Rut Me Naomi

KOPWE kúna pwe a wor eú puk lón ewe Paipel mi iteni Rut. A apwóróusa pwóróusen eú famili mi manaw atun an a wor ekkewe soukapwúng lón Israel. Rut, i emén fépwúl seni ewe fénú Moap, nge esap i emén me lein néún Kot kewe chón Israel. Nge lupwen Rut a káé usun Jiowa ewe Kot mi enlet, an tong ngeni a wesewesen lapóló. Naomi, i emén fefin mi oro chinnap, a álisi Rut le káé usun Jiowa.

Naomi, i emén fin Israel. Iir me pwúlúwan we me néúr kewe rúúemén alúwél ra mwékút ngeni ewe fénú Moap atun an we a wor lengita lón Israel. Eú rán, a máló pwúlúwen Naomi we. Mwirin, néún Naomi kewe alúwél ra pwúlúweni rúúemén fépwúlún Moap iter Rut me Orpa. Nge mwirin 10 ier, néún Naomi kewe rúúemén alúwél ra máló. A ifa me letipechoun Naomi me ekkewe rúúemén fépwúl! Met Naomi epwele féri?

Eú rán, Naomi a meefatá an epwele sái ngeni fénúan mi towau ren wesetáán an kewe aramas. Rut me Orpa ra mochen nónnóm ren, ina popun ra pwal fiti. Iwe mwirin ar sáiló wóón ewe al, Naomi a kuliiti ekkewe fépwúl, iwe a ereniir: ‘Oupwe liwiniti imwemi me oupwe nónnóm ren inemi kewe.’

Naomi a mitiri ekkewe fépwúl. Iwe ra poputá le kechiw, pún a watte ar tongei Naomi. Ra apasa: ‘Aapw! Ám aupwe fitukóló ren chón fénúom we.’ Nge Naomi a pélúweni: ‘Oupwe liwinló, nei keei fépwúl. Epwe múrinné ngenikemi ika oupwe liwiniti pwisin imwemi.’ Iwe, Orpa a poputá le liwinló. Nge Rut ese ló.

Naomi a kul ngeni Rut me apasa: ‘Orpa a fen ló. Kele pwal fiti le liwinló ngeni imwom.’ Nge Rut a pélúweni: ‘Kosap sótun etipetipaei ai upwe likitukoló! Kopwe mut ngeniei ai upwe fituk. Ia kopwe feiló ie, ia kopwe nónnóm ie, pwal ngang upwe nónnóm ie. Óm aramas repwe ai, iwe óm Kot epwe ai Kot. Ia kopwe máló ie, ngang upwe pwal máló ie, iwe pwal ina chék ewe leeni upwe peias ie.’ Lupwen Rut a apasa ena mettóch, Naomi ese chúen sótun pesei an epwe liwinló ngeni imwan.

Iwe, ekkeei rúúemén fefin ra tori Israel. Iwe ra nónnóm ikena ie. Mwittir chék Rut a poputá le angang lón ekkewe atake, pún a tori ewe fansoun uwaan ataken ewe irá itan parli. Emén mwán itan Poas a mut ngeni Rut an epwe ioni parli lón an kewe atake. Ka silei ika ié we inen Poas? I ewe fefin Rahap, seni ewe telinimw Jeriko.

Eú rán Poas a ereni Rut: ‘Ua fen rong pwóróusom meinisin, me úkúkún watteen óm kirekiréch ngeni Naomi. Ua silei usun óm likitaló semom me inom me pwisin fénúom me usun óm nónnóm lein ekkeei aramas kese mwo sissileer me mwan. Amwo Jiowa epwe kirekiréch ngonuk!’

Rut a pélúweni: ‘Maing, ka fókkun kirekiréch ngeniei. Ka fen aururu letipei ren ekkewe kapas múrinné ka apasa ngeniei.’ A mmen watte án Poas sani Rut me mwirin ekis fansoun, ra pwúpwúlú. A ifa me pwapwaan Naomi ren ei mettóch! Nge a lapóló pwapwaan Naomi lupwen Rut me Poas ra néúni néúr we mwánichi itan Opet. Iwe Opet, epwe wiliiti semen Tafit chinnap. Iwe sipwap káé usun chómmóng pwóróusen Tafit mwirin.