Ekkewe Engol Me Rúúemén Spai

NENGENI ekkeei féún irá ekkeei mwán ra ekii. Nengeni úkúkún watteen ei umwun kreip. Ese ki ren emén chék mwán pwe iei ekkeei rúúemén mwán ra ámmwera wóón efóch émwúch. Pwal nengeni ekkeei féún irá. Minen ia ekkeei féún irá mi féúmmong? Seni ewe fénú Kanaan. Chechchemeni pwe Kanaan, ina ewe fénú Apraham, Isaak me Jakop ra nónnóm ie me lóóm. Nge pokiten a fis eú lengita, Jakop me an we famili ra mwékút ngeni Isip. Iwe iei, órun 216 ier mwirin, Moses a emmweni ekkewe chón Israel ngeni Kanaan. Iei ra fen tikeri eú leeni lón ewe fénúpéén itan Kates.

Aramasangaw ra nónnóm lón ewe fénú Kanaan. Ina popun Moses a tiinaaló engol me rúúemén spai me a ereniir: ‘Oupwe ppii úkúkún chóchóón ekkewe aramas ie me péchékkúler. Ou ppii ika ewe pwúl a múrinné ren ámáárin mwéngé. Oupwe pwal uweato ekkóch ekkewe féún irá.’

Lupwen ekkewe spai ra liwiniti Kates, ra ereni Moses: ‘A wesewesen eú fénú múrinné.’ Ren ar repwe ánnetatá ei mettóch, ra áiti ngeni Moses ekkóch ekkewe féún irá. Nge 10 ekkewe spai ra apasa: ‘Ekkewe aramas mi nónnóm ie ra péchékkúl me a watte inisiir. Sipwe máló ika sipwe sótun liapeni ewe fénú.’

Ekkewe chón Israel ra niwokkus lupwen ra rong ei pwóróus. Ra apasa: ‘Epwe fen múrinné ika sia fen máló lón Isip are ikeei ie lón ei fénúpéén. Sipwele máló lón maun, iwe pwúlúwach kewe me néúch kewe repwe eoló. Sipwe filatá emén mineféén néúch chón emmwen, siwilin Moses, iwe sipwe liwiniti Isip!’

Nge rúúemén me lein ekkewe spai iter Josua me Kalep ra lúkú Jiowa me sótun ekinamwei ekkewe aramas. Ra apasa: ‘Ousap niwokkus. Jiowa a nónnóm rech. Epwe mecheres ngenikich ach sipwe liapeni ewe fénú.’ Nge ekkewe aramas rese aúseling. Ra fen mochen nieló Josua me Kalep.

Ei mettóch a fókkun asonga Jiowa, iwe a ereni Moses: ‘Esap wor emén lein ekkewe aramas 20 ier feitá epwe tolong lón ewe fénú Kanaan. Ra fen kúna ekkewe manaman ua fériir lón Isip me pwal lón ewe fénúpéén, nge resaamwo lúkúei. Ina pwata repwe fetálfeil lón ewe fénúpéén ren úkúkún 40 ier tori ar repwe máló meinisin. Josua chék me Kalep repwe tori ewe fénú Kanaan.’