Tafit me Saul

Mwirin án Tafit nieló Koliat, King Saul a ewisa ngeni an epwe emmweni an we mwichen soufiu. Tafit a win fán chómmóng lón maun, me a fókkun iteféúló. Iteiten án Tafit war me maun, ekkewe fefin ra kan soun towu pwérúk me kélú: ‘Saul a nieló ngéréú, nge Tafit a nieló lap seni engol ngéréú!’ Saul a poputá le lólówóiti Tafit me a mochen nieló.

Tafit a fókkun angéch le ettik arp. Lón eú atun Tafit a ettiki ewe arp ngeni Saul, iwe King Saul a afóta ngeni néún we siles. Tafit a mwittir le olu, iwe ewe siles a kkúú ewe etiip. Mwirin ena, Saul a kútta chómmóng alen an epwe tongeni nieló Tafit. Mwirin och fansoun, Tafit a sú me op lón ewe fénúpéén.

Saul a angei 3,000 mwán soufiu me feiló kútta Tafit. Iwe a sereni pwe ra pwal tolong lón ewe pwaang ikewe Tafit me néún kewe mwán ra op ie. Néún Tafit kewe mwán ra mwéngúnúngún ngeni le erá: ‘Iei chék atun kopwe nieló Saul.’ Tafit a ánnifelong únúkkún Saul me rei lepwúlún úfan we. Saul ese meefi. Nge mwirin ena, Tafit a fókkun mengiringir pwe ese pwáári an súféliti néún Jiowa we king mi kepit. Ese mut ngeni néún kewe soufiu ar repwe nieló Saul. A kéri Saul me a ereni pwe a tongeni chék nieló atun an nóm lón ewe pwaang. Itá Saul epwe siwili an ekiek ussun Tafit?

Aapw. Saul a chúen sópweeló le kútta Tafit. Lón eú pwinin Tafit me tettelin néún we itan Apisai ra ánnifelong lón imwen Saul we tento. Nge Apner ewe mi wisen túmúnú ewe king, a pwal annut. Apisai a erá: ‘Iei chék atun sipwe nieló! Etto úpwe nieló.’ Tafit a ereni: ‘Jiowa epwe wisen apwúngú Saul. Sipwe chék angei wokun we siles me an we leenien konik me feiló.’

Tafit a feitá wóón eú chuuk me nennetiw wóón imwen Saul me néún kewe soufiu. A kékké me erá: ‘Apner, pwata kese túmúnú noum na king? Ifa án Saul we leenien konik me wokun we siles?’ Saul a esilla léúwen Tafit me a erá: ‘Itá ka chék tongeni nieiló, nge kese fen. Úa silei pwe kopwe wiliiti kingen Israel.’ Iwe, Saul a liwiniti imwan we imwen king. Nge esap meinisin chón án Saul famili ra oput Tafit.