Jiowa A Filaatá Josua

Mwirin án Moses emmweni ewe mwúún Israel ren fite ier, a arapakkan an epwele much manawan. Jiowa a ereni: ‘Esap en ewe kopwe emmwenaalong ekkewe chón Israel lón ewe Fénúen Pwon. Nge úpwe mut ngonuk óm kopwe kúna ewe leeni.’ Mwirin Moses a tingorei Jiowa an epwe filaatá emén minefé souemmwen pwe epwe túmúnú ekkewe aramas. Jiowa a ereni: ‘Kopwe feiló ren Josua, me ereni pwe i ewe úa filaatá.’

Moses a ereni chón ewe mwú pwe ekiseló chék epwele máló me Jiowa a fen filaatá Josua pwe epwe wisen emmweniirelong lón ewe Fénúen Pwon. Mwirin Moses a ereni Josua: ‘Kosap niwokkus. Jiowa epwe álisuk.’ Ekiseló mwirin, Moses a feitá asen ewe chuuk Nepo, me ikena ie, Jiowa a pwáári ngeni ewe leeni i a pwon ngeni Eperiam, Aisek, me Jekop. Moses a ierini 120 atun a máló.

Jiowa a ereni Josua: ‘Kopwe pwereló epekin ewe Chénúpupu Jortan me feiló ngeni Kenan. Ngang úpwe álisuk ussun ái álisiei Moses. Kopwe álleani ewe Allúk iteiten rán. Kosap niwokkus. Kopwe pwora. Kopwe feiló me féri met úa allúk ngonuk.’

Josua a tiinaaló rúúemén spai ngeni ewe telinimw itan Jeriko. Lón ewe pwóróus mwirin ei, sipwe káé met a fis ikena. Atun ra liwin, ra apasa pwe iei ewe atun a éch án ekkewe aramas repwele feiló Kenan. Sorotáán ewe rán, Josua a ereni ekkewe aramas pwe repwele mwékút. Mwirin a tiinaaló ekkewe souasor mi wisen mwárei ewe pwórófel ar repwe akkomwoló mwer lón ewe Chénúpupu Jortan. Ena chénúpupu a pummong. Nge atun chék pechen ekkewe souasor a ipwelong lón ewe konik, ewe pupu a kaúló me ena konik a pwasetá! Ekkewe souasor ra fetálelóng lukanapen ewe chénúpupu me útá atun chón ewe mwúún Israel ra feiló ngeni ewe epek. Óm ekiek ena manaman a áchchema ngeniir met Jiowa a féri únúkkún ewe Setipar?

Mwirin fite ier, chón Israel ra kerán tolong lón ewe Fénúen Pwon. Ra tongeni aúetá imwer me telinimw. Ra tongeni ffér ar atake me fót sókkopaten irá. A chómmóng mettóch ar repwe mwéngé me ún lón ewe Fénúen Pwon, ina popun ra eita ngeni fénúen milik me honey.