Rut me Naomi

Atun a fis echik lón ewe fénú Israel, emén fin Israel itan Naomi a mwékút ngeni ewe fénú itan Moap fitifengen me pwúlúwan me néúr kewe át. Ló, ló, ló, pwúlúwen Naomi we a máló. Néún kewe rúúemén át ra pwúlúweni Rut me Orpa, iir fin Moap. Mwirin och fansoun, a pwal sópwósópwoló letipechoun Naomi atun néún kewe át ra máló.

Atun Naomi a silei pwe a wes ewe echik lón Israel, a liwiniti leenian. Rut me Orpa ra fiti, nge atun ra feffetál wóón ewe al, Naomi a ereniir: ‘Ámi oua fókkun kirekiréch ngeni nei kewe mwán me pwal ngeniei. Úa mochen ámi me rúúemén oupwe pwúpwúlúsefál. Oupwe liwiniti fénúemi we Moap.’ Ekkewe fefin ra apasa: ‘Áúa mmen tongeek! Áúse mochen likitukoló.’ Naomi a chék ereniir ar repwe feiló. Iwe, Orpa a liwin, nge Rut a chúen fiti Naomi. Naomi a ereni: ‘Orpa a liwiniti chón lón leenian me an kewe kot. Kopwe fiti me liwiniti leeniom.’ Nge Rut a apasa: ‘Úsapw fókkun likitukoló. Óm aramas epwe ái aramas, me óm Kot epwe ái Kot.’ Óm ekiek epwe met meefien Naomi atun Rut a apasa ena?

Rut me Naomi ra tori Israel lepoputáán ewe fansoun uwaan parli. Lón eú atun, Rut a ló ioni ekkewe lusun wiich lón eú atake án emén mwán itan Poas, néún Reap. A rong pwe Rut i emén chón Moap a chék túppwél le nónnóm ren Naomi. A ereni néún kewe chón angang ar repwe likitaaló ekkóch wiich lón ewe atake pwe Rut epwe tongeni ioni.

Lón eú pwinin, Naomi a eisini Rut: ‘Án ié ewe atake ka angang lón ikenái?’ Rut a apasa: ‘Án emén mwán itan Poas.’ Naomi a ereni: ‘Poas i aramasen pwúlúwei we. Kopwe sópweeló le angang lón an na atake fiti ekkewe ekkóch fépwúl pwe kopwe túmún me ikena.’

Rut a sópweeló le angang lón án Poas we atake tori an a wes ewe fansoun uwa. Poas a esilla pwe Rut a angang weires me i emén fefin mi múrinné. Lón ena fansoun, iká emén mwán a máló nge ese wor néún át, emén aramasan a tongeni pwúlúweni pwúlúwan we. Iwe, Poas a pwúlúweni Rut. A wor emén néúr át itan Opet, ewe a wiliiti semen semen King Tafit. Chienen Naomi kewe ra fókkun pwapwa. Ra erá: ‘Akkomw, Jiowa a fang ngonuk Rut, emén mi fókkun kirekiréch ngonuk, me iei a wor emén néún noum we. Mwareiti Jiowa.’