngeni ekkewe chón Israel. Eú me lein ekkeei allúk a apasa: ‘Kopwe tongei Jiowa óm Kot ren unusen letipom, unusen ekiekum, unusen manawom me unusen óm péchékkúl.’ Pwal eú a apasa: ‘Kopwe tongei chón órum usun óm tongei pwisin en.’ Néún Kot we Jesus Kraist, a apasa pwe ikkeei ekkewe ruu allúk mi lamot seni meinisin ekkewe allúk Jiowa a ngeni néún kewe aramasen Israel. Mwirin, sipwap káé chómmóng mettóch usun Néún Kot we me an kewe afalafal.