Ar Feilong Lón Ewe Chénúpupu Jortan

NENGENI ekkeei chón Israel ra feilong lón ewe chénúpupu Jortan! Nge ifa ewe konik? Pokiten a kan watte púngún rán lón ena atun, a watte pupuun konik fitu chék minich mwan. Nge iei a mwor ewe konik! Iwe, ekkewe chón Israel ra fetál ngeni ewe epek wóón fénú mi pwas usun ar we fetál lukanapen ewe Setipar! Ia ewe konik a feiló ie? Sipwe ppii.

Lupwen a tori fansoun án ekkewe chón Israel repwele feilong lón ewe chénúpupu Jortan, iei ewe mettóch Jiowa a ereni Josua an epwe esilei ngeni ekkewe aramas: ‘Ekkewe souasor repwe angei ewe pworofel me akkomwóló mwach. Lupwen repwe ipwelong lón konikin ewe chénúpupu Jortan, ewe konik epwe kaúló.’

Ina pwata ekkewe souasor ra angei ewe pworofel, iwe ra ekii me akkomwóló mwen ekkewe aramas. Lupwen ra tori Jortan, ekkewe souasor ra ipwelong lón ewe konik. A péchékkúl ewe éút me pwal alóllóól. Nge lón chék ewe atun pecher kewe ra ipwelong lón ewe konik, a poputá le kaúló. A eú manaman! Jiowa a pinei ewe konik me asan. Iwe ekiseló mwirin, ese chúen wor konik lón ewe chénúpupu!

Ekkewe souasor mi ukkuwei ewe pworofel ra pwereló tori lukanapen ewe chénúpupu, ewe a fen pwasetá. En mi tongeni kúner lón ei lios? Atun ra úkkúútá ikena ie, meinisin ekkewe chón Israel ra fetál lón ewe chénúpupu Jortan wóón fénú mi pwas!

Lupwen iir meinisin ra tori ewe epek, Jiowa a néúnéú Josua an epwe ereni engol me rúúemén mwán mi péchékkúl: ‘Ou pwerelong lón ewe chénúpupu, ikewe ie ekkewe souasor ra úkkúútá ie fán ewe pworofel. Angei engol me rúúeféú faú me ssenietá ia oupwe annut ie lepwinei. Iwe lón mwach kkan, lupwen néúmi kewe repwe eis ika met weween ekkeei faú, ámi oupwe ereniir pwe a kaúló ewe konik lupwen án Jiowa we pworofel a mwékútúló ngeni ewe epek lón Jortan. Ekkewe faú repwe áchema ngenikemi usun ei manaman!’ Josua a pwal ssenietá engol me rúúeféú faú lón ewe chénúpupu, ikewe ekkewe souasor ra útá ie.

Mwirin, Josua a ereni ekkewe souasor, iir kewe mi ukkuwei ewe pworofel: ‘Ou feito seni ikenan.’ Iwe mwirin chék ar feitá seni, ewe chénúpupu a pupusefál.