Popun Án Tafit Epwele Sú

EWE meilapen soufiun Israel itan Apner a emmwenaaló Tafit ren Saul, mwirin án Tafit we nieló Koliat. Saul a fókkun pwapwa ren Tafit. A ewisa ngeni ewe wis meilap lón an we mwichen soufiu, iwe a uwealó pwe epwe nónnóm lón imwan we, imwen king.

Mwirin, lupwen ekkewe soufiu ra liwin seni ar maun ngeni ekkewe chón Filistia, ekkewe fefin ra eáni ei kél: ‘Saul a nieló fitengeréú, nge Tafit fitu, fitu ngeréú.’ Ei mettóch a efisatá lólówó lón letipen Saul, pún ra asamolu Tafit lap seni i. Nge néún Saul we mwán itan Jonatan ese lólówó. A fókkun tongei Tafit, iwe Tafit a pwal tongei Jonatan. Iwe, iir me rúúemén ra pwonfengen pwe repwe pwipwi tori feilfeiló.

Tafit a mmen angéch le ettiki ewe minen ettik itan arp, iwe Saul a kan sani ekkewe nikáttik Tafit a eáni. Nge eú rán, án Saul lólówó a amwékútú pwe epwe féri eú mettóch mi fókkun ngaw. Lupwen Tafit a ettiki néún we arp, Saul a angei wokun we wokun maun, iwe a affota ngeni me apasa: ‘Upwe áppwera ngeni Tafit enan etiip!’ Nge Tafit a onu, iwe ese kkúú. Mwirin Saul a pwal sótunisefál, nge ese pwal kkúú. Iwe, Tafit a esilla pwe a lamot epwe fókkun túmúnúéch.

Ka chechchemeni án Saul we pwon? A erá pwe epwe liffang néún we fépwúl ngeni ewe mwán mi nieló Koliat pwe pwúlúwan. Mwirin, Saul a ereni Tafit pwe epwe tongeni pwúlúweni néún we fépwúl itan Mikal ika epwe akkomw nieló 100 chón Filistia. Ekieki mwo ena! Saul a fókkun áneánei pwe ekkewe chón Filistia repwe nieló Tafit. Nge rese tongeni, iwe Saul a liffang ngeni Tafit néún we fépwúl pwe pwúlúwan.

Eú rán, Saul a ereni Jonatan me meinisin néún kewe chón angang pwe a mochen nieló Tafit. Nge Jonatan a ereni seman we: ‘Kosap efeiengawa Tafit. Esap fán eú an epwe féri och mettóch mi ngaw ngonuk. Nge mettóch meinisin a féri a fen awora watteen álillis ngonuk. A efeiengaw ngeni manawan atun an we nieló Koliat, iwe lupwen ka kúna, ka pwapwa.’

Saul a aúseling ngeni alón néún we, iwe a pwonei pwe esap efeiengawa Tafit. Tafit a liwin, iwe a pwal angang ngeni Saul lón imwan we usun met a féfféri me lóóm. Iwe nge lón eú rán lupwen Tafit a ettiki ewe minen ettik, Saul a sótun affota ngeni Tafit wokun we. Tafit a onu, iwe ewe wok a kkúú ewe etiip. A ina aúlúngátin! Iei Tafit a weweiti pwe mi lamot epwele sú!

Lón ena pwinin, Tafit a ló ngeni pwisin imwan we. Nge Saul a tiinaaló ekkóch mwán pwe repwe nieló. Mikal a silei met seman we a ekiekin féri. Iwe a ereni pwúlúwan we: ‘Ika pwe kese sú lepwinei, kosap manaw tori lesor.’ Lón ena pwinin Mikal a álisi Tafit an epwe sú me lón eú asammwacho. Tafit a okkopfetál ren órun fisu ier pwe Saul ete liapeni.