Saul Ewe Áeménún Kingen Israel

NENGENI án Samuel ninatiw ena kepit wóón mékúren ena mwán. A ina usun ar eéreni fán iten ar repwe pwáraatá pwe ewe emén a fen filitá ngeni ewe wis king. Jiowa a ereni Samuel pwe epwe epiti ngeni mékúren Saul ena kepit. Ina eú kepit mi kkóló aúchean me pwokkus.

Saul a ekieki pwe ese tufich ngeni ewe wis king. A ereni Samuel: ‘Ngang emén chón ewe einangen Peniamin, ewe mi kisikis seni meinisin lón Israel. Pwata ka apasa pwe upwe king?’ Jiowa a sani Saul pún ese lamalam tekia are sikesik. Ina ewe popun an a filatá pwe epwe king.

Nge Saul esap emén mwán mi wéúngaw are pinengaw. A feito seni eú famili mi wéúéch, a pwal fókkun átéch me ttam. A ttam seni meinisin lón Israel wóón úkúkún eú fiit! Saul pwal i emén mi fókkun mwittir le ssá, me emén mwán mi fókkun péchékkúl. Ekkewe aramas ra pwapwa pwe Jiowa a filatá Saul an epwe king. Iir meinisin ra poputá le mweir: ‘Amwo ewe king epwe manawattam!’

Ekkewe chón oputa Israel ra péchékkúl usun chék lóóm. Iir ra chúen efisi chómmóng fitikoko ngeni ekkewe chón Israel. Ekiseló mwirin án Saul we seikitá ngeni ewe wis king, ekkewe chón Amon ra ettá pwe repwe mauner. Nge Saul a emwicha eú mwichen soufiu mi watte, iwe a akkufu ekkewe chón Amon. Ei mettóch a apwapwaai ekkewe aramas, ra pwapwa pwe Saul ewe king.

Seni ena atun feffeiló, Saul a wisen emmweni ekkewe chón Israel lón ar akkufu chómmóng ekkewe mi oputer. A pwal wor emén néún Saul mwán mi pwora, itan Jonatan. Iwe, Jonatan a álisi ewe mwúún Israel an epwe win lón chómmóng maun. Nge ekkewe chón Filistia, iir mi chúen chék nampa eú lein ekkewe aramas mi oput ekkewe chón Israel. Lón eú rán fite ngeréú ekkewe chón Filistia ra etto maun ngeni ekkewe chón Israel.

Samuel a ereni Saul pwe epwe witi tori ewe fansoun epwe feito le féri eú asor, are liffang ngeni Jiowa. Nge Samuel a mmangoto. Saul a niwokkus pwe ekkewe chón Filistia repwele poputááni ewe maun, iwe a chék pwisin féri ewe asor. Lupwen Samuel a feito, a ereni Saul pwe a fen álleasolap. Samuel a apasa: ‘Jiowa epwe filatá pwal emén pwe epwe king wóón Israel.’

Mwirin, Saul a pwal álleasolapsefál. Iwe Samuel a ereni: ‘A múrinné ewe mettóch álleasochis ngeni Jiowa lap seni án emén liffang ngeni emén siip mi múrinné seni meinisin. Pokiten kese álleasochisi Jiowa, iwe Jiowa esap chúen néúnuk kingen Israel.’

Sia tongeni káé eú lesen mi múrinné seni ei pwóróus. A pwáraatá lamoten ewe mettóch álleasochis ngeni Jiowa fansoun meinisin. Pwal eú a pwáraatá pwe emén aramas mi múrinné, áwewe chék ren Saul, a tongeni an epwe siwil me wiliti emén mi ngaw. Sise mochen sipwe wiliti emén mi ngaw, ika met?