Jesus A Liwintá Láng

A FEFFEILÓ ekkewe rán, nge a fen fán fite án Jesus pwá ngeni néún kewe chón áppirú. Lón eú atun, órun 500 chón káé ra kúna i. Lupwen a pwá ngeniir, en mi silei met Jesus a fós ngeniir usun? A fós usun ewe mwúún Kot. Jiowa a tiinatiw Jesus ngeni fénúfan pwe epwe áiti ngeni aramas usun ewe Mwú. Iwe, a chúen féri ei mettóch mwirin chék pwal an manawsefál seni máló.

Ka chechchemeni met ewe mwúún Kot? Ewer, ewe Mwú, ina wesewesen án Kot nemenem lón láng, iwe Jesus, i ewe Emén mi kefilitá me ren Kot pwe epwe king. Usun sia fen káé, Jesus a pwáraatá pwe epwe emén king mi múrinné ren an amwéngééú ekkewe mi echik, apéchékkúla ekkewe mi samau me pwal mwo nge amanawatá ekkewe mi máló!

Iwe, ika Jesus a nemenem lón ewe wis king lón láng ren úkúkún engeréú ier, epwe ifa usun napanapen ei fénúfan? Unusen fénúfan epwe wiliti eú paratis mi lingéch. Esap chúen wor maun, atai allúk, semmwen me máló. Sia silei pwe ei pwóróus mi enlet pún Kot a féri fénúfan pwe epwe eú paratis fán iten án aramas repwe pwapwaiti. Ina popun a féri ewe leeni mi lingéch Eten me lepoputáán. Iwe, Jesus epwe wisen ppii pwe minne Kot a mochen an epwe fis epwe wesewesen pwénútá.

Iei a tori ewe fansoun Jesus epwe liwintá láng. Ren úkúkún 40 rán Jesus a kan pwá ngeni néún kewe chón káé. Iwe ra wessen lúkú pwe a manawsefál. Nge mwen an we a ló seni néún kewe chón káé, a ereniir: ‘Oupwe nónnóm lón Jerusalem tori oupwe angei ewe ngún mi fel.’ Ewe ngún mi fel, ina án Kot we manaman, a usun ásepwál mi ekkenien me epwe álisi néún kewe chón áppirú pwe repwe féri letipen Kot. Lesópwólóón, Jesus a apasa: ‘Ámi oupwe afalafal usi tori ekis meinisin wóón fénúfan.’

Mwirin án Jesus apasa ei, a fis eú mettóch mi ámáirú. A poputá le feitá láng, usun ka kúna me ikkeei ie. Iwe, eú kuchu a pwélúoló Jesus seni mwen mesen ekkewe chón káé me rese chúen kúnasefál. Jesus a feitá láng, iwe me ikkena ie a poputá le nemenem wóón néún kewe chón áppirú wóón fénúfan.