Josua A Wiliti Sou Emmwen

MOSES a mochen fiti ekkewe chón Israel le tolong Kanaan. Ina minne a tingor: ‘Jiowa, kopwe mut ngeniei ai upwe tori pekilóón ewe chénúpupu Jortan me pwal kúna ewe fénú mi múrinné.’ Nge Jiowa a apasa: ‘Fanafaneló mwo! Kosap chúen kapas usun ei mettóch!’ En mi silei pwata Jiowa a apasa ena mettóch?

A erá ena pokiten minne a fis lupwen Moses a opuni ewe achaw. Chechchemeni pwe iir me Aaron rese mwareiti Jiowa pwe rese ereni ekkewe aramas pwe Jiowa, I ewe a okusawu ewe konik seni ewe achaw. Ren ei popun, Jiowa a apasa pwe esap mut ngeniir ar repwe tolong lón Kanaan.

Iwe, fitu maram mwirin málóón Aaron, Jiowa a ereni Moses: ‘Angei Josua, iwe aútáái mwen mesen Eleasar ewe souasor me ekkewe aramas. Iwe mwen meser meinisin, kopwe ereniir pwe Josua ewe mineféén sou emmwen.’ Moses a féri minne chék Jiowa a apasa, usun ka kúna me lón ei lios.

Mwirin Jiowa a ereni Josua: ‘Kopwe tipepéchékkúl nge kosap niwokkus. En kopwe emmwenaalong ekkewe chón Israel lón ewe fénú Kanaan, ewe fénú ngang ua fen pwon ngeniir, iwe ngang upwe nónnóm reom.’

Mwirin Jiowa a ereni Moses pwe epwe tétá asechikkin ewe chuuk Nepo lón ewe fénú Moap. Seni ikena Moses a tongeni nenneló ewe epek ren ewe chénúpupu Jortan me kúna ewe fénú mi ling, Kanaan. Jiowa a apasa: ‘Ina ewe fénú ua pwon ngeni mwirimwirin Apraham, Isaak me Jakop. Ua mut ngonuk óm kopwe kúna, nge usap mut ngonuk óm kopwe tolong lón.’

Moses a máló me ikena ie wóón ewe chuuk Nepo. A tori 120 ierin. A chúen chék péchékkúl me mesan kewe ra chúen ffat. Ekkewe aramas ra fókkun letipechou, iwe ra kechiw pún Moses a máló. Nge ra pwapwa pún a wor néúr mineféén sou emmwen, ina i Josua.